Numbers 16
16
Ne Tehatiʼrihwaríhtha Né꞉ne Korah, Dathan, Tánon Ne Abiram
1-2Ne Korah né roʼní꞉ha né꞉ne Izhar, né꞉ne tsi ratiʼtáraien ne Levite nithaʼwénon né꞉ne Kohath nónhwe, waharìhwahko tsi nòkwah ne shakohenténhse Mahís. Wahonwatiaʼtárahse ne áhsen niháti ne tsi ratiʼtiókwahien ne Reuben—né꞉ne Dathan tánon ne Abiram, né sakohiohʼokónhas ne Eliab, tánon On ne ne roiénha ne Peleth—tánon ne ó꞉ia 250 niháti ronátsiakes Israerʼró꞉nons, né kwáh íken tsi ronhwatiʼientéris ne tsi kanakeraseráien. 3Rahotihénton ne Mahís tánon ne Aaron wahonteró꞉rohke tánon wahonwahnénhase, “Sóhtsi ahínon niahisewáhawe! Ratiʼkwékon ne ienákere ne tsi kanakerasehráien Roiá꞉ner rahonkwetashón꞉ʼas, tánon ne Roiá꞉ner tewakwékon, Nonhtiéren, káti, Mahís, tsi é꞉neken shaʼtatónhnis tsi nó꞉kwah ne Roiá꞉ner rahonkwetashón꞉ʼas?”
4Nónen ne Mahís saharihwáronhke kí꞉ken, ohontsáke wahathatiatónhti tánon wahaterénhnaien. 5Ethóne wahawénhase ne Korah tánon ne ronhwanonhteráties, “Ohronhkeʼnéha ne Roiá꞉ner enshonkwahnatónhase ónhka né rahónha rahonkwetashón꞉ás íken; né kíʼ ne, shakoiatarákwen íken, ákta ne ientsienharákwahke nónhwe natenhontátʼken. 6-7Oronhkeʼnéha níse tánon ne ieshaʼnonhteráties iasehwanatsienhásehron ne wátʼtsironhtákwa, wish niwaswénhthakes sehwátharon ne kanátsakons tá꞉non kanethanórons sehwaró꞉sehron, tánon ietsienharakwáhke niasewáhaf. Ethòne kíʼ enhionkwahtó꞉kense ónhka ne tsi nítsion ne Roiá꞉ner shakohiatarákwen. Íse ne Levites sóhtsi ahí꞉nonh niahisewáhaʼwe!”
8Ne Mahís iahakónhtakwe ró꞉tharani ne Korah. “Sewatahónsatat í꞉se ne Levites! 9Ne kén íhseweʼre kén niʼiorihiwáha nètho SakowenNí꞉io NʼIsraerʼró꞉nons tsi watetsisewakʼkhási ne ronátsiakes ne ratinákere, né káti nahónton rahiatákʼtha niahí꞉sewe, niahisewahióten ne Roiá꞉ner rahotoserákon, tánon taietʼtsirihwásnieʼse ne ienákere tánon naietʼtsihiótenhse? 10Waʼtsisewaríhon níse tánon ne ronátsiakes ne Levites nahisewaiéna kí꞉ken kakwenienstátshera—tánon káti ónenh nónhwa sewaʼteniéntha nahisewaiéna tsi nihotiʼhiotenhserótens ne ratiʼtsihénstatsis! 11Né nó꞉nen entsiʼsewarihwá꞉kwaʼse ne Aaron, kwáh seh Roiá꞉ner tsi sewarihwakwénhnis nètho níse tánon ne ietsinonhterá꞉ties iáh tesewatewenhnarákwa.”
12Ethòne ne Mahís iashakoterihwaniénhten ne Dathan tánon ne Abiram, ók waʼníron, “Iáh tshiaʼiákene! 13Iáh kén tshiatekaiéri tsi teʼteskwahiatinekénhʼen ne hiohonhtsiʼióne ne Egypt nónhwe né naskwahnonhwariákon ne karakhonkówa nónhwe? Kwáh kén ó꞉ni ioterihwíson naskwatenonhtí꞉ioste? 14Níse kwáh orihwihiohʼónwe tsi iáh teteskwahiaténha tsi nónhwe ne ionhontsí꞉io akénhake khès nahontaskwáhwiʼke ne kahentashónhas ó꞉ni ne kanenharaientʼthósehrons nahionkwaʼwenhkhónweke, tánon ónenh nónhwa sateniéntʼtha naskwahnikonhráten. Iáh kíʼ tshiahiákwe!”
15Ne Mahís wahotenakwenhserónhnien tánon wahawénhase ne Roiá꞉ner, “Tó꞉sa othènen tsiéna nahoténsons enthatíhawe kí꞉ken ronhnónhkwe. Iáh thaʼhóten tekhetkenhténhni; Iekaníhare iáh né saiáta tshiehihiaténha ne rahotiʼtshénen tewahóntes.”
16Ne Mahís wahawénhase ne Korah, “Oronhkeʼnéha níse tánon ne 250 niháti iesanonhteráties ónenk tsi entísehwe rahotosehrákon ne Roiá꞉ner tsi nