Proverbs 7
7
1Konién꞉ʼa sehià꞉rak tsi nahò꞉ten ká꞉ton tánon tóhsa nonwén꞉ton sasaʼnikónhrhen tsi nahò꞉ten ká꞉ton tsi nénhshiere. 2Thóh ná꞉tsehr tsi nahò꞉ten ká꞉ton tánon enhshónhnheke. Seʼnikón꞉rarak íhtshehr tsi ní꞉ioht tsi konrihonnién꞉ni tsi ní꞉ioht tsi seʼnikón꞉rare ne skahrà꞉ke. 3Sateweién꞉ton tiótkon tsi ní꞉ioht tsi konrihonnién꞉ni, shiá꞉ton ne serià꞉ne. 4Tasateweienʼtón꞉hahs nattokháhtshera tsi shí꞉ken ní꞉ioht ne saʼtsí꞉ʼa tánon ne kaʼnikonhraientáhtshera tsi shí꞉ken ní꞉ioht nakwáh ákta tsi tsatén꞉ro. 5Ne kí꞉ken enkenikwé꞉ni nahsatatiaʼtohtáhrho nakó꞉ren ronnón꞉kwe rotiniá꞉kon tánon kí꞉ken konnón꞉kwe teiotiʼwennatsikhè꞉tare tánon naiesaʼnikonhrotá꞉ko.
Ión꞉kwe Ne Waʼthonwisenʼtsheráksen
6-7Énska iaʼká꞉ienhte iewakatké꞉tote tekatsiserá꞉ton tsi wakenónhsote, roʼnatsokowanen waʼkhé꞉ken ratinekénhteronʼs ne haróʼkho tehonateʼnikónhrison, shaiá꞉ta ká꞉ti waʼkáttoke tehotenonhwarorí꞉tonte. 8-9Eʼthó í꞉re ohahà꞉ke ákta tsi nón꞉we nikèn꞉teron kí꞉ken ión꞉kwe, oʼkarahsnéha ó꞉nen shaʼtetió꞉karas. 10Eʼthó nontá꞉we waʼthiatátken, iotatkwatákwen tsi ní꞉ioht ne waʼthonwisenʼtsheráksen tánon ioteʼnikonhronnihátie. 11Ioianerenhseráksen tánon iáh teiotehenhserá꞉ien tiótkon ohahà꞉ke í꞉wes, 12tókaʼ tsi tekaiosaien sewatié꞉ren ó꞉ni tsi iontkehrontáhkhwa tiohrhá꞉re. 13Iahohnià꞉sa ne ranekénhteron tánon waʼthonoronhkhwánion, waʼthotká꞉neren rakahrà꞉ke, sók wakèn꞉ron, 14“Ón꞉wa wenhniserá꞉te iaʼkerihwaié꞉rite aterennaientahtsherá꞉kon tsi waʼkonwanatiaʼtátshaʼahte ne katshé꞉nen tánon onkwatá꞉tenre noʼwá꞉ron. Káts skátne tetiatská꞉hon. 15Sók kiʼ takoniaʼtisákha. Tewakatonhontsó꞉ni nakoniaʼtatshén꞉ri tánon heh, kenʼ íhseʼs! 16Wakatenaktahserón꞉ni wahsohkwí꞉ios ionnitskaráhkhwa né꞉ne kwáh tioiánere Egypt nitioné꞉non. 17Iontiaʼtakonʼonhstáhkhwa tánon niaʼté꞉kon wenhserákonʼs tewakátion nakenaktà꞉ke. 18Káts ká꞉ti! Ahsontakwé꞉kon tsi tentiatatenó꞉ronhkwe, eniontiatonhnhá꞉rake tsi teniontiatatienawá꞉kon. 19Iáh tehèn꞉teron ne ionkeniniá꞉kon, í꞉non tsi nón꞉we niehawé꞉non. 20Wé꞉so iehohwístenha tánon iáh thaonsá꞉rawe tsi niió꞉re teiahiakserà꞉ke.” 21Wahoskanékten ká꞉ti, tsi naʼteiowennatsikhè꞉tare tsi ní꞉ioht tsi ióhthare tho kiʼ niahoʼnikonhrénhawe. 22Thontaiawénhstsi ká꞉ti waháhsere, rohsharí꞉ne tsi shí꞉ken ní꞉ioht ne teiotiná꞉kares waʼkonwarióhsere, tsi shí꞉ken ne oskenón꞉ton iotiaʼkaróntion tsi nón꞉we tewaterístaien 23tsi nón꞉we ne kaièn꞉kwire tenwáweste awerià꞉ne. Thóh ní꞉ioht ne ráonha tsi ní꞉ioht ne tsítenha#7.23 Enwá꞉ton nahsì꞉ron tsítha tókaʼ ó꞉ni otsiʼtén꞉ʼa. waʼoié꞉na aʼá꞉rakon—iáh tehattókas tsi iótteron tsi rónhnhe.
24Ó꞉nen ká꞉ti kwaienʼokón꞉ʼa kwáh tokén꞉ʼen takwatahónhsatat tsi nahò꞉ten enkí꞉ron. 25Tóhsa sewathón꞉tat kí꞉ken niionkweʼtò꞉ten iakáhawe ne sewé꞉ri, tóhsa sewaiaʼtisákha. 26Áonha tkarihón꞉nis ronatiokowánen ronnón꞉kwe waʼakokarón꞉ni kenheiáthne iehoné꞉non, só꞉tsi ronatiokowánen nahonwanahsete. 27Tókaʼ thóh iénsewe tsi tkèn꞉teron, í꞉se ó꞉ni eʼthó ensewaiaʼtarátie tsi tionhwentsà꞉te ne ronenhé꞉ion. Kenʼniiohahésha ne kenhé꞉ion.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.