Numbers 17
17
Ne Aaron Rahoténhnits
1Ne Roiá꞉ner wahawénhase ne Mahís, 2“Sehró꞉ri nonhkweshón꞉ʼas NÍsraerʼró꞉nonke tékeni-iawénhre niwatenhnitseráke aonʼtaié꞉son, né꞉ne sewatenhniʼtsherarát꞉tshons ne sotitiókwa íken. Rahonatenhnitsherákes senhsenhnarónhnion ne shatihiatáʼtshons 3tánon ethòne Aaron tshénhnaren natenhnitsheráke né Levites rahonaténhnits. Sewatenhnitsheráʼtshons ne shaʼkotihenténhse rahotiʼtiókwas. 4Thóh niahá꞉saf tsi tewatóhserothe tsi nónhwe nikíteron tánon ohénton Naterihwasehronhniátshera Onerókwah í꞉tsien, tsi nónhwe natenhtiatátʼken. 5Ethòne ne rahoténhnits ne rihiatharákwen enkaterónhten. Thóh kíʼ ní꞉ioht tsi ténkʼtaste tsi tiókonhte rotirihwakaténhʼen kí꞉ken Israerʼró꞉nons tsi nó꞉kwah ní꞉se.”
6Káti ne Mahís waʼshakowénhnaraʼne NʼIsraerʼró꞉nons, tánon satiʼhiatáʼtshons ne sakotihenténhse wahonwatenhnítsheron, sewatenhnítshera ne shotiʼtiókwas, tékeni-iawénhre níkon norihwakwékon, tánon ne Aaron rahoténhnits iathatí꞉ieste. 7Ne Mahís ethòne akwékon naténhnits atohsehrákon iaháhionte ohénton waʼháien tsi nónhwe nikáien ne Roiá꞉ner Raonerókwah Naterihwasehronhniátshera í꞉wa.
8Nó꞉ia sahiórenhne, nó꞉nen ne Mahís atohsehrákon niaháre, wahatkátho ne Aaron rahoténhnits né Levites rahonaténhnits íken, ioteronhtháhon. Ioskwehionhtáhon, tehiotsitsanekáron, tánon ne iahónton ne iehioʼshokwaieríhon Almonds! 9Ne Mahís akwékon naténhnits iahahá꞉we tánon washaʼkonatónhase NʼIsraerʼró꞉nons. Wahontkátho tsi naháwenhne, tánon satiʼhiatátshons ne sakotiʼhenténhse hionsahatíhaʼwe ne rahonaténhnits. 10Ne Roiá꞉ner wahawénhase ne Mahís, “Ne Aaron rahoténhnits thóh hionhsháʼtien ohénton tsi kaneró꞉kwahien naterihwaseronhniátshera í꞉wa. Tsi enwateweienhtónhake né nahiakothokáten ne tehatinenhraríhtha Israerʼró꞉nons tsi kwáh enhonhníheie tó꞉ka iáh tehóntkawane tsi nihatirihwakátats.” 11Ne Mahís thóh kíʼ nahá꞉iere tsi kíʼ nahónhane ne Roiá꞉ner.
12Nonhkweshón꞉ʼas NÍsraerʼró꞉nonke wahonwénhase ne Mahís, “Ètho kík nienhiótʼte nonhkwahrihwáke! 13Tó꞉ka ónhka ákta nahontáien ne tsi watóhsehrohte kwáh enhiaiéheie, kwáh kíʼ thóh nihioiánere tsi ní꞉ioht nahionkwenhéionhke!”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.