Proverbs 27
27
1Tóhsa só꞉tsi orihwí꞉io són꞉ni tsi kén꞉ʼen ahsé꞉sheke nenióhrhenʼne aseʼkénh iáh tesaterién꞉tare oh nieniá꞉wenʼne nón꞉wa tánon ne thó꞉ne.
2Sheríhon nakó꞉ren naiesahsennakará꞉tate—ók ó꞉ni ne iáh tesheienté꞉ri; tóhsa nonwén꞉ton í꞉se tesataterénhsaron.
3Tsi niiókste ne onén꞉ia tánon oʼnehsarónhkhwa iáh ne shá꞉ka té꞉ken, táhseren kaʼnikonhrharáhtshera tsi tkáhas ne teiotenonhwarorí꞉tonte.
4Kanaʼkhwénhsera iakokarón꞉nis tánon enkahwatsirahríhsi iáh kiʼ ne thaʼtáhseren ne ateʼkehfáhtsera.
5Ne sénha ioiánere nónhka ahtsherihwakwaríhshien tsi ní꞉ioht ne ahréhrheke iáh tetshenón꞉weʼs.
6Atenró꞉sera rón꞉nehre iáh oʼthé꞉nen teiotié꞉ren naiesaʼnikonhrakaré꞉wahte nok nó꞉nen ónhka iesáhswenhs entiesahnénhsa—seʼnikón꞉rarak ká꞉ti!
7Nó꞉nen sáhton, iáh tháhseke otsiʼnahkontahkwá꞉ne ótsikheta, nok nó꞉nen satonhkáriaʼks, iawerohátien ne iotskà꞉ra ne kákhwa teiotsikhè꞉tare tsi énhseke.
8Nónhka iáh tho té꞉tienʼs tsi nón꞉we tiè꞉teron, ne shá꞉ka ne otsítenha#27.8 Enwá꞉ton nahsì꞉ron tsítha tókaʼ ó꞉ni otsiʼtén꞉ʼa. iáh tho té꞉wes tsi nón꞉we tiottsiʼnhahkón꞉ni.
9Iontiaʼtakonʼonhstáhkhwa tánon wenhserákonʼs kén꞉ie entkáhawe enhsatonhnhá꞉ren, ók ne kaʼnikonhrharáhtshera enkaríhsi tsi skén꞉nen sanonhtónnions.
10Tóhsa sheiaʼtaʼnikónhrhen ne sewatenroʼshón꞉ʼa ó꞉ni ne iaʼníha ronatenroʼshón꞉ʼa. Tókaʼ oʼthé꞉nen tesaʼnikónhrhare, tóhsa sheriʼwanón꞉tons nónhka tsatátenonhkwe aiesaiaʼtakéhnha; né꞉ne tetsanonhsané꞉ken sénha wé꞉so eniesaiaʼtakéhnha tsi ní꞉ioht ne sewatátenonhkwe ne í꞉non thón꞉nes.
11Tesaʼnikonhrátheʼk, konién꞉ʼa, tánon enkatonhnhá꞉ren; enwakatateʼweienentá꞉ʼon takerihwaʼserá꞉ko nónhka naionkerihwáhrhoʼse.
12Nón꞉kwe ionttokhahtsherí꞉io eniónttoke nó꞉nen tá꞉we ne kaʼnikonhrharáhtshera tánon eniontatiaʼtohtáhrho, nónhka iáh thaionnonhtonnión꞉ko entierihó꞉kaʼte tánon ohnaʼkèn꞉kha entsontateriʼwáhsten.
13Nón꞉kwe ne iáh tshiaʼtekaié꞉ri thaʼtehoʼnikonhráthe tókaʼ enhotatshennáhrhase ónhka iáh tehoienté꞉ri tsi rotká꞉rote, tehotèn꞉tshon kiʼ ne akwé꞉kon enhotkaraièn꞉taʼne nahò꞉ten ró꞉ien.
14Shaʼté꞉ioht niaʼté꞉kon ahsheiénhahse sewatenroʼshón꞉ʼa tsi ní꞉ioht ne ohrhonʼkéhstsi iorakaré꞉ni taiesahén꞉rehte tsi ahsheiehtánion.
15Ró꞉ne ne iakotewennaientón꞉tskon ne shá꞉ka ne ohné꞉kanos watshá꞉rhonhs, watshá꞉rhonhs, watshá꞉rhonhs, nó꞉nen iokennó꞉ron. 16Oh nénhshiere nahshéhsweke? Ó꞉nen kenh sateʼnién꞉ten táhstahste ne ówera tókaʼ ó꞉ni ahsateʼnién꞉ten ahshié꞉na sewahtsà꞉na kén꞉ie?
17Nón꞉kwe teiontaterihonnién꞉nis ne shá꞉ka ne karístatsi kahioʼthí꞉ions ne karístatsi.
18Tesahrhó꞉ton kí꞉ken tsionʼnionwarontonhakowa kehrite tanon enshahianenhtane nashaiake ne tsionʼnionwarontakowa. #27.18 Enwá꞉ton nahsì꞉ron iokwí꞉rote tókaʼ ó꞉ni karón꞉tote. Ratihnhá꞉tshera tehshakotíhshnie ne ratiiaʼtakweʼní꞉io enhonwatikwénienhsteʼ.
19Í꞉se satatkónhsakenhs nohnekà꞉ke tánon sonhà꞉aʼk enhsatátken tsi tenhsatatiaʼtó꞉rehte ne serià꞉ne.
20Nón꞉kwe nahò꞉ten ionhská꞉neks, ne shá꞉ka taié꞉ren tsi nón꞉we tionhonsaien ne kenhé꞉ion—tiótkon ne shé꞉kon ionáktote.
21Tsi iotékha ne ó꞉tsire enwahthró꞉ri tókaʼ kenh aóskon ohwistanó꞉ron tókaʼ niʼ kenh kahwistarà꞉ken. Ne ká꞉ti shá꞉ka nón꞉kwe enwathró꞉ri tsi naiakohsenniióhake.
22Ók ó꞉ni tókaʼ wahonwanonwenhserário tsi niió꞉re ne kenheiá꞉tne, ne tehonatenonhwarorí꞉tonte shé꞉kon kiʼ iáh thaʼtahsheté꞉ni tsi tehonatenonhwarorí꞉tonte.
23Tehshéhshnieʼn ne satshenenʼó꞉kon, teiotinaʼkarontón꞉ʼa tánon ne tiohnhónskwaron tsi nisakwénion, 24aseʼkénh ahtshoʼkowáhtshera iáh thaʼtekahwiʼshátsteʼ, iáh ó꞉ni tsi kanakerahseraké꞉ron. 25Enhsenekerí꞉iaʼke thó꞉ne enhshathóntiaʼke tsi tionontatsnénhton tsi nikarí꞉wes ne ó꞉ia tsonatehiaróntie ne awennékeri. 26Enwá꞉ton enhsatakweʼnion꞉ni ne énhsatste karisé teiotinaʼkarontón꞉ʼa tkontká꞉waʼs, tánon enhshonhwentsahní꞉non ne énhsatste ohwísta tsi enhsatenhní꞉non ne satshenenʼó꞉kon kontiiaʼtákerahs. 27Sók ne kontiiaʼtákerahs ionatatén꞉ron entié꞉son onòn꞉ta ní꞉se tánon sahwá꞉tsire ó꞉ni ne konnón꞉kwe iesaióʼtenhse.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.