Numbers 20
20
Tsi Niʼiawénhsehron Ne Kadesh Nónhwe
(Exodus 17.1-7)
1Né tiotenhnithatierénhton kwáh kanakeraserakwékon nʼIsraerʼronónke karakonhkówa nonhtáien né꞉ne Zin nónhwe tánon wahonthatohsehronhtónhnion ne Kadesh nónhwe. Thóh nónhwe ne Miriam wakénheie tánon wakonhwahiatáta.
2Iáh othènen tekanekaiénthakwe tsi nónhwe nahonthenátaien, shók kíʼ nonhkweshón꞉ás wathonwanatiá꞉taton ne Mahís tánon ne Aaron 3tánon wahatirihwakátate: “Sénha iohianeréne nahionhkwehéionhke ohénton tsi rotatóhsehrote ne Roiá꞉ner skát꞉ke nótsiakes NʼIsraerʼró꞉nons. 4Onhnihiotiéren tsi kén karakonhkówa taskwahiaténhawe? Né ken nahónton ne skát꞉ke ahiakwénheie nonhkwahtshenenhó꞉kons? 5Ónh nonhtiéren tsi thontaskwahiatínekwenhwe ne Egypt tánon kénʼen nontaskwahiaténhawe tsi watenátaien ne tehioʼnikonhráhrat tsi nónhwe ne iáh othènen thahónton nakahiéntʼthonke? Iáh thahóten tekanátsaien, iáh né wisonkówa, iáh nonénhare, iáh né tehiohiatsiʼkhétare sewahiówane. Akwékon iáh tekané꞉kaien nahienekírate!” 6Ne Mahís tánon ne Aaron washakonatiatontákwen nonhkweshón꞉ʼas tánon thóh iathí꞉tane tsi iehionhtawehiatákwah natóhsera. Ohontsáke iathiaʼtiákete, tánon ne tehiohaseraswát꞉the ne Roiá꞉ner rahohásera wahakototáshien.
7Ne Roiá꞉ner wahawénhase ne Mahís, 8“Iahásko nètho aténhnits nohénton káien Naterihwaseronhniátshera Onerókwah, tánon ethòne níse Aaron kanakerasehrakwékon sehiataró꞉rok ne ienákere. Thóh rahotihénton sethá꞉ras thih íse tkenstenhró꞉te, tánon entkanekóten. Thóh kíʼ ní꞉ioht tsi entesnekóten nosténhrakon tsi enhotinekaiéntane nonhkweshón꞉ʼas, né roʼnónha rahotirihwáke tánon ne rahotitshenenhókons nahatinhiʼkírate.” 9Ne Mahís thóh niaháre iahá꞉ko naténhnits, tsi kíʼ nihó꞉nahne ne Roiá꞉ner.
10Ne Mahís tánon ne Aaron washakotihiataróroʼke ne ienákere ohéntonh ne tsi kenstenhró꞉te, tánon ne Mahís wahénron, “Sewatahón꞉satat, íse ne tesewanenhraríhtha! Iówenk kén ne ahontahiakenihnekó꞉ten kí꞉kenʼhen ostenhráke ne sewarihwá꞉ke?” 11Ethòne ne Mahís wahaʼniakaráthate tánon tehioríhwake ostenhráke wahanonhwáreke, tánon tehiotenonhianíton tsi kahionhowánen takanekóten, tánon onhkwetakwékon ó꞉ni ne khontitshénens wahatinekíra.
12Ók ne Roiá꞉ner waʼshakotewenhnaiéntonhwe ne Mahís tánon ne Aaron. Wahénron, “Né tsioríhwa tsi iáh tshiatekaiérih tsi nitisenetákwen nahisiʼnirihwanírate naʼkeshatstenhsheratokénti rahotihénton nonhkweshón꞉ás NÍsraerʼró꞉nonhke, iáh kíʼ tshiahietsihéntenhse ne tsi tsonhón꞉tsaien ne khehiaʼrahratsténhni entekhéhion.”
13Tsi watená꞉taien ne Meribah#20.13 Kí꞉ken kasénhna Meribah ne Hebrew owénhna né꞉ne kéntons “Iakorihwaká꞉tenhʼen.” kíʼ thóh nahá꞉wenhne, tsi nónhwe nonhkweshón꞉ʼas NÍsraerʼró꞉nonhke wahonwarihwakátatʼtshe ne Roiá꞉ner tánon thóh nónhwe nashakonatónhase tsi roiatatokénti íken.
