Proverbs 5
5
Wathró꞉ris Tsi Iáh Tetkariwaié꞉ri Ne Aienahkwénhawe
1Konién꞉ʼa, satahonhsí꞉iohst tánon satahónhsatat nakwattokháhtshera tánon iekakaʼeniónhon. 2Thó꞉ne ó꞉nen ensató꞉kenhse tsi ní꞉ioht tsi ahsatoriahnerón꞉ko ne tkariwaié꞉ri, tánon ne sawén꞉na enwathró꞉ri tsi nisaʼnikonhrowá꞉nen. 3Tókaʼ nakó꞉ren ró꞉ne tahshakonoronhkhwánion tókaʼ nón꞉wa thóh naʼteiotsikhé꞉tare tsi ní꞉ioht ne óshes tánon tenhonwanoronhkhwánion thóh ní꞉ioht né꞉ʼe naʼteiotsikhé꞉tare, 4nok kiʼ nó꞉nen enwateweienén꞉taʼne nek kiʼ iaʼteniotátere ne iotskà꞉ra tánon ne karonhiakénhsera. 5Thóh nón꞉we iensaiaʼténhawe tsi nón꞉we tionhwentsà꞉te ne kenhé꞉ion; Thóh nón꞉we niiothahitáhkhe tsi nón꞉we ne kenheiá꞉tne. 6Iáh thóh nón꞉we teiothahitáhkhe tsi nón꞉we ne ionhnheʼón꞉we; wathaharákwas, tánon iáh teioterién꞉tare oh niiawenʼenhátie.
7Sewatahónhsatat kwaienʼokón꞉ʼa tóhsa nonwén꞉ton sewaʼnikónhrhen tsi nahò꞉ten ká꞉ton. 8É꞉ren íseweht kí꞉ken nikaiaʼtò꞉ten! Tóhsa nonwén꞉ton tsi kèn꞉teron niahà꞉sewe! 9Tókaʼ thóh nienhénsewe, akó꞉ren ientséhawe ne kakwenienhstáhtshera ne í꞉se sewawenʼkénhen, ó꞉ni ne kenʼnitisewaion꞉ʼa#5.9 Enwá꞉ton nahsì꞉ron kenʼnitisewaién꞉ʼa tókaʼ ó꞉ni kenʼnitisewaión꞉sa. tsi ensewénheie ne enhatirihón꞉ni né꞉ʼe iáh tehshakotitèn꞉rahs nón꞉kwe. 10Hen, thiionkwè꞉tate ienhatíhawe satshoʼkowáhtshera, tsi nahò꞉ten saioʼtén꞉ʼen akó꞉ren akó꞉wen enskénhake. 11Sanaktà꞉ke enhshiaʼtión꞉nike saronhiá꞉ken tsi nishihé꞉ions, saʼwá꞉ron tánon shaierón꞉ta akwé꞉kon enwatekhwísa, 12tánon enhsí꞉ron, “Oh niiotié꞉ren tsi iáh nonwén꞉ton tshiakeweientéhtaʼne? Oh niiotié꞉ren tsi iáh nonwén꞉ton tewakathontá꞉ton nónhka aiontianakwaríhsi? 13Iáh tewakatahonhsatá꞉ton ne ionkerihonnién꞉ni. Iáh oʼthé꞉nen karí꞉wa tekheión꞉ni. 14Thontaiawénhstsi waʼkáttoke tsi kanén꞉rakon waʼkatatéhaʼte.”
15Shekweniénhsthak ne tesenì꞉teron tánon ne sanoronhkhwáhtshera akaonhá꞉ʼa khók tashé꞉ion. 16Nónhka akó꞉ren iakón꞉kwe shewirá꞉wi iáh kiʼ ní꞉se thé꞉nen thaʼshatshennonniátahkwe. 17Ioterihwíson sheienʼokón꞉ʼa nó꞉nen enhontehiá꞉ron ne aiesaiaʼtakéhnha, iáh nakó꞉ren nón꞉kwe ne iáh tesheienté꞉ri. 18Satshennonní꞉hak ká꞉ti tsi saniá꞉kon tánon enhsetshén꞉ri atonhnharáhtshera tsi kí꞉ken iakón꞉kwe seniniá꞉kon— 19iakonkweʼtí꞉io tánon iakoiaʼtáhskats tsi ní꞉ioht ne ohskenón꞉ton, nó꞉nen iotoriahnerónkwas. Sheríhon nakowén꞉na aonté꞉son atshennónnia; tsheríio ká꞉ti ne taiesahwaʼná꞉ke nakonoronhkhwáhtshera. 20Konién꞉ʼa oh niiontié꞉ren nakó꞉ren iakón꞉kwe aontahshé꞉ion sanoronhkhwáhtshera? Oh niiontié꞉ren tsi ne sénha ahserá꞉ko ne ieieronʼtí꞉io nakó꞉ren ró꞉ne? 21Roiá꞉ner akwé꞉kon tehaká꞉nere tsi nihsatiéhrha. Tsi nón꞉we nienhén꞉se, iaʼnikón꞉rare. 22Rotirihwanéren raotiioʼténhsera tho ní꞉ioht tsi ní꞉ioht ne waterístaien. Ne iohontiá꞉tenhke#5.22 Enwá꞉ton nahsì꞉ron iohontiá꞉tenhte tókaʼ ó꞉ni ieniakoià꞉tenhte. tsi rotirihwanéren. 23Enhonníheie ne tsi iáh thahatikwé꞉ni nahontatié꞉na. Tsi niió꞉re tsi rotinonhwahró꞉ri ne ká꞉ti iohsnó꞉re enhonthahíta tsi iontatiaʼtataʼáhstha.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.