Numbers 29
29
Né Tkaiesthánion Nosehráse Tehiontenonhweratóntha
(Leviticus 23.23-25)
1Nenhtewatenhniseratiérenhte ne tsatákhaton niwenhnítare ensehwatiataróhroʼke naisewaterénhnaien, tánon kwáh iáh othènen takahioténhʼen. Né wenhniseráte ne iehonrawátstha enhonterenhnóten. 2Né sehwaterihwaténtiat natsisewateskóntʼthase ne Roiá꞉ner, nahonséhra né rawerientiʼiostákwa: saiáta nithohiónha teró, saiáta teiotinakaronhtónʼa rátsinn, tánon tsáta niháti nénska tehonoserihiákon teiotinakarontónʼa ratítsinn owíra, ratikwékon ne kwáh iáh othènen thahotitsihiótarake. 3Iasehwát꞉kaf né tkarihwaiéri onátsia aorihwáke né nothésehra tekaiéston ne iakeniewátha kénhie: iáʼiak nikakonhtseráke né saiáta teró, 4 nikakonhtseráke ne saiáta teiotinakaronhtónʼa rátsinn, 4tánon tekakonhtseráke ne satihiatáʼtshons teiotinakaronhtónʼa owíra. 5Tánon ó꞉ni saiáta kaiatákeras rátsinn iatsisewát꞉kaf né꞉ne karihwáneren aorihwáke, tánon thóh kíʼ ní꞉ioht tsi sewaterihwaténtiat norihwakáhion tsonhtonhnakanonhnitákwah nonkweshón꞉ʼa akorihwáke. 6Né kíʼ iasehwát꞉kaf ne iohiowènhtek ne tiókonhte ionhteskónhtha aorihwáke nenhtewenhniseratiérenhte nenhsewenhnítarane skát꞉ke nonátsia aorihwáke tánon ne onenharatasehontserákeri aorihwáke. Kí꞉ken ká꞉khwas nahónhsera né rawerienhtiʼiostáhkwa ne Roiá꞉ner.
Ne Tkaiéstons Ne Wenhniseráte Nenhtsonhtateriwiʼiósten
(Leviticus 23.26-32)
7Sewatiatarórok nahisewaterénhnaien noieríhaton niwenhniserakéhaton né tsatákhaton niwenhnithakéhaton; tó꞉sa othènen tesewatskáhon tó꞉sa ó꞉ni thènen sewahióten. 8Tsi sewateskónhtʼthas ne Roiá꞉ner, nahón꞉sera né rawerienhtiʼióstha: saiáta nithohiónha teró, saiáta teiotinakarontónʼa rátsinn, tánon tsáta niháti nénska tehonosehrihiákon teiotinakarontónʼa ratítsinn owíra, ratikwékon ne kwáh iáh othènen tehotitsihiótare. 9Iasehwát꞉kaf ne tkarihwaiéri nonátsia aorihwáke nothésera ne takaiestónhak ne iakeniewátha-kénhie: iáʼiak nikakonhtseráke né saiáta teró, 4 nikakonhtseráke ne saiáta teiotinakaronhtónʼa rátsinn, 10tánon tekakontseráke ne satihiatáʼtshons teiotinakarontónʼa owíra. 11Tánon ó꞉ni saiáta kaiatákeras iatsisewát꞉kaf né nènhne ne karihwáneren aorihwáke, né iohiowénhtek ne kaiatákeras iesewatkáwen né norihwakahionhnéha tsonhtonnakanonhnitákwa nonhkweshón꞉ʼas akorihwáke, tánon skát꞉ke ne niatewenhniseráke ionhteskóntʼtha skát꞉ke nonátsias aorihwáke tánon ne onenharatasehontserákeri aorihwáke.
Ne Tkaiestánion Nó꞉nen Tenhiontenonhweráton Ne Tsi Waskwakarénre
(Leviticus 23.33-44)
12Sewatiatarórok naisewaterénhnaien ne wísk-khaton niwenhniserakéhaton ne tsatákhaton niwenhnitakéhaton. Sewatenikonhró꞉ri kí꞉ken kakhwáhere né nahonwakwéniensthe ne Roiá꞉ner né꞉ne tsáta nónhta nikaríhwes tánon tó꞉sa othènen sewahióten. 13Nentewenhtenhniseratiérente tsi sewakhwahéras ne Roiá꞉ner, nahón꞉sera ne rawerienhtiʼiostákwa: áhsenh-iawénhre niháti teró nithotihiónha, tenihiáse teiotinakarontónʼa tenítsinn, tánon kaiéri-iawénhre niháti nènska tehonoserihiákons teiotinakarontónʼas ratítsinn, né꞉ne kwáh iáh othènen tehotiʼtsihiótares. 14Tasewá꞉iests ne tkarihwaiéri nonátsia aorihwáke nothésehra ne tekaiestónhak ne iakenhiewátha-kénhie: iáʼiak nikakonhtseráke nothésera ne saiáta teró, 4 nikakonhtseráke ne shatihiatáʼtshons teiotinakarontónʼa ratítsinn. 15Tánon tekakontsherakehá꞉ties ne satihiatáʼtshons teiotinakarontónʼa owíra, skát꞉ke tsi nenhwaterihwanónhton ne onenharatasehontserákeri. 16Tánon ó꞉ni saiáta kaiatákeras né nènhne ne kariwáneren ahorihwáke. Taʼsewahiestánion kí꞉ken iehiowéntek ne niatewenhniseráke hionhteskóntʼtha skát꞉ke nonátsias aorihwáke tánon ne onenharatasehontserákeri.
