Numbers 28
28
Tsi Nihiorenhnáhon Tsi Tieiéstha
(Exodus 29.38-46)
1Ne Roiá꞉ner wahorihónten ne Mahís 2nasakorihónhnien NʼIsraerʼró꞉nons nahonthahonwawísehke ne Rawenni꞉io kwáh wató꞉ken tsi nenhkaháwiʼke né꞉ne kákhwa tó꞉kens iahióntkaʼwe né rawerientiʼiostákwah.
3Né kí꞉ken ne ká꞉khwas niaʼhiónhtkawe nahonthahónhion rahohénton ne Roiá꞉ner: né niaʼtewenhniseráke ahionteskónhten, tenihiáse ne énska tehonoserihiákon teiotinakaronhtónʼa owíra tenítsinn né kwáh iáh othènen tahotitsihiotharáke. 4Saiáta iatshisewát꞉kaf noronkéne tánon ne saiáta né nènhne nokarasnéha nikaháwi, 5né snihiatátʼtshons ne nonátsia enkenikwekonhátie né꞉ne tekakonhtsheráke othé꞉sera, né tenhkaiésthonke tekatshetáke iakenhʼiewátha kénhie né꞉ne kwáh wenhiení꞉io. 6Né kí꞉ken ne iatewenhniseráke ienhiontkaʼwásehke né꞉ne kwáh iotʼtshon, thóh kíʼ ken ní꞉ioht ne tiotserénhton iewatʼkáwen né ká꞉khwa né꞉ne tsi tionónhte ne Sinai, né꞉ne tenwenhserateníhon rawerienhtiʼióstha ne Roiá꞉ner. 7Né onenharatasehontserákeri né enhkenikweʼkonhátie nenhthatiérenhte teiotinakaronhtónʼa owíra, ietsienharakwáʼke tasehwáweron tekhatshétake ne onenharatasehontserákeri. 8Nókarasnéha né hionshatshisehwátkaf ne tekeníhaton teiotinakaronhtónʼa owíra kwáh kíʼ né sá꞉ka kenhák tsi kíʼ ní꞉ioht ne shiʼhioronhkenéha iesehwatkáwen, skát꞉ke kenhák ne onenharatasehontserákeri. Né kíʼ nónh꞉ne ne ká꞉khwa í꞉ken tsi iewatkáwen, ne tewenhsehrateníhons ne rawerienhtiʼióstha ne Roiá꞉ner.
Ne Awenhtaʼtokenhtíʼke Entiéieste
9Naʼwenhthatokentíke iehietsihiá꞉tkaf teniʼiáhse ne énska tehonosehrihiákon teiotinakaronhtónʼa owíra né꞉ne kwáh iahothènen tehotitsihióthare, 4 nikakonhtseráke othésera tekaiésthonk ne iakeniewá꞉tha kénhie né꞉ne onátsia tsi iahontkáwenhke, tánon ne onenharatasehontserákeri. 10Ne kí꞉ken watéskonhte thóh nenhatiʼiérake né꞉ne iateiawenhtatokentiʼtsheráke ienhiowènhteke ne niaʼtewenhniseráke né thóh ní꞉ioht tsi ronhteriwathentiátha skát꞉ke ne onenharatasehontserákeri.
Né Tieiéstha Ne Tiotenhniseratierénhton Ne Wenhnítare
11Iasehwát꞉kaf ne watéskonhte rahonháke ne Roiá꞉ner né tiókonhte nensewenhnitárane: né꞉ne teniʼiáhse ne kenhnithonihiónha téro, saiáta teiotinakarontónʼa rátsinn, tsáta niháti ne énska tehonosehrihiákons teiotinakaronhtónʼa ratítsinn, ratikwékon ne iáh othènen tehothitsihióthare. 12Né onátsia iewatkáwen, iasehwát꞉kaf kaiéri níkon né tekaiestónhak ne iakeniewátha kénhie: né satihiatátshons teró, iáʼiak nikakontseráke othésera, né teiotinakaronhtónʼa rátsinn, 4 nikakonhtseráke; 13né satiʼiatátshons teiotinakaronhtónʼa owíra, tekakonhtserakehá꞉ties nènhne. 14Né tkarihwaiéri ne onenharatasehontserákeri né꞉ne 4 nikatshétakes nonenharatasehontserákeri ne saiáta teró, áhsen nikatshétakes ne teiotinakaronhtónʼa rátsinn, tánon tekatshétakes né satihiatátshons ne teiotinakaronhtónʼa owíra. Thóh kí꞉ken nikaianerenhseró꞉tens ne hionteskonhtákwah niahióntkawe nenhtewatenhniseratiérenhte ne enhsewenhnitáshon thóh nenhiotónhake né꞉ne kwáh tsi niióserehs. 15Tánon ne ienhiowènhtheke ne niatewenhniseráke ahionteskónhten skát꞉ke ne onenharataʼsehontserákeri, iatsisehwát꞉kaf saiáta kaiatákeras né꞉ne kariwáneren aorihwáke.
