Numbers 31
31
Ne Ateriʼioseratokénti Tsi Nòkwah Ne Midan
1Ne Roiá꞉ner wahawénhase ne Mahís, 2“Seréwat ne Midianró꞉nons ne tsi nisakotiʼieràse nonhkweshón꞉as NʼIsraerʼró꞉nonke. Nónen etnénhsehre, enshí꞉heie.”
3Káti ne Mahís washakewénhase nonkweshón꞉ás, “Sewathateweienénhtan nahí꞉sewaterí꞉io, né káti nahónton iahietsihiatiatónti ne Midianró꞉nons tánon ietsiréwat tsi nihonwaieráse ne Roiá꞉ner. 4Né sotiʼtiokwáʼtshons NÍsraerʼronónke iahitshihiaté꞉niet enskatewenhniawehetseráhsen niháti nahonterihiósehra.”
5Káti enskatewenhniawehetserásen niháti wahonwahiʼiataráko ne sohthitiokwáʼtshons, né tiokwékʼtons tekeni-iawénhre niwenhniawehʼetsheráhsens niháti wahontaʼteweienénhtaʼne nahonteriʼiósera. 6Ne Mahís iashakoténiete nahonteriʼiósehra né꞉ne Phinehas né roiénha ne Eleazar ne ratsihénstatsi íken ne enteshaʼkoniarotároke, rahónha roterihóntaʼkwe ne iotokéntis nahoténsons tánon ne kahonrawatskówa ensakónaʼne nó꞉nenh enwatewenhnóten. 7Iakonwatiatónti ne Midianró꞉non, kwáh kíʼ tsi nihonáʼon ne Roiá꞉ner ne Mahís, tánon ratikwékon wahonwatinonhwariákon ne ronhnónhkwe, 8thóh ratihiátare ne wísk nihatinonhtihiotsheráke ne Midianrónons: né꞉ne Evi, Rekem, Zur, Hur, tánon ne Reba. Wahonwaʼnonhwariákon nònhne ne Balaam ne roiénha ne Beor.
9Nonhkweshón꞉ʼas NÍsraerʼró꞉nonke waʼkonhwatiʼiéna ne Midianró꞉nons konhnónkwe tánon ne ratiksahokónhas, iakonhwatiʼhiaténhawe ne tsionónskwarons tánon ne rahotitshenenʼókons, wahatinenskwenháton ne rahonatʼtshokowátsheras, 10tánon wahontenonhkwatekʼtánion ne rahotinatowanensónhas tánon tsi ronatatosehró꞉tons. 11Akwékon iahatíhawe ne kanenskwenháton né ronatienawáston, et ratihiátare ne ratinótonhkwe tánon ne kontiʼtshénens, 12tánon Mahís tánon Eleazar tsítnes niahatíhawe ó꞉ni ne ienákere NÍsraerʼronónke, né roʼnónha tsi tsohentakwénhrare nènhne ne Moab nónhwe thohnatatóserote íh꞉se nòkwah ne Jordan tánon ne Jericho.
Né Ronhterí꞉ios Sahónhnewe
13Mahís tánon ne Eleazar, tánon ratikwékon ne sakotihenténhse ne ienákere iahatihiákenhne ne tsi ronatatosehróton niatahonwaná꞉terahte ne ronhterí꞉ios. 14Ne Mahís kwáh íken tsi washakonákwahse ne ronaterihóntons, ne ratisenhnowánens ne rahotitsiókwahs ne ronhterí꞉ios tánon ne ratikwekonháties, né꞉ne sahón꞉newe tsi waterí꞉io nathontahón꞉ne. 15Washakoriwanónhtonhse, “Onh nontiéren tsi konhtikwékon ne tsonathonwísen tsi wahetsiríhon nakonhnónhnheke? 16Sewé꞉hiare ken tsi tsionatʼthonwísen onhnón꞉ha konhtísehrene ne Balaam rahorihonhnienhnítsheras tánon né Peor nónhwe wahakotihenténhse nonhkweshón꞉ás ne iáh thahiakorihwatokénhake rahonháke ne Roiá꞉ner. Né kíʼ aoríhwa thakáhawe ne kannrhaʼtarihnétsera rononháke ne Roiá꞉ner rahonkwetashón꞉ʼs. 17Káti ónenh nónhwa kwáh niatekaksátaʼke tánon kwáh konhtikwékon ne konnónhkwe tsi ietshinonwariákon né kén niehiotiʼiéren ne kaniák꞉tshera, 18ók kíʼ í꞉se sewatatiénhras ietsiríhon nakonhnónhnheke konhtikwékon ne konhtiksahokónhas ó꞉ni ne konhnónhkwe ne iáh arèko tekonhtinakwahientéri. 19Ónen kíʼ tsi ní꞉tson ne onhkák ietʼtsinonhwariákon khès ne kén iesehwaiéren nohierónhtha ónenk kíʼ tsi áhtste natosehrákon ensewenhterón꞉take né꞉ne tsáta nónhta nikaríhwes. 20Ónenk ó꞉ni tsi kwáh akwékon entshisewenhseratáko ne sewatʼtsherónhnia ó꞉ni tsi nahoténsons ne oná ionhniáton, ne kaiatákeras ononhwé꞉ron, khès nóienhte.”
