Proverbs 4
4
Iakoiaʼtakéhnhas Attokháhtshera
1Kwaienʼokón꞉ʼa sewatahónhsatat tsi nahò꞉ten ne iaʼníha enhiarihónnien. Sewatahonhsí꞉iohst thó꞉ne ensewaʼnikonhraièn꞉taʼne. 2Tsi nahò꞉ten kwarihonnién꞉ni ioiánere, sewehià꞉rak ká꞉ti akwé꞉kon. 3Né꞉ne shikeksá꞉ʼa í꞉ʼi khók rohskenʼrakéhte rotiwiraièn꞉tahkwe. 4Rakeʼníha rakerihonnién꞉ni, wahèn꞉ron: “Sehià꞉rak tsi nahò꞉ten enkí꞉ron tánon tóhsa nonwén꞉ton sasaʼnikónhrhen. Tho ná꞉tsehr nahò꞉ten enkonhró꞉ri tánon enhshónhnheke. 5Saièn꞉taʼn ne attokháhtshera tánon iekakaʼeniónhon! Tóhsa sasaʼnikónhrhen tókaʼ ó꞉ni é꞉ren ahshá꞉wihte tsi nahò꞉ten waʼkì꞉ron. 6Tóhsa satewén꞉teht ne attokháhtshera eniesaiaʼtakéhnha; shenorónhkhwak tánon eniesanónhstate. 7Naiesaién꞉taʼne ne attokháhtshera né꞉ʼe aonhá꞉ʼa tiorihowá꞉nen tsi nénhshiere. Tókaʼ ó꞉ia nahò꞉ten aiesaién꞉taʼne, ne kiʼ saièn꞉taʼn ne iekakaʼeniónhon. 8Senó꞉ronhk attokháhtshera, né꞉ʼe ensahsennó꞉wanahte. Tsé꞉na tánon entí꞉son kakwenienhstáhtshera. 9Í꞉se enhshié꞉na ne kaiaʼtanehrakwáhtshera.”
10Satahónhsatat, konién꞉ʼa. Kwáh tokén꞉ʼen tsé꞉na tsi nahò꞉ten konhró꞉ris, karí꞉wes enhshónhnheke. 11Waʼkonrihónnien ne attokháhtshera tánon tkaié꞉rik tsi ní꞉ioht tsi ahsónhnheke. 12Iáh oʼthé꞉nen thaiesatrenhóhsten tsi sathahí꞉ne tókaʼ sarihwakwaríhshion, tánon iáh thaʼontesahsí꞉tiaʼke nó꞉nen tenhsaráhtate. 13Tiótkon sehià꞉rak tsi nahò꞉ten wahseweientéhtaʼne. Kaweientehtáhtshera né꞉ʼe ensonhnhéhkwen—senónhstat ká꞉ti. 14Tóhsa thóh nón꞉we iahá꞉se tsi nón꞉we iehonnéhtha ne rotirihwanerenʼákskon. Tóhsa ne shéhsehr tsi nihatiweiennò꞉ten ne iáh tethotirihwaié꞉ri. 15Tóhsa thóh ná꞉tsehr! Satatiaʼtohtáhrho tsi nón꞉we iáh tetkariwaié꞉ri! Tóhsa tsé꞉na ne ioʼtáksen! Kwáh nek ne tesatháhak. 16Rotirihwanerenʼákskon iáh thahatikwé꞉ni nahotí꞉taʼwe tsik thé꞉nen nenhóntiere ne iáh tetkariwaié꞉ri. Ratiiaʼtión꞉ni tánon iáh tehotí꞉taʼs ne tsi iáh ónhka tehshakotikarewáhton. 17Rón꞉nehre karihwaksénhtshera tánon ateriiohseraʼón꞉we né꞉ʼe shá꞉ka ne kákhwa tánon nahò꞉ten ahatihnekí꞉ra.
18Kí꞉ken oháha ronthahí꞉ne thotirihwaié꞉ri thóh ní꞉ioht tsi shí꞉ken takarahkwínekenʼne, sénha teioswatheʼonhátie tsi niió꞉re entiehkè꞉ne én꞉wawe. 19Né꞉ʼe raotiháha né꞉ʼe rotirihwanéren thóh naʼtetió꞉karas tsi ní꞉ioht nahsonthén꞉ne né꞉ʼe tenhatihraʼkwénhtaraʼne ne tsi iáh thahóntkahtho nahò꞉ten tahonahsì꞉tiaʼke.
20Konién꞉ʼa satahonhsí꞉iohst tsi nahò꞉ten enkí꞉ron. Satahónhsatat nakewennaʼshón꞉ʼa. 21Tóhsa nonwén꞉ton sasaʼnikónhrhen. Sehià꞉rak tánon serià꞉ne sateweién꞉ton. 22Akewennaʼshón꞉ʼa entkáhawe natónhnhets tánon ataʼkaritéhtshera ne ónhka eniakoʼnikonhraién꞉taʼne. 23Seʼnikón꞉rarak tsi ní꞉ioht tsi sanonhtónnion; tsi sónhnhe ne kaieronnítstha tsi ní꞉ioht tsi sanonhtonniónkwahs. 24Tóhsa nonwén꞉ton tsì꞉ron nahò꞉ten iáh tó꞉kenhske té꞉ken, tóhsa thé꞉nen satsté꞉rihst nahò꞉ten ne onó꞉wen tánon ne owennaʼshón꞉ʼa naiesathaharákwahte. 25Énska tsi nón꞉we iaʼsatkáhtho saʼnikonhrahnirónhak tsi sarihwakwaríhshion; tóhsa tasatenià꞉renht nahsatéhen. 26Ioianeréhak tsi ní꞉ioht tsi enhsateʼnikonhrísa tánon tsi nenhsátiere akwé꞉kon entkaié꞉rine. 27Satatiaʼtohtáhrho ne karihwanéren tánon iottakwarihshiónhak tsi sahtén꞉ti. Tóhsa ó꞉ni ne tsoʼkháha ákte nahsahtén꞉ti tsi nón꞉we niiohahí꞉io.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.