Né Tkaiéston Ne Kaʼkhwáhere Ne Iáh Tewatthenkwáton Kaná꞉taro
(Leviticus 23.5-14)
16Né É꞉neken Watohetstáhkwa kakhwáhere né nahonwakwéniensthe ne Roiá꞉ner né enwaterihwatentiáthonke né kaiéri iawénhre senskárake né nenhtewathenhniʼtatiérenhte enská꞉rane. 17Né wísk-iawénhre senhskárake né nènhne ne kariwihiostónhtshera aorihwáke tsi enkaʼkhwárake tsi enhtewatásawen né꞉ne tsáta nónhta nikaríhwes, nék khók né iáh tewathenkwáton kanátaro énhieke. 18Nenhtewateniseratiérenhthe ne kakhwáhere tsi ensewatiataró꞉rohke né nahisehwaterénhnaien, tánon iáh tehiówenk ne thènen ahiakohióten né wenhniseráte. 19Sehwateskónhten né꞉ne ká꞉khwa aoriwáke tsi iensewát꞉kawe rahonháke ne Roiá꞉ner: tenihiáse nithotihiónha teró, saiáta teiotinakaronhtónʼa rátsinn, tánon tsáta niháti nénska tehonosehrihiákon teiotinakaronhtónʼa ratítsinn owíra, ratikwékon ne iáh othènen tehotitsihiótare. 20Tasehwáiest ne tkariwaiéri nonátsia aorihwáke nothésehra tekaiestónhak ne iakeniewátha kénhie: né꞉ne iáʼiak nikakonhtseráke né saiáta teró, 4 nikakonhtseráke ne teiotinakaronhtónʼa rátsinn, 21tánon tekakonhtserakehá꞉tie ne teiotinakaronhtónʼa owíra. 22Tánon ó꞉ni iatsisehwát꞉kaf saiáta kaiatákeras né꞉ne kariwáneren aorihwáke, tánon thóh kíʼ ní꞉ioht tsi sewaterihwaténhtsiat ne orihwakahionhnéha tsontonhnakanonhnitákwa né nonhkweshón꞉ʼa akorihwáke. 23Tasehwá꞉iest kí꞉ken ne iehiowèntek ne iorihwató꞉ken onhronhkéne ionhteskónhtha. 24Kwáh thóh niʼiohtónhak, né꞉ne tsáta nónta nikaríhwes tsi thatshítson ne Roiá꞉ner ne ká꞉khwa aorihwáke, né tenwenhserateníhon né rawerientiʼióstha. Né kí꞉ken tasehwá꞉iest tsi ienhiowénhteke ne watéskonhte tánon ne onenharatasehontserákeri tkaiéston. 25Sewatiatarórok nahisewaterénhnaien ne tsatákaton niwenhniserakéhaton tánon tó꞉sa othènen sewahióten.
Né Tkaiesthánion Ne Kaientwá꞉kwen Tehiontenonhweratóntha
(Leviticus 23.15-22)
26Nentewenhniseratiérente ne kaientwá꞉kwen tehiontenonhweratóntha, nónen iensewát꞉kaʼwe ne tkaiéston nonátsiase rahohénton ne Roiá꞉ner, ónenk tsi ensewatiaʼtaró꞉rohke nahisehwaterénhnaien, tánon iáh othènen thakahioténhʼen. 27Iasehwá꞉tat nahonteskónhtake aorihwáke né nahón꞉sehra rawerientiʼióstha ne Roiá꞉ner: tenihiáse teró nithoʼtihiónha, saiáta teiotinakaronhtónʼa rátsinn, tánon tsáta niháti nénska tehonoserihiákon teiotinakaronhtónʼa ratítsinn owíras, ratikwékon né꞉ne iáh othènen tehotitsihióthare. 28Iasewát꞉kaf ne tkariwaiéri nonátsia aorihwáke nothésera tekaiesthónhak ne iakenhiewátha-kénhie: iáʼiak nikakonhtseráke ne saiáta teró, 4 nikakonhtseráke ne teiotinakaronhtónʼa rátsinn. 29Tánon tekakonhtseráke ne satihiatáʼtshons teiotinakaronhtónʼa owíra. 30Tánon ó꞉ni iatsisewát꞉kaf saiáta kaiatákeras né nènhne ne karihwáneren aorihwáke, tánon thóh kíʼ ní꞉ioht tsi sewaterihwaténtsiat norihwakáhion tsontonhnakanonʼnitáhkwa nonhkweshón꞉a akorihwáke. 31Né kí꞉ken tasehwá꞉iest tánon ne onenharatasehontserákeri né iehiowènhtek niatewenhniseráke ionhteskónhtha aorihwáke tánon nonátsia aorihwáke.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.