Numbers 19
19
Nahokénra Nonekwénhtara Niwashokóten Tsionónskwahron
1Ne Roiá꞉ner washakorihónten ne Mahís tánon ne Aaron 2nahontasakónon NʼIsraerʼró꞉nons ne naioriwatokénhake kaianerénseras. Tsi ítnes ne Mahís tánon ne Aaron thonwahiaténhaf nonekwénhtara niwashokóten tsionónskwahron né꞉ne kwáh iáh othènen tehiotsihiótare tánon né꞉ne iáh nonhwénhton tehiohioténhʼen, 3tánon Eleazar thónʼhion né꞉ne ratsihénstatsi. Tánon áhtste ne tsi ronanáhtaien niekonhwahiaténhaf tánon rahohénton konhwanonhwariákon. 4Ethòne ne Eleazar ostónha enhatháwa nahonekwénhsa tánon rasnonhsáke énraste tsi tehatstarokwahtánion tsáta nihiorihwáke tsi nihtsiotieráton ne tewatóhsehrote. 5Kaiataʼkwékon ne katshénen, tshiewakwékon ne kané꞉honk, nowáron, nonekwénhsa, tánon nokaróhstha, thóh watsahatónhak rahohénton ne ratsihénstatsi. 6Ethóne ienhá꞉hawe nonenhtakwènhte óiente, ne kahonthowánen, tánon ne onekwénhtara niwasehriʼietó꞉ten tánon otsiráke ienhó꞉ti. 7Ethòne, enshanóhare ne rahotserónhnia tánon enhatatʼnekósehrawe, tánon ethòne enwáton niahonsahatáwehiate tsi nónhwe nihonanátaien; ók kíʼ kwáh tenhohiatatsionhtónhake tsi nióre ienhiókarawe. 8Tsi nikáien ne rohtsaháhton ne tsionhnónskwahron ónenk nónhne tsi enshaʼnóhare ne rahotserónhnia tánon ó꞉ni enhatatnekóserawe, ók kíʼ ó꞉ni rahónha ó꞉ni iáh tahotkwenienstónhake tsi nióre ienhiókarawe. 9Ethòne nónhka ne kwáh sihiorenhnáhon iakotkwéniens enhonkenraró꞉rohke ne tsionónskwahron ahokénra tánon thóh nónhwe nenhkaiéntake tsi nónhwe ne kwáh tiotkwéniens íken né náhtste tsi watenáthaien, thóh nónhwe nenhwateweienhtónhake né꞉ne Israerʼró꞉nons tsi ratinákere náhonste nahatiweienénhtane nonékanos né꞉ne èhren skahawítha ne iáh tehiotkwéniens. Kí꞉ken orihwakáhion thóh nihatiʼiéra nèhren hahonsakaháwite ne karihwáneren. 10Tsi nikáien ne rokenraró꞉ron ónenk kíʼ tsi enshanóhare ne rahotserónhnia, ók tenhohiatátshonhke tsi nióre ienhiókarawe. Kí꞉ken kaianerénhsera tsi kwáh enhioianeréhake né꞉ne tsi nènhwe thóh nenhiotónhake, tetsarónhkwen tsi thóh nenhiotónhake né꞉ne Israerʼró꞉nons tánon ne tihononhontsátes ne skát꞉ke ratinákere.
Niahatiʼiéna Nawenhehióntha
11Tsi nihiákon nienhieiéna nawenheiónhtha kwáh tenhiakohiataʼtsionhtónhake né꞉ne tsáta nónhta nikaríhwes. 12Ónenk tsi enshontiatóhare onékanos énhonhste né꞉ne tionhthonhnakanonhnitákwah né asénhaton nónhta tánon ne tsatakháton nenhwenhnisehráteke, tánon kíʼ ethòne entsakotkwenienstónhake. Ók kíʼ tó꞉ka iáh tahonsahiontiató꞉hare nasenháton niwenhniserakéhaton ó꞉ni ne tsatakháton nónhta, kwáh kíʼ iáh tahonsahiakotkwenienstónhake. 13Tsi nihiákon ienhiehiéna nawenheiónhtha tánon iáh tahonsahionhtiató꞉hare tenhiakohiathationhtónhake kíʼ, tsioríhwa nonékanos ne tionhthonakanonhnitákwah tsi iáh tehonwatinekósehren. Wathatíʼtsionhte ne Roiá꞉ner rahotóhsera, tánon kíʼ iáh ne tahonsahonwatinatónkwahke Rawenni꞉io rahonkwetashón꞉ʼas.
