Proverbs 1
1
Shaʼtékena Ne Karihonnienníhtshera
1Ne kí꞉ken shaʼtékena ionkwarihonnién꞉nis ne Solomon, thotá꞉ti. Ronontí꞉io ne Israel, Táwit roién꞉ʼa.
2Kí꞉ken karihonnienníhtshera ensaiaʼtakéhnha nahshientéhrhaʼne ne attokháhtshera tánon kwáh tokén꞉ʼen aiesaʼnikonhraièn꞉taʼne tsi nahò꞉ten kén꞉ton. 3Ensarihónnien tsi ní꞉ioht tsi ahsónhnheke ne tkaié꞉ri, aontesarihwaié꞉rike tánon aiesarihwakwarihshiónhake. 4Enkakwé꞉ni aiakorihónnion nónhka iáh teiakoterién꞉tare teniakohswathé꞉ten tánon eniakorihónnien ne kenʼnithotiién꞉sa#1.4,7 Title Enwá꞉ton nahsì꞉ron kenʼnithotiién꞉sa tókaʼ ó꞉ni kenʼnithotiión꞉sa. nahotiʼnikonhrowanénhake. 5Kí꞉ken karihonnienníhtshera enká꞉nahne attokháhtshera sénha enhotiʼnikonhrowáhnha ne rotiʼnikonhrowá꞉nenʼs enhshakotiʼnikòn꞉ron ne ronateweiénhston. 6Ne ká꞉ti nahotiʼnikonhraién꞉taʼne tsi nahò꞉ten wahsehtánion kén꞉ton ne karihonnienníhtshera nahonnéhsake tsi nahò꞉ten enhatirihwà꞉ren ne wentó꞉reʼs ne rotiʼnikonhrowá꞉nenʼs.
Iakorihonnién꞉nis Kenʼnithotiién꞉sa
7Tókaʼ íhsehre aiesaʼnikonhrowanénhake teiotonhwentsóhon atskweniénhsthake ne Roiá꞉ner. Kí꞉ken ronátiaʼke tehonatenonhwarorí꞉tonte tánon iáh tehatikweniénhstha ne raottokháhtshera tánon iáh tehonthón꞉tats nahontéweienhste.
8Konién꞉ʼa satahónhsatat tsi nahò꞉ten eniesahró꞉ri ne iaʼníha tánon saʼnisténha. 9Tsi ká꞉ti nahò꞉ten eniesarihónnien ne sénha ioiánere tsi nenhsonkweʼtoʼténhake tsi shí꞉ken ní꞉ioht ne tiokʼnitioiánere teiontenonhwarahnhákstha tókaʼ niʼ ionnihtiákstha sénha watkahthohtsherí꞉io naiesá꞉ken.
10Konién꞉ʼa, nó꞉nen ne rotirihwanerenʼákskon enhonteʼnién꞉ten naiesaʼnikonhrotá꞉ko tóhsa sathón꞉tat. 11Tókaʼ shí꞉ken ahonní꞉ron, “Kenh nontá꞉se; tánon tewé꞉sak ónhka aiethinonwarhiakhon! Káton eniethiié꞉na ne iáh oʼthé꞉nen tehotirì꞉waien kwáh nek ne tsi niionʼwé꞉sen! 12Tókaʼ ronnónhnhe tánon ronataʼkarí꞉te nó꞉nen eniethiiaʼtatshén꞉ri, akwé꞉kon enhonenhé꞉ion nó꞉nen eniethiiatstáhsi! 13Niaʼté꞉kon entewatshén꞉ri ne kakwahtshéhsera tánon tentitewá꞉rahte nonkwanonhskónhshon nahoʼtén꞉shon entewanenhskohá꞉ton! 14Káts takwanenhraiéhsten tánon akwé꞉kon tentewaiá꞉khon tsi nahò꞉ten entewanénhsko.” 15Konién꞉ʼa, tóhsa ísewe kí꞉ken niionkweʼtò꞉tenʼs. Satatiaʼtohtáhrho. 16Iáh thahatikwé꞉ni nahontehrhá꞉rate nahò꞉ten ahontéronʼonhte. Tió꞉konteʼ ronatateweienentá꞉on nahshakotinonhwarhiakon. 17Iáh oʼthé꞉nen tekariʼwáhsta tahsaréniaʼte á꞉are ne tsítenhas#1.17 Enwá꞉ton nahsì꞉ron tsítha tókaʼ ó꞉ni otsiʼtén꞉ʼa. ahshié꞉na tókaʼ saʼnikón꞉rare. 18Ne ká꞉ti shá꞉ka né꞉ʼe niionkweʼtò꞉tenʼs nahonterístaien ronnónha enhotiié꞉na tánon tho nón꞉we nenhonníheie. 19Ne ónhka ienénhskwas, kenhé꞉ion ieniakoiaʼténhawe—tho kiʼ niiá꞉wenʼs nónhka ionteriiohseraʼnón꞉we.