21Ne Eleazar ne ratsihénstatsi íken washakawénhase ne ronhnónh꞉kwe né sóh꞉ti ne tsi waterí꞉io nathethonénon, “Né kí꞉ken ne kaianerénhsheras ne Roiá꞉ner thó꞉wi ne Mahís. 22-23Norihwakwéhkons tsi nahoténsons ne iáh thahóntsha, tsi ní꞉ioht ne owistanóron, kawistaráken, teiotwístaron notsínekwar, karístatis, owá꞉sa, khès ne oristakàte, ónenk tsi enkaristanirátonke tsi otsiràke enkonhtó꞉hetste. Orihwakwékon noiáshon nahorihoténshon né nènhne enkanoharétonhke nonékanos tsi entsohiánerenhne. 24Né tsatákhaton nenhwenhniserakéhaton ónenk tsi entsisewanó꞉hare ne sewatʼtsherónhnia; ethòne kíʼ kwáh entsisewatkwenienstónhake tánon entshetsiríhon niahonsehʼsewatáwehiate ne tsi sewaná꞉taien.”
Waʼthatihiakhónnion Ne Kanenskwenháton
25Ne Roiá꞉ner wahawénhase ne Mahís, 26“Í꞉se tánon ne Eleazar, skát꞉ke ne roná꞉tsiakes sakotihenténhse ne ienákere, ensehwasehtánion orihwakwékons tsi nahoténsons ne rotiʼienáhon thóh ratihiátare ne ratinó꞉tons ó꞉ni ne khontiʼtshénens. 27Tesehwahiakhónhnion tsi nahó꞉ten ne tkahá꞉seron tánon tehioríhwake kwáh né sáka tsi kénhak, énska né꞉ne ratisó꞉tar rahonákwenk tánon ne kenhiotiéton né nènhʼne ne ienákere akó꞉wenk. 28Tsi nahoténsons ne ratisó꞉tar rahonáwenk, sehwatié꞉nawast né꞉ne ahiokaraiéntane ne Roiá꞉ner rahorihwáke né꞉ne tsonkwéta ne wísk tewenhniáʼwe niháti ratinó꞉tons tánon kwáh satehiotónhak ne khontitshéʼnenhs, né tewahóntes, teiotinakarontónʼa, tánon ne kaiatákeras. 29Eleazar tatshíʼtson ne ratsihénstatsi né꞉ne katokénston ahón꞉hion ne Roiá꞉ner. 30Né tsi nikáien ne kenhiotiéton nonhkweshón꞉ʼas akówenk, Saiáta ne wísk-niwásenh niháti ratinó꞉tens tsisewahiató꞉tshion tánon kwáh èthon nasehwáien tsi nókwah ne tsionónskwahrons, ne tewahóntes, teiotinakaronhtónʼa, ó꞉ni ne kaiatákeras. Levites né tahieʼtshí꞉hion tsi roʼnónha ronaterihwatsʼteríston ne Roiá꞉ner rahotóhsehra.” 31Ne Mahís tánon ne Eleazar thóh kíʼ naíhʼiehre tsi níʼ nisakoríhonte ne Roiá꞉ner.