Né Ronhnonhtíio Ne Edom Iáh Nènhne Tehathóntats Nasakoríhon Israerʼró꞉nons Nahontohétste
14Ne Mahís iashakoténiete ne ratirihwakarénies Kadesh tahonténhti ronhnontiʼióke niahón꞉ne né꞉ne Edom nónhwe. Wahonníron, “Kí꞉ken oríhwa sewatátenons nónhwe nonhtá꞉we, né tsi kentiókwahiens NÍsraerʼró꞉nonke. Sateriéntare tsi nahonkwahrihwanorónsten tánon tsi ní꞉ioht tsi wahakwahronhiáken, 15tsi ní꞉ioht nonhkwasót꞉tsheras tsi Egypt niehonénon, tsi nónhwe karíhwes iehiakwenhterónhtakwe. Ne Egyptró꞉nons kwáh íken tsi wahonwanateweienakʼsáten nonhkwaʼsótʼshera tánon nonkwáhtiakes, 16tánon iatsionhkwahénrete rahonháke ne Roiá꞉ner nasonhkwahiénawase. Wasonhkwatʼthóntene tánon raronhiakeró꞉nonh tahoténiete, rahón꞉ʼa wasonhkwahéntense tsi thonhtahiakwahiákenhne ne Egypt. Ónenh kíʼ nónhwa Kadesh nónhwe nitsákwes, ne tsi kanatowaʼnénhke ákta ne tsi sateristatátie. 17Asatʼthontáʼtsheke kíʼ takwahríhon nahiakwató꞉hetste ne sonhontsáke. Ní꞉i tánon nonhkwahtshenenhókons kwáh iáh tahiakwatʼthahontáko khès ne sahenthákes niahiákwe khès ne tsi sanenharaientʼthóserons, tánon iáh tshiaʼkwahnekíra ne tsi satnaweró꞉tons. Kwáh kíʼ iohahakweníioke nónhwe nenhiakwatʼtahítha tsinióre ientsiakwahiákenhne ne sanakeraserákon.”
18Ók ne Edomró꞉nons wathatirihwasehráko, “Wahakwáne ne tó꞉sa akwahríhon nahisewatóhetste nonhkwahnakerasehrákon! Tó꞉ka enthiʼsewarihwáreke, ienhiakwahnenhríhnekenhwe tánon ienhkwahtiatónhti.”
19Nonhkweshón꞉ʼas NʼIsraerʼró꞉nons wahonhníron, “Iohahakweniʼióke nónhwe nenhiakwatʼthahíta, tánon tó꞉ka ní꞉i khès nonhkwahtshenenhó꞉kons nahiakwahnekíra ne sané꞉ka, enhiakwahkáriake kínek khók tehionhkwahthonhontsóni nahiakwahtó꞉hetste.”
20Ne Edomró꞉nons tonhthahóntnanétha, “Wahakwáhne!” tánon iahatinenhríhnekenhwe ne kanenhrashátste ronhteríios niasakonatiatónhti nonhkweshón꞉ʼas NÍsraerʼró꞉nonhke. 21Ne aoríhwa ne Edomró꞉nons tsi iáh tehónhnere NʼIsraerʼró꞉nons nahontó꞉hetste ne rahotinakeraserákon, NʼIsraerʼró꞉nons tonsahontkaraténi tánon ákte nòkwah niahónhne.
Tsi Warénheie Ne Aaron
22Kanakeraserakwékon NÍsraerʼró꞉nonhke èhren sahónhnete ne Kadesh nónhwe tánon tsi tsionónhte ne Hor iahónhnewe, 23né꞉ne tsík karisthatátie Edom. Thóh nónhwe ne Roiá꞉ner washakawénhase ne Mahís tánon ne Aaron, 24“Ne Aaron iáh nènhne tshiahatáwehiate ne tsi tsiohontsáien tsi nikhehiararatsʼténhni nahontatkhéhion NʼIsraerʼró꞉nons; enrénheie nènhne, tsioríhwa tsi iáh tetsiatewenhnarákwen nakerihwatátʼtshera ne Meribah nónhwe. 25Iasehiaténhaf ne Aaron tánon ne roiénha Eleazar tsi tsionónhte ne Hor, 26tánon thóh nónhwe shatshèkwah ne Aaron ne rahotiátawi wakó꞉ses tánon Eleazar thontátshon. Ne Aaron thóh né nónhwe nenhrénheie.” 27Ne Mahís thóh kíʼ naháiere tsi kíʼ nahorihónten ne Roiá꞉ner. Tsi tsoʼnónhte ne Hor niahónhne rahotihénton ne kanakeraserakwékon, 28tánon ne Mahís wahohiatawitáhsi ne Aaron ne rahotiátawi wakó꞉ses tánon Eleazar sahohiátawithe. Thóh ononhtoharáke ne Aaron warénheie, tánon ne Mahís ó꞉ni ne Eleazar thontahianonhtátsʼnenhte. 29Kaná꞉keraserakwékon waherihwáronhke ne Aaron tsi warénheie, tánon tatikwékon wahontsiónhnion né꞉ne áhsenh-niwáhsen niwenhniseráke nikaríhwes.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.