17Ne tewenhniserakéhaton tékeniʼiawénhre niháti nithoʼtihiónhas teró, tenihiáse teiotinakarontónʼa tenítsinn, tánon kaiéri-iawénre niháti nénska tehonoserihiákons teiotinakarontónʼas owíra, né꞉ne ratikwékon ne kwáh iáh othènen tehotiʼtsihiótare. 18-19Né skát꞉ke akwékon tsi taʼsewáiest né oiáshon tkaʼiesthánion ne tiotierénhton wenhniserátekwe.
20Nahsénhaton nenwenhniseráteke tá꞉tiest énska-iawénhre niháti teró, tánon kaiéri-iawénhre niháti nénska tehonoserihiákons teiotinakaronhtónʼa owíra, ratikwékon né꞉ne kwáh iáh othènen tehotitsihiótare. 21-22Né iateietʼtshí꞉iest noiáshon tisewaiesthánion tsi nihioterihwanónhton ne tiotierénhton wenhniserátekwe.
23Né kaieríhaton enwenhniseráteke né tasewá꞉iest oiéri niháti teró nithoʼtihiónsas, tenihiáse teiotinakaronhtónʼa tenítsinn, tánon kaiéri-iawénhre niháti nénska tehonosehrihiákon teiotinakarontónʼa owíra, né꞉ne kwáh iáh othènen tehothitsihiótare. 24-25Né iateietʼtshíʼiest noiáshon tisewaiéstston tsi nihioterihwanónhton ne tiotierénton wenhniserátekwe.
26Né wískʼkháton enwenhniseráteke né tasehwáiest tióton niháti teró, tenihiáse teiotinakarontónʼa tenítsinn, tánon kaiéri-iawénhre niháti nénska tehonosehrihiákons teiotinakaronhtónʼa owíra, né꞉ne ratikwékon né kwáh iáh othènen tehotitsihiótare. 27-28Né iateietʼtshíʼiests noiáshon tisewaiéstʼton tsi nihioterihwanónhton ne tiotierénton wenhniserátekwe.
29Né iaʼiák-kháton enwenhniseráteke né tasewáiest shatékon niháti teró nithotihiónsa, tenihiáse teiotinakaronhtónʼa tenítsinn, tánon kaiéri-iawénhre niháti nénska tehonosehrihiákons teiotinakarontónʼa owíra, né꞉ne ratikwékon né kwáh iáh othènen tehothitsihiótare. 30-31Né iateietʼtsíʼiest ratikwékon noiáshon tsi nithisewaiestʼtánion tsi nihioterihwanónhton ne tiotierénhton wenhniserátekwe.
32Né tsáta-kháton enwenhniseráteke né tasewáiest ne tsáta niháti teró nithotihiónsas, tenihiáse teiotinakaronhtónʼa tenítsinn, tánon kaiérih-iawénhre niháti nénska tehonosehrihiákon teiotinakaronhtónʼa owíra, né꞉ne kwáh ratikwékon né iáh othènen tehotitsihiótare. 33-34Né iateietʼtsí꞉iest tsi nitisewaiestʼtánion tsi nihioterihwanónhton ne tiotierénhton wenhnisehrátekwe.
35Né shateʼkonháton enwenhnisehráteke sehwatiatarórok nahisewaterénhnaien tánon tó꞉sa othènen sewathatiótenst. 36Né tasehwáiest ne nahisehwateskónhten né ká꞉khwa aorihwáke rahohénton ne Roiá꞉ner, nahón꞉sehra ne rawerienhtiʼiostákwa: saiáta nithohiónha teró, saiáta teiotinakaronhtónʼa rátsinn, tánon tsáta niháti nénska tehonosehrihiákon teiotinakarontónʼa owíra, né꞉ne ratikwékon né kwáh iáh othènen tehotitsihiótare. 37-38Né iateietʼtsí꞉iest noiáshon tsi nitisewaiestʼtánion tsi nihioterihwanónhton ne tsiotsierénton wenhnisehrátekwe.
39Né kí꞉ken tsi nikaianerenhseró꞉tens tsi ní꞉ioht nahionteskónhten, nonátsias aorihwáke, nonenharatasehontserákeri aorihwáke, tánon ne skaríhwa aorihwáke íken thóh nenhsewáiere rahohénton ne Roiá꞉ner tsi nisewenhnisehraʼráhkwen tsi nisewatenikonhró꞉ris. Né kí꞉ken ne iehiowenhté꞉nions tsi entisehwá꞉iestʼte nienhsewát꞉kawe nakanánonhke tsi nisewararátston khès né kwáh ètho nisehwanikonhró꞉ten tsi tisehwaiéstʼton.
40Káti ne Mahís orihwakwékon kíʼ washaʼkoró꞉ri nonhkweshón꞉ʼas NÍsraerʼró꞉nonke tsi kíʼ nihoríhonhte ne Roiá꞉ner.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.