Proverbs 2
2
Tewaterihwaʼserakwáhtha Attokháhtshera
1Konién꞉ʼa, satéweienhst tsi nahò꞉ten enkonrihónnien tánon tóhsa nonwén꞉ton sasaʼnikónhrhen tsi nahò꞉ten enkonhró꞉ri tsi nénhshiere. 2Satahónhsatat tsi nahò꞉ten wattokhahtsherí꞉io tánon sateʼnién꞉ten naiesaʼnikonhraièn꞉taʼne. 3Hen, tesahtshá꞉riht ne karihonnienníhtshera seʼné꞉ken ne kaʼnikonhraientáhtshera. 4Wé꞉so tsi sé꞉sak tsi shí꞉ken ní꞉ioht tókaʼ kahwistarà꞉ken tókaʼ ni ahsetshén꞉ri ne wahsehtánion atshoʼkowáhtshera. 5Tókaʼ tho nénhshiere, ensaterién꞉taraʼne nahò꞉ten kén꞉ton nahtshetshà꞉nike ne Roiá꞉ner, tánon ensaterihwahténtiaʼse nahtshientéhrhaʼne ne Rawenni꞉io. 6Ne tsi Roiá꞉ner thatká꞉waʼs attokháhtshera ráonha ó꞉ni thatká꞉waʼs karihonnienníhtshera tánon kaʼnikonhraientáhtshera. 7Ráonha thatká꞉waʼs kaiaʼtakehnháhtshera tánon enhshakonónhstate ne ronwarihwakweniénhstha tánon ne tiakorihwaié꞉ri. 8Enhshakonónhstate ne ónhka akó꞉ren enhshekwénienhste tánon entehshakóhnhe ne ónhka ronwarihwanorónhkhwa. 9Tókaʼ enhskwatahónhsatate, ensaterién꞉taraʼne nahò꞉ten tkaié꞉ri shaʼténhshiere tánon ne tkarihwaié꞉ri. Ensaterién꞉taraʼne tsi nénhshiere. 10Enhsattókhaʼne tánon karihonnienníhtshera entí꞉son ó꞉ni atonhnharáhtshera. 11Tsi ní꞉ioht tsi aiesaʼnikonhraién꞉taʼne né꞉ʼe ensanónhstate. 12Ensaiaʼtakéhnha ne tóhsa tho náhshiere tsi nahò꞉ten iáh tetkaié꞉ri. Ensaiaʼtohtáhrho tsi nón꞉we nihón꞉nes nón꞉kwe ne ratiritstonhnis tsi nahò꞉ten enhonnì꞉ron— 13né꞉ne ónhka iakohtkà꞉wen ne ioterihwakwaríhshion tho enhatiʼteròn꞉take tsi nón꞉we tetió꞉karas tánon karihwanerenʼèn꞉ke, 14nónhka ietshénrieʼs nateʼnikonhroiáhtshera tánon iakaonʼwéskwani nahò꞉ten iáh tetkariwaié꞉ri, iáh oʼthé꞉nen kiʼ tekariʼwáhsta, 15tánon iáh thaʼón꞉ton nahsheniáhese nónhka iáh tetionkweʼtaié꞉ri.
16Enhskwé꞉ni taseriwihiahse ne ión꞉kwe iorihwanerenʼákskon tsi ní꞉ioht tsi enwatá꞉ti kawennaweiénhon tsi ní꞉ioht tsi aontesaʼnikonhratihéntho, enwateʼnién꞉ten karihwanerenʼèn꞉ke niaʼiesaiaʼténhawe, 17roʼnikonhrhaʼtén꞉ni ne ró꞉ne, tánon tsoʼnikónhrhens tsi iorihwahnirá꞉ton shaʼóniake. 18Tókaʼ aonónhskon nienhénhse sathahitáhkhe ne kenhé꞉ion. Tókaʼ tho nienhénhse tentisáterahte tsi nón꞉we iehoné꞉non ne ronenhé꞉ion. 19Né꞉ʼe ónhka ienkonwanatahré꞉nahse, iáh kiʼ nonwén꞉ton thaʼtaontaiónhkete, iáh nonwén꞉ton tshiaonsá꞉rawe tsi nón꞉we tioháhonte ne ronnónhnhe. 20Ne ká꞉ti ahsatenonwará꞉ko ne tionkweʼtaié꞉ris nón꞉kwe tho ní꞉ioht tsi ahsónhnheke tsi ní꞉ioht ne rotirihwakwaríhshion. 21Nón꞉kwe ne rotirihwakwaríhshion tánon thotirihwaié꞉ri enhonnónhnheke tsi nón꞉we niionwentsá꞉te nitewanákere. 22Rawenni꞉io entehshakoiaʼtatihéntho ne ionkweʼtahétken tsi ionhwentsá꞉te tánon ne rotirihwanerenʼákskon tsi ní꞉ioht ne ahʼrhiotsionko né꞉ʼe kahontáksenʼs.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.