Proverbs 26
26
1Thahserénhsaron ónhka nón꞉kwe teiakotenonhwarorí꞉tonte iáh teió꞉nakte, ne shá꞉ka ne táhseren óniehte akenhnhà꞉ke tókaʼ ó꞉ni aiokèn꞉nore tsi niieienthókwas.
2Aiesakenhrenʼserón꞉ni iáh thaiesakaré꞉wahte tsik tókaʼ tesatèn꞉tshon. Tsi ní꞉ioht ne otsítenha#26.2 Enwá꞉ton nahsì꞉ron tsítha tókaʼ ó꞉ni otsiʼtén꞉ʼa. kotitse tánon iáh thaʼtakontà꞉senhte.
3Ó꞉nenk tsi enhsenonʼwáreʼke ne akohsá꞉tens, ó꞉nenk tsi enhskonshotárhroke ne tewahónhtes, tánon ó꞉nenk tsi entshenonhwenhserário ne tehotenonhwarorí꞉tonte.
4Tókaʼ tenhserihwaʼserá꞉ko nahò꞉ten ne teiotenonhwarorí꞉tonte í꞉se kiʼ ó꞉ni saʼteseninonhwaró꞉ri ne ónhka waʼesariʼwahnón꞉tonhse.
5Tahserihwaʼserá꞉ko nahò꞉ten ne teiotenonhwarorí꞉tonte, sók ne ónhka wahariʼwanón꞉ton, enháttoke tsi iáh kwáh thaʼtehoʼnikonhráthe tsi ní꞉ioht tsi ranonhtónnions.
6Tókaʼ entsheríhon ne tehotenonhwarorí꞉tonte naharihwakaré꞉ni ne orihwaʼshón꞉ʼa, shaʼté꞉ioht ne àhshiaʼke sahsiʼtà꞉ke; seriʼwanóntha ne tahsaʼnikonhrhá꞉ren.
7Ne tehotenonhwarorí꞉tonte iáh tshiaʼteioríhonte ne á꞉ratsteʼ karihonnienníhtshera, ne aontaionteʼnièn꞉tenhste nónhka rahsináksen iáh té꞉reʼs.
8Tasherènhsaron nónhka iáh tehotiʼnikonhraientátskon iáh tshiaʼteioríhonte, ne táhseren ahswànerenke onén꞉ia sehsnonhsà꞉ke iensá꞉ti tánon iáh káneka tshiá꞉we.
9Ne tehotenonhwarorí꞉tonte í꞉rehre wattokhahtsherí꞉io tsi nahò꞉ten tahawennínekenʼne sehiahrahkwén꞉ni tsi kwáh né꞉ne rohné꞉ka rateʼniéntha ohí꞉kta ahróhtshi rasnonhsà꞉ke.
10Raténhnhaʼs ne tsik ónhkaʼk enhshakóhnhaʼne ne tehotenonhwarorí꞉tonte akwé꞉kon enhshakokarón꞉ni.
11Ne tehotenonhwarorí꞉tonte tekeníhaton tenhaʼnióhskenʼne ne shá꞉ka ne è꞉rhar eʼthó niaʼonsá꞉we én꞉wake tsi nón꞉we tiotstí꞉kon.
12Nónhka ne kwáh tehotenonhwarorí꞉tonte ráonha sénha ioiánere raorihwà꞉ke tsi ní꞉ioht ne ónhka rón꞉nehre ronttókha tánon iáh tho té꞉ioht.
13Oh nontié꞉ren ne ronnentóhrha iáh nonwén꞉ton tshiehatiiá꞉kenʼs ne raotinónhskon? Nahò꞉ten ratitshá꞉nis? Kèn꞉reʼks kenh?
14Ronnentóhrha kwáh nek ne enhsontkahrhátho kanaktà꞉ke. Thok niió꞉re iehatikarenhrákwas tsi kahnhoká꞉ronte tenwatehnhohóntieʼs tánon ensewatehnhó꞉ton.
15Ótiaʼke nón꞉kwe só꞉tsi ronnentóhrha nahontátenonte.
16Nónhka rentóhrha í꞉rehre ráonha sénha tehoʼnikonhráthe tsi ní꞉ioht ne tsá꞉ta nihá꞉ti naontahónhtkaʼwe tsi nihotiʼnikonhrò꞉tenʼs ne tkarihwaié꞉ri.
17Tókaʼ iahsatatiaʼtó꞉roke nónhka tehonaterihotáhrhon ne iáh oʼthé꞉nen tesarihwà꞉ke ne shá꞉ka ne ahsenatókten tánon è꞉rhar tahtshahontatirón꞉ten.
18-19Nónhka nakó꞉ren tahsherihwaierónnion tánon ahsì꞉ron, “Nek ne wakatswà꞉ton,” ne shá꞉ka nónhka tehanonhwahrawénrie iontswaʼtáhkhwa rotatonniaʼtén꞉ni ne iakohnonhwarhiakons.
20Tókaʼ iáh teká꞉ienhtaien enwá꞉swaʼ tsi iotékha; tókaʼ iáh thaʼtahserihwenhá꞉wihte tenká꞉taʼne ne tahsaterihwakén꞉ni.
21Ohswèn꞉ta katsí꞉rakatste, ó꞉iente enhshientóntho eniotékhake kiʼ tánon ó꞉ni ne ronnéhsaks ne tahonterihotáhrho ratinón꞉weʼs aiónhnheke ne taionterihwakén꞉ni.
22Iawékon ne taierihwenhá꞉wihte! Kwáh ionkwé꞉kas ne iaietewahnéhkwane!
23Ne iáh teiorihwí꞉io tsi sáhthare, wahséhtha tsi nahò꞉ten kwáh tokén꞉ʼen sanonhtónnions. Ne shá꞉ka aontahsateʼnièn꞉tenhste ne kwáh tioiánere tsi tekastarathé꞉ton kátshe ionniá꞉ton ne iáh tekanawaʼtstí꞉io.
24Nónhka teiekonhsotáhkwen ionséhtha atswènhsera, karenhsarónhtshera owennaʼshón꞉ʼa énhontste. 25Tókaʼ nón꞉wa ioiánere tsi sathón꞉te, tóhsa kiʼ tatshéhtahk, ne tsi rawerià꞉ne titkáhere ne atswènhsera. 26Enwá꞉ton enhatkonwaró꞉roke tsi ráhtswens, akwé꞉kon kiʼ ienieièn꞉tereʼne tsi wahétken tsi nihatiéhrha.
27Nón꞉kwe shakonaterístaiens ronnónha kiʼ enhshonatkarenhrákwaʼse. Nón꞉kwe nónhka enthontáhsawen tenhothitarenhne ronnónha ne tenhshotiiaʼtó꞉rarake.
28Ó꞉nenk tsi enhshehswénhsheke ónhka í꞉sehre atskaré꞉wahte tsi sanowenhtánions. Owennaʼshón꞉ʼa áhsatste ne iáh tho té꞉ioht ne tkáhas naiakokarón꞉ni.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.