Proverbs 3
3
Iakoʼnikonhrá꞉wis Ne Kenʼnithotiién꞉sa#3.1 Title Enwá꞉ton Nahsì꞉ron Kenʼnithotiién꞉sa Tókaʼ ó꞉ni Kenʼnithotiión꞉sa.
1Konién꞉ʼa tóhsa sasaʼnikónhrhen tsi nahò꞉ten enkonrihónnien. Tiótkon sehià꞉rak thóh náhshiere tsi nahò꞉ten enkonhró꞉ri. 2Tsi nahò꞉ten enkonrihónnien, karí꞉wes enhshónhnheke tánon ensakwáhtsheʼne. 3Tóhsa nonwén꞉ton sáhtkahf ne ioiánere tsi nihsheiatierá꞉se nonkwehshón꞉ʼa tánon sarihwatokénhak. Swánerenʼk seniarà꞉ke, tánon serià꞉ne shiá꞉ton. 4Tókaʼ tho nénhshiere, Rawenni꞉io tánon nonkwehshón꞉ʼa kwáh í꞉ken tsi enhonerienʼtí꞉io.
5Tsheniáhes Roiá꞉ner akwáh seriahsakwé꞉kon. Tóhsa nonwén꞉ton í꞉se satateniáhes tsi nahò꞉ten íhsehre saterién꞉tare. 6Tshehià꞉rak ne Roiá꞉ner, akwé꞉kon tsi nenhsatieránion tánon enhianaʼtón꞉hahse tsi nahò꞉ten tkariwaié꞉ri. 7Tóhsa nonwén꞉ton sanonhtonniónhak í꞉se kenh sénha sattókha. Kwáh nek ne tahtshéhtak ne Roiá꞉ner, tánon tóhsa sathón꞉tat kenʼniáhshiere nahò꞉ten iáh tetkariwaié꞉ri. 8Tókaʼ tho náhshiere, kwáh né꞉ne toʼk nikanonhkwahtsherí꞉io naonsonnihnón꞉ni tsi sakarewáhton tánon ká꞉ron nenhseronhiá꞉ken. 9Tshisewakweniénhsthak ne Roiá꞉ner aontàhtshon ne kwáh tioiánere tsi nahò꞉ten saienthókwen. 10Tókaʼ tho nénhshiere tsi ieientáhkhwa ne ká꞉nen tentká꞉rake tánon só꞉tsi wé꞉so ensahnekaién꞉taʼne otsí꞉tsa sók iáh thaʼón꞉ton akwé꞉kon ahsateweién꞉ton.
11Konién꞉ʼa nó꞉nen Roiá꞉ner tenhiawénneke satahonhsí꞉iohst tsi wahiaronká꞉ten. 12Shakoriʼwakwarihshién꞉nis ne Roiá꞉ner nónhka shakonorónhkhwa ne ká꞉ti shá꞉ka nónhka iakowí꞉raien shakotinorónhkhwa enhshakotirihwakwaríhshien. 13Iakotonhnháhere nónhka aieié꞉na nattokháhtshera, aieié꞉na ó꞉ni kaʼnikonraientáhtshera. 14Ne sénha wé꞉so shaʼtékena attokháhtshera tsi ní꞉ioht kahwistarà꞉ken; sénha ne wé꞉so shaʼtékena ní꞉se sarihwà꞉ke tsi ní꞉ioht ne ohwistanó꞉ron. 15Attokháhtshera sénha wé꞉so shaʼtékena tsi ní꞉ioht nohwistanoronʼshón꞉ʼa; iáh oʼthé꞉nen thaʼtaiesatonwéntsohse ne táhseren. 16Attokháhtshera tiakó꞉wis naiakonhnhé꞉son tánon kakwenienhstáhtshera tánon kakwahtshéhsera. 17Attokháhtshera entkáhawe ne ionʼwé꞉sen tsi ahsónhnheke eʼthó niensaiaʼténhawe tsi nón꞉we aiesaiaʼtanónhstate tsi iathenshotʼkawe. 18Nónhka aieié꞉na attokháhtshera ronatonhnháhere; attokháhtshera entiaka꞉wen natónhnhets.
19Raottokháhtshera ne Roiá꞉ner wahronhwentsísa;
né tsi nihoʼnikonhrowá꞉nen waható꞉kenhsteʼ tsi karonhiatátie.
20Raottokháhtshera takáhawe tsi kaniataratátie
tánon ioronhiarátie ohtsiʼkeraʼshón꞉ʼa entkáhawe naiokén꞉nore nonhwentsà꞉ke.
21Konién꞉ʼa saienawaʼkónhak ne sattokháhtshera tánon ne sakaʼeniónhtshera. Tóhsa nonwén꞉ton sá꞉ti. 22Ne entiesá꞉ion ne satónhnhets naionʼwesénhake tánon aiesatonhnhá꞉rake. 23Skén꞉nen tsi nienhense tánon iáh nonwén꞉ton thé꞉nen thaʼtaiesahniotá꞉ko. 24Iáh thaiesáhteronʼne ne nó꞉nen ensentá꞉fa, tánon ensaserentí꞉ioʼne tsi niwahsón꞉tes ensèn꞉taʼwe. 25Tóhsa tesatateʼnikonhrhá꞉ren ne thaʼontaiawénhstsi ne atkaronniáhtshera aontá꞉we tsi ní꞉ioht ne takaweratá꞉se ne ahotí꞉raʼne ne rotirihwanerenʼákskon. 26Roiá꞉ner enhiaiaʼtanónhstate. Iáh thahathón꞉tate ne iahshià꞉tenʼne tsi nón꞉we tewaterístaien.
27Nó꞉nen ensatehshennaién꞉taʼne sheiaʼtakéhnha nónhka teiotonhwentsóhon. 28Tóhsa nonwén꞉ton ne tetsanonhsané꞉ken natsro꞉ri “Satehrhá꞉rat tsik enióhrhenʼne,” tókaʼ sakwénion ne óksaʼk ahsheiaʼtakéhnha. 29Tóhsa oʼthé꞉nen serihwísa nahò꞉ten nahshekaré꞉wahte ne tesewanonhsané꞉ken né tsi iesaniahé꞉sen. 30Tóhsa ónhka tesewariʼwakéhnha akohrèn꞉shon ne iáh oʼthé꞉nen thiaʼteioríhonte aseʼkénh ní꞉se iáh nonwén꞉ton teiesakaronní꞉ʼon. 31Tóhsa sheiatenʼkéhfahs ne ionkweʼtáksenʼs tókaʼ ó꞉ni ahsateʼnikonhrísa tho náhshiere tsi nihontiéhrha. 32Ne tsi ne Roiá꞉ner ráhswenhs nónhka iáh tetiakorihwaié꞉ri nok ne tionkweʼtaié꞉ri kwáh otokén꞉ʼen tsi entehshakawéhtahkwe. 33Roiá꞉ner enhà꞉ren kahrewahtáhtshera tsi nón꞉we nihatì꞉teron ne rotirihwanerenʼákskon nok enhaiaʼtaté꞉rihste tsi ratì꞉teron ne tionkweʼtaié꞉ri 34Iáh oʼthé꞉nen tehshakoniahé꞉sen ne iená꞉ie nok shakorihwakweniénhstha nónhka iakoniténhton. 35Nón꞉kwe ionttokhahtsherí꞉io eniontatshennakará꞉tate nok nónhka iáh teionttókha nek nen né꞉ʼe enhontatshennáksaʼte.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.