Proverbs 25
25
Shé꞉kon Ne Solomon Raottokáhtshera
1Shé꞉kon á꞉re ne Solomon raottokháhtshera tehotihnaʼnetáhkwen ne ratihiá꞉tonhskwe tsi nón꞉we thén꞉teron Ronontí꞉io Hezekiah ne Judah.
2Ehtshitewarihwakweniénhstha ne Rawenni꞉io tsi nahò꞉ten shonkwarihwahsehtén꞉ni; ietirihwakweniénhsthat ne rotinontiió꞉shon tsi nahò꞉ten tehatirihwathé꞉tha.
3Iáh nonwén꞉ton tesaterién꞉tare nahò꞉ten ranonhtónnions ne ronontí꞉io iáh oniʼ tshiaietewáhewe nahò꞉ten ranonhtónnions, ne taié꞉ren tsi nitiótte ne karonhià꞉ke tánon tsi niiohnó꞉teʼs ne kaniataraʼkehkó꞉wa.
4É꞉ren shá꞉wit nahò꞉ten iáh aóskon té꞉ken ne kahwistarà꞉ken, sók ne rahwistón꞉ni ióhskats nahò꞉ten enháhsa. 5É꞉ren sheiaʼtenhá꞉wiht ne iáh tethotirihwaié꞉ri ne ronontí꞉io ronwaʼnikonhrá꞉wis; sók ne raokoráhtshera enweʼnéhake tsi ioterihwakwaríhshion.
6Nó꞉nen raohén꞉ton tènhstaʼne ne ronontí꞉io, tóhsa sateʼnién꞉ten è꞉neken ahsatatón꞉ni tánon ahséhrheke kenʼ tshennowá꞉nen. 7Ne sénha ioiánere naesariʼwanón꞉tonhse sénha è꞉neken ahsaterihón꞉ten tsi ní꞉ioht ne aiesahró꞉ri akó꞉ren aontahshé꞉ion ne sanaktà꞉ke ne sénha è꞉neken tiakótte.
8Tóhsa só꞉tsi tesasteríhen kaianerenhserà꞉ke niáhse tsi nahò꞉ten wahsatkáhtho. Oh nénhshiere tókaʼ akó꞉ren enierihwahní꞉rate tsi nahò꞉ten í꞉sen iáh tó꞉kenhske té꞉ken?
9Tókaʼ í꞉se tánon tetsanonhsané꞉ken tentsatirihwatíha senirihwahserón꞉ni tsi naʼtetsátere tánon tóhsa oʼthé꞉nen senotáhsi nahò꞉ten kariʼwahséhton. 10Ne ká꞉ti tiorí꞉wa akwé꞉kon eniakotó꞉kenʼse tsi iáh thahskwé꞉ni nahseriʼwáhsehte, tánon iáh nonwén꞉ton tshiaonteríhsi ne satehénhsera.
11Aionteʼnikonhrísa ne kwáh ieká꞉ien ne shá꞉ka ne thé꞉nen ohwistanó꞉ron tánon kahwistarà꞉ken ionniá꞉ton.
12Nónhka aiesahronká꞉ten ne orihwí꞉io tsi iakoterién꞉tare tánon nónhka iakotateweienentá꞉ʼon aiontahónhsatate, ne sénha shaʼtékena tsi ní꞉ioht ne ohwistanó꞉ron anisnónhsawi tánon ne kwáh tiohskatsténion ohwistanoronʼshón꞉ʼa.
13Nónhka tsheniahé꞉sen ne rarihwakarénieʼs wé꞉so shaʼtékena, rawerienʼtí꞉ios ne iehotenniéhton, ne taié꞉ren tsi ní꞉ioht ne kwáh iohné꞉kano nó꞉nen kwáh tioʼtarí꞉hen tsi nikahá꞉wi ieienthókwas.