Attokháhtshera Tiakó꞉nonks
20Satahónhsatat tsi iontkehrontáhkhwa tánon kanataʼkéhshon tisén꞉nonks attokháhtshera, 21iorakaré꞉ni tsi tisén꞉nonks tsi kaná꞉taien tioteʼenhrakahrón꞉ton tsi nón꞉we nón꞉kwe iontiaʼtarò꞉roks:
22“Tsón꞉kwe ne tesewatenonhwarorí꞉tonte! To nikarí꞉wes iáh thaiesewaʼnikonhrá꞉take? To nikarí꞉wes entsonʼweskwenní꞉heke thaietshié꞉ron ne kaweientéhtshera, iáh kenh nonwén꞉ton thaiesewaweientéhtaʼne? 23Sewatahónhsatat nó꞉nen enkwattéhten; entkwá꞉ion ne karihwí꞉io, entkáhtkaʼwe tsi ní꞉kon wakaterién꞉tare. 24Tkwanaʼtónnions, kwahonkará꞉wis naontésewe nok iáh kiʼ teskwatahónhsate. Iáh thaʼteskerihwahsnié꞉se. 25Iáh tesarihwaié꞉na nahò꞉ten waʼkonrihónnien iáh ni tesathontá꞉ton ne akonhró꞉ri nahò꞉ten iáh tetkaié꞉ri tsi nihsatiéhrha. 26Nó꞉nen ká꞉ti ne oʼthé꞉nen tensaterihwatierónnionʼse, enkonhsté꞉rihste, thenkonié꞉ron nó꞉nen waʼtisáhkwaʼte ne iótteronʼs— 27nó꞉nen tensáhkwaʼte tahsaʼnikonhrhá꞉ren né shá꞉ka tsi ní꞉ioht ne tenkaweratá꞉se ne kaʼnikonhrharáhtshera, saronhiá꞉ken tánon saʼnikonhrèn꞉ton. 28Thó꞉ne ó꞉nen entehskená꞉ton attokháhtshera, iáh kiʼ thaʼtakerihwaʼserá꞉ko. Tsik nón꞉we enhstiaʼtí꞉sake iáh kiʼ thahstiaʼtatshén꞉ri. 29Iáh nonwén꞉ton tesaniaheshá꞉ʼon ne karihonnienníhtshera tánon iáh nonwén꞉ton tesathontá꞉ton ne ahtshewèn꞉narahkwe ne Roiá꞉ner. 30Iáh nonwén꞉ton thaʼtesatonhontsó꞉ni nahò꞉ten akoniatenʼnikón꞉ron tánon iáh tesatahonhsatá꞉ton tsi waʼkonhró꞉ri iáh tetkaié꞉ri tsi nihsatiéhrha. 31Tho ká꞉ti enhshié꞉na tsi naʼtesatén꞉tshon tánon tsi nihsatieránion né꞉ʼe ensanonhwaktá꞉ten. 32Ónhka ne iáh tshiekaié꞉ri tsi nihonaterién꞉tare enhonníheie né tsi iáh thahatiié꞉na ne attokháhtshera. Nón꞉kwe ne iáh thaʼteiakoʼnikonhráthe enhontkarón꞉ni né tsi iáh oʼthé꞉nen thaʼtehonaʼnikónhrhare. 33Ónhka ká꞉ti enhakwatahónhsatate enhoién꞉take ne enhoiaʼtahníhrha. Skén꞉nen tsi enhanonhtonniónheke iáh oʼthé꞉nen thaʼhatshahníhseke.”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.