32-35Ne tehioterihwasónhteres né꞉ne kahiatónhnions tsi nahoténsons ne rotiʼienáhon ne ratisóh꞉tar, né꞉ne iehiowenhténions tsi nahoténsons ne iatehatihiáti ronatienawáston: 675,000 nihá꞉ti teiotinakaronhtónʼa tánon ne kaiatákeras, 72,000 nikónhti tsionónskwahrons, 61,000 niháti tewahóntes, tánon 32,000 nikónhti ne iáh tekonhtinakwahientéris. 36-40Nasénhnon tsi nihonáwenk ne ratisóhtar né꞉ne 337,500 niháti teiotinakaronhtónʼas tánon ne kaiatákeras, né꞉ne 675 niháti né꞉ne enkakarhiákʼthonke ne Roiá꞉ner rahorihwáke; 36,000 nikónhti tsionónskwahrons né꞉ne ratisóhtar rahonákwenk, né꞉ne 72 niháti enkakarhiákʼthonke ne Roiá꞉ner rahorihwáke; 30,500 niháti tewahóntes né꞉ne ratisóhtar rahonáwenk, né꞉ne 61 niháti ne enkakariákthonke ne Roiá꞉ner rahorihwáke; tánon 16,000 nikónhti ne iáh tekonhtinakwaientéris né꞉ne ratisóhtar rahotirihwáke, né꞉ne 32 nikónhti ne enkakariákthonke ne Roiá꞉ner raorihwàke. 41Káti ne Mahís tahá꞉wen ne Eleazar né kakarhiákʼton ne katokénston entʼthónhion ne Roiá꞉ner, tsi nihorihwíson ne Roiá꞉ner.
42-46Tsi nihonáwenk ne ratinákere kwáh kíʼ nʼe satèhiot tsi kíʼ nihotiienáhon ne ratisóhtar; 337,500 niháti teiotikakaronhtónʼas tánon kaiatákeras, 36,000 nikónhti tsionónskwahrons, 30,500 niháti tewahóntes, tánon 16,000 nikónhti ne iáh tekonhtinakwahientéris (tsonatʼthonwisen). 47Káti tsi nikonháties kí꞉ken ne Mahís saiáta wahohiatótshion ne wísk-niwásen niháti ratinó꞉tons tánon ne konhtiʼtshénhnens, tánon kíʼ tsi nihorihwatáton ne Roiá꞉ner, tánon káti Levites thasakáwen tsi roʼnónha ronaterihwatsteríston ne Roiá꞉ner rahotóhsehra.
48Ethòne kíʼ ne ratisenhnowánens tsi niká꞉ien ne rowatiríhonte ne ronhterí꞉ios Mahís tsítres niahónʼne 49tánon hiahonwaróri, “Shénshion, wahakhiʼhiásehte ne ratisóh꞉tar tsi í꞉i tsiakiniarotáronhne tánon iáh ne saiáta tetiothonʼkwétokʼte. 50Káti tahiakwáhawe ne owistanórons karasestánion, tehiontenenhtshanáktas, atenenhtshánas, anisnón꞉sawis, atewá꞉shares, tánon ne hionhnitiákʼthas né꞉ne tiakwahiatátshons tsonhkwaháseron. Né ienhiakwátʼkhawe rahonhàke ne Roiá꞉ner né꞉ne ahiakwahkáriakʼte ne tsi iationʼónhne, né káti nahónton nahontashónkwahne.” 51Ne Mahís tánon ne Eleazar waniʼiéna ne owistanó꞉ron, akwékon né꞉ne karaséston íken. 52Ne tiokwéktons ne rotikariákʼtons ne ratisenhnowánens í꞉siʼnónhwe ne kaiéri tewenhniáwe nikakonhtseràke nihiókste. 53Tsi niháti ne iáh ratisenhnowánens tehonatenatónkwen wahontiénawasthe ne rotinenskwenháton. 54Káti ne Mahís tánon ne Eleazar atohserákon nianihá꞉we nowistanó꞉rons, né káti ne Roiá꞉ner nahontaʼsakóne nonhkweshón꞉ás NÍsraerʼró꞉nonke.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.