Proverbs 12
12
1Nónhka ienorónhkhwa ne karihonnienníhtshera eniontshennón꞉ni nahshehró꞉ri nahò꞉ten iáh tethotirihwaierí꞉ton. Iáh kiʼ tewattokhahtsherí꞉io nónhka iéhswenhs naiontaterihwakwaríhshien.
2 Roiá꞉ner rawerienʼtí꞉ios nón꞉kwe tiakorihwaié꞉ri, enhshakohré꞉wahte nónhka ionteʼnikonhrón꞉nis ne karihwáksen.
3Karihwanerenʼáktsera iáh teiakó꞉wis skén꞉nen aionnonhtónnionhwe, nok ne thotirihwaié꞉ri énskaʼk ne tsi nihotirihwahní꞉ron.
4Rón꞉kwe ronià꞉kon ne tiakorihwaié꞉ri né꞉ʼe raotonhnharáhtshera tánon raonaiéhsera; nok ne rón꞉kwe ronià꞉kon ne thonwá꞉wis atehénhsera kwáh ne shá꞉ka ne takwaʼáhsen raohstièn꞉takon aʼónʼtien.
5Nón꞉kwe iakorihwakwaríhshion ioiánere tsi teniesarihwáhshnieʼse; nónhka iáh tetiakorihwaié꞉ri nek ne aiesaʼnikonhrhá꞉ten.
6Raotiwén꞉na ne rotirihwanerenʼákskon iakohnonhwarhiakons, nok ne raotiwén꞉na ne thotirihwaié꞉ri eniakoʼniá꞉kenhte nónhka iontatteronhkwén꞉nis.
7Rotirihwanerenʼákskon ne ienhotiià꞉tenhte tánon iáh oʼthé꞉nen thahonthwatsirón꞉ni, nok ne thotirihwaié꞉ri raotihwá꞉tsire enhonnónhnheke.
8Tókaʼ tesaʼnikonhráthe, eniesahsennakará꞉tate; tókaʼ iáh tesateʼnikonhrattókha, nón꞉kwe ehtà꞉ke eniehsón꞉ni.
9Ne sénha ioiánere shaʼtetisewátte skátne aiesewaióʼten naietsónhnheke tsi ní꞉ioht ne ahsatathará꞉tate nok ahsatonhkáriaʼke.
10Tionkweʼtaié꞉ri tehshakotíhshnie raotitshenenʼó꞉kon, nok ne rotirihwanerenʼákskon shakotiiesáhtha nen né꞉ʼe.
11Raiénthohs ne rotsteʼniá꞉ron wé꞉so kiʼ enhoién꞉take nahò꞉ten à꞉rake nok ne tehotenonhwarorí꞉tonte ratenhniserakaiónhstha iáh oʼthé꞉nen tekariʼwáhsta tsi nihatiéhrha.
12Akwé꞉kon nón꞉kwe ne iáh tethotirihwaié꞉ri nek tehonatonhwentsó꞉ni ahatitshén꞉ri tsi nahò꞉ten karihwáksen kenʼniahatí꞉iere, nok ne tionkweʼtaié꞉ri tiótkon ne rotirihwahní꞉ron.
13Ne iáh tethotirihwaié꞉ri ne ienhotiià꞉tenhte ne raotiwén꞉na, nok ne rotirihwakwaríhshion iáh nen né꞉ʼe thaʼtahonʼnikonhrhá꞉ren.
14Ne tkaiatawenní꞉io tsi nahò꞉ten tensaterihwaʼserákwahse tsi nahò꞉ten enhsì꞉ron tánon tsi nenhsátiere, ne enhshié꞉na tsi kiʼ nahò꞉ten tesatèn꞉tshon.
15Nón꞉kwe ne iáh thaʼtehotiʼnikonhráhthe tiótkon rón꞉nehre thatiié꞉rits tsi nihontiéhrha. Ne tehotiʼnikonhráthe enhontahónhsatate nahò꞉ten ahonwatiʼnikòn꞉ron.
16Nó꞉nen tehotenonhwarorí꞉tonte enhoná꞉khwen, óksaʼk wé꞉ne enhrón꞉ni. Nón꞉kwe ne teiakoʼnikonhráthe iáh wé꞉ne thahonnón꞉ni nahonwatiʼnikonhrakaré꞉wahte.
17Nó꞉nen tkaié꞉ri tsi nahò꞉ten entehsatá꞉ti, aterihwakwarihshiónhtshera kiʼ enwatkwé꞉ni nok ne onó꞉wen nek né꞉ʼe tkáhas ne iáh teioterihwakwaríhshion.
18Iáh tewanonhtonnionhtsherí꞉io nowennaʼshón꞉ʼa tho ni tsi ensakaré꞉wahte tsi ní꞉ioht ne aʼshareʼkó꞉wa, sók ne tkawennaié꞉ris enwá꞉ton ensátsenʼte.
19Onó꞉wen kenʼniionhnhésha, nok ne tkarihwaié꞉ri enionhnheʼón꞉we nen né꞉ʼe.
20Nónhka ronteʼnikonhrón꞉nis ne karihwahétken kwáh í꞉ken tsi enshontateriʼwáhtsten, nónhka iakoióʼte ne ioiánere enietshén꞉ri atonhnharáhtshera.
21Iáh oʼthé꞉nen thaiakoiá꞉tawen ne wahétken ne tiakorihwaié꞉ri, nok ne iáh tetionkweʼtaié꞉ri nek ne enhatiié꞉na ne tahonʼnikonhrhá꞉ren.
22 Roiá꞉ner shakotahkwáhswenhs ne iakonó꞉wen, nok rawerienʼtí꞉ios nónhka tho nenié꞉iere tsi nahò꞉ten iakorihwíson.
23Nón꞉kwe ne teiakoʼnikonhráthe thaʼteniontó꞉tate tsi nahò꞉ten iakoterién꞉tare, nok ne iáh thaʼtehotiʼnikonhráthe enhatirihó꞉wanahte tsi iáh tekarihonnién꞉ni.
24Ioioʼtenhserahní꞉ron entí꞉son kaʼshatsténhsera; awentoráhsera entkáhawe naiesatenaskonhniate
25Kaʼnikonhrharáhtshera ensanénhsko ne atonhnharáhtshera, nok ne kawenní꞉ioʼs ensaʼnikonhrakétsko.
26Nónhka thorihwaié꞉ri enhoianènhawe ne ronatén꞉ro, nok né꞉ne ronathahitáhkhe iáh tethotirihwaié꞉ri enhontiaʼtáhton.
27Tókaʼ sentóhrha, iáh nonwén꞉ton tshiashié꞉na nahò꞉ten sesakonhátie, tókaʼ saioʼtén꞉tskon#12.27 Enwá꞉ton nahsì꞉ron saioʼtén꞉tskon tókaʼ ó꞉ni satshá꞉ni. enhshié꞉na kiʼ ne ahtshoʼkowáhtshera.
28Aterihwakwarihshiónhtshera thoʼniiothahí꞉non ne ionhnheʼón꞉we; ók ne karihwanéren tho ne nieʼiothahí꞉non ne kenhé꞉ion.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.