Numbers 30
30
Tsi Niʼkaianerenhseró꞉ten Ne Thènen Ahionráratsʼte
1Ne Mahís tashaʼkáwen ne tehioterihwasónhteres karihonhnienhnítsheras ne sakotihenténhse tsi ratitiókwaiens NÍsraerʼró꞉nonke. 2Nónen ne rónhkwe waʼharáratsʼte ne thènen ahontahá꞉wenh ne Roiá꞉ner khès ne waharihwanírate né knahótenk ahateweiénton, iáh kíʼ tehiówenk ne tahonsahá꞉hiake tsi nihorarátston, ók ónenk tsi enhateniénhten orihwakwékon thóh nenháiere tsi kíʼ nihá꞉wen.
3Nó꞉nen ne kén nitsiohiónha shé꞉kon roʼní꞉ha rahonónskon kénteron honráratsʼte ne thènen ahontahá꞉wenh ne Roiá꞉ner khès honráratsʼte ne thènen ahonteweiénton, 4ónenk kíʼ tsi orihwakwékon thóh nenhkáiere tsi kíʼ nihiorarátsʼton khès roʼní꞉ha waharihwáiake nónen enharihwáronke. 5Ók tó꞉ka roʼní꞉ha waháriste nakarihwaiérite tsi nihiorarátsʼton nó꞉nen sahothóntene, iáh kíʼ thaʼtehiotonhontsóhon nakarihwaiérite. Né Roiá꞉ner enshanikónhrenhse, tsioríhwa tsi roʼní꞉ha iáh tehothontáton ne iatahiokʼten.
6Tó꞉ka shí꞉ken ne kén nitsohiónha honráratsʼte, tó꞉ka thonʼnikonhrónhni khès ne iáh tshiatehiohiatoréton, khès honráratste ne thènen ahonteweiénton, tánon ethóne wahó꞉niake, 7ónenk kíʼ tsi orihwakwékon enwateniénten nakarihwaiérite tsi nihiorarátsʼton nék tó꞉ka kén ne tení꞉teron aharihwásten nónen sahothóntene. 8Ók tó꞉ka ne tení꞉teron enhá꞉nese nakarihwaiérite ne iorarátsʼton nónen saharihwáronhke, iáh kíʼ tehioterihwaiénhni niatahiókʼten. Ne Roiá꞉ner enshanikónhrenhse.
9Ne ioteré꞉hons khès ne tehiotetʼkháshion ónenk kíʼ tsi orihwakwékon enkarihwaiérite tsi nihiorarátston tánon orihwakwékon tsi nahó꞉ten ahonteweiénton.
10Tó꞉ka ne ioniákon enwaráratsʼte khès né knahótenk ahonteweʼiénton, 11ónenk kíʼ tsi orihwakwékon thóh kenhkáiere tsi nihiorahrátston tánon tsi ahonteweʼiénton nék khók tó꞉ka kén ne teníteron aharihwásten nónen enhothóntene. 12Ók tó꞉ka ne teníteron enhánese nakánane tsi nihiorahrátston nó꞉nen enhothóntene, iáh kíʼ thaʼtehiothonhontsóhon nakarihwaiérite tsi nihiorahrátston. Né Roiá꞉ner enshaʼnikónhrenhse, tsioríhwa ne teníteron tsi wathátaste nakarihwaiérihte tsi nihiorahrátsʼton. 13Né teníteron rohianerenhseráien ne tahontaharíhsi tsi nahó꞉ten hiorahrátston khès nahonteweiénton tsi nahó꞉ten hiorahrátston. 14Ók nék khók, ne tsi oiatsorènhʼen waharihwáronhke tsi nihiorahrátston, iáh kíʼ ne thènen taharihwásten, akwékon kíʼ thóh nenhkáiere tsi kíʼ nihiorahrátston ó꞉ni nahó꞉ten nahonteweiénton. Wahariwanírahte tsi nihiorahrátston né tsi iáh teharihwakwénhni ne wenhniserátekwe sahothóntene. 15Ók tó꞉ka onakènhke thontaharíhshion ne warahrátston, ónenk kíʼ tsi enharonhiáken tsi nenhiáwenhne tsi wahorihwanóron tsi nihiorahrátston.
16Né kí꞉ken ne kaianerénhseras nètho Roiá꞉ner thó꞉wi ne Mahís tsi nókwah ne hiorahratsʼthánion ne iáh tehioniákon ne skát꞉ke níteron ne roʼní꞉ha khès ne hioniákon.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.