14Tsi naiawénhne nónhkak atohsehrákon ahiaiéheie, nónhka né thóh í꞉ienskwe tsi nikaháwi wahaʼéh꞉heie khès nónhkak iahontáwehiate watiakohiatátshonhne kíʼ né꞉ne tsáta nónhta nikaríhwes. 15Kwáh tsi niatekatshétake ó꞉ni nóntak natohserákon káien ne iáh tehiotenonhtékon né ó꞉ni watsiotshónhtane. 16Né nónhkak iahontatiéna ne hionhthatenonhwariákon khès ne thikénhak tsi wahaʼéh꞉heie náhtste nónhwe khès ne ónhkak iahieiéna nónhkwe akóstsien khès natʼtshatónkwah, watsiakohiatátshonhne kíʼ né꞉ne tsáta nónhta nikaríhwes.
17Nèhren ahonsakahawítonke ne iáh tehiotkwéniens, ostónha kíʼ nahokénhra ne onekwénhtara niwashokóten né tsionónskwahron ne konwatsiatatʼtsaháton néren ahonsakahawíthonke ne karihwáneren ienhkáhake kanatsákon, tánon oné꞉kase enhkanekátenhke. 18Né tiotserénton thóh nenhiawénhne, nónkak ne kwáh iakotʼkwéniens ienhiéhawe ne kahontowánen, onékanoske ienhióhwe, tánon tehiontstaró꞉kwahte natóhsera, kwáh tsi nahó꞉ten natohsehrákon káien, tánon nonhkweshón꞉ʼa né thóh í꞉ienskwe. Ne tekeníhaton né naiáwenhne, nónhkak ne kwáh iakotʼkwéniens onékanos tenhonwanatstaró꞉kwahte nónhka iehiakoiénen nónhkwe akóstsien khès ne iakawenhéion khès natʼtsatónkwah. 19Nasénhaton niwenhniserakéhaton tánon ne tsatákhaton nónhkwe ne kwáh sihiorihwakáhion iakotkwéniens tenhonwanastaró꞉kwahte nonékanos ne iáh tehonatkwéniens. Ne tsatákhaton niwenhniserakéhaton ensehsakonikonhrasehrónhni tsi niháti, nó꞉nen sohtinó꞉hare ne rahonatserónhnia tánon ne ronhwatinekósehren, kwáh shaʼhonatkweniénstane shiaʼkaráhkwenhne.
20Tsi niháti kwáh sahonatkweniénstane tánon iáh teshonatenikonhrasehrónhni iahatikónhtakwe kíʼ iáh teshonatkwéniens, tsioríhwa nonékanos ne tsontonhnakanonhnitákwah iáh tehonwatinekósenhren. Waʼthatítsionsthe ne Roiá꞉ner rahohtóhsehra tánon iáh shé꞉kon ne tahonsahonatenátonkwe Rawenni꞉io rahonkwéta íken. 21Ensewarihwanó꞉ronhste kí꞉ken kaianerénhseras né꞉ne tsi nènhwe thóh nenhiotónhake. Nónhkwe nónhka tenhiontstaró꞉kwahte nonékanos ne tionhtonhnakanonhnitákwah ónenk tsi ensatinó꞉hare ne rahonatʼtserónhnia; ónhka ienhieiéna nonékanos ienwatkónhthakwe kíʼ tsi tenhiakohiatátsontonhake tsi nióre ienhiókarawe. 22Kwáh tsík nahó꞉ten ne iáh tehiakotkwéniens nónhkwe ienhieiéna tsi iáh tahonsahiotkwenienstónhake, tánon ónhka nakóren ienhieiéna kwáh kíʼ iáh tahiotkwenienstónhake tsi nióre ienhiókarawe.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.