14Nón꞉kwe ne oʼthé꞉nen enhatihrhá꞉ratste tánon iáh tho tehatiiéhrha, ne shá꞉ka ne iohtshatarónnion tánon ówera ne iáh tetkáhas naiokén꞉nore.
15Tókaʼ saʼnikonhkátste nahò꞉ten ahsheʼnikón꞉ron ne ierihwaʼshátste, enwá꞉ton tenhsheʼnikonhraté꞉ni ók ó꞉ni ne ratikorahserowá꞉nenʼs.
16Tóhsa ísiʼ non nènhseke ne otsiʼnahkontahkwá꞉ne ótsikheta naʼteiotonwentsó꞉hon; tókaʼ só꞉tsi wé꞉so énhseke entehsátstike. 17Tóhsa só꞉tsi iotká꞉te shenatahré꞉nahs ne tesewanonhsané꞉ken; tókaʼ nón꞉wa eniesaterihonkó꞉ten tánon tho néntewe eniesáhswen.
18Tóka iáh tetkariwaié꞉ri nahò꞉ten aiesarihwáhrho, ne shá꞉ka ne aʼshareʼkó꞉wa, kanà꞉kare, tókaʼ ó꞉ni kaièn꞉kwire ne kwáh tiohioʼthí꞉ie áhonste aiesàriohte.
19Nónhka ahshehrhá꞉reke ne iáh teiakorihwató꞉ken nó꞉nen oʼthé꞉nen tenwatierónnion ne shá꞉ka ne ahsateʼnién꞉ten tahsatská꞉hon tókaʼ ioʼnhétska ne sanawì꞉ra, tókaʼ ó꞉ni ahsahtentión꞉ko tóka tesarahsiʼtià꞉kon.
20Ahsheiaterennóthahse nónhka iakoʼnikonhrèn꞉ton ne táhseren ahseríhsi akotsherónnia nó꞉nen iawenhniserá꞉no tókaʼ ó꞉ni tiohió꞉tsis ahseránie tsi nón꞉we iáh tetsóhnare.
21Tókaʼ ne iesáhswenhs rontonhkáriaʼks, shé꞉nonht; tókaʼ rotiniaʼtáthenhs, shehné꞉kanonʼt. 22Enhsheiatéhaʼte tánon Roiá꞉ner tenhiarihwaʼserákwaʼse.
23Taierihwenhá꞉wihte nek tkáhas kanaʼkhwénhsera ne taié꞉ren tsi oʼthorè꞉ke ówera tewatenniéhtha naiokén꞉nore.
24Ne sénha ioiánere tsi karonhkweʼnáhere ahsiʼteròn꞉take tsi ní꞉ioht ne skátne aieseniʼteròn꞉take ne seniniá꞉kon ne iakotewennaientón꞉tskon.
25Kháre ó꞉nen wahserihwá꞉ronke karihwí꞉ioʼs í꞉non tionhwentsà꞉te nontá꞉we ne shá꞉ka nahshnekí꞉ra iohné꞉kano nó꞉nen kwáh saniaʼtáthenhs.
26Tókaʼ ne tiakorihwaié꞉ri iaiontateʼnikonhrénhawe ne ionkweʼtahétken ne sehiahrahkwén꞉nis tsi kahnekáksen tsi nón꞉we tiohné꞉kote tókaʼ ó꞉ni kahnekaksá꞉ton.
27Só꞉tsi wé꞉so ne otsiʼnahkontahkwá꞉ne oʼtsikheta iáh teioiánere ne sarihwà꞉ke. Ók ó꞉ni tókaʼ ahsateʼnién꞉ten ne wé꞉so taiesarénhsaron, iáh teioiánere.
28Tókaʼ iáh thahskwé꞉ni ne sanaʼkhwénhsera naontahsanón꞉tonʼse, iáh ká꞉ti tesahshatstenhserá꞉ien, ne shá꞉ka tókaʼ tsi tkaná꞉taien ne iáh thatetkentstén꞉rote tekahnhohóntion watié꞉sen ne ahatinataká꞉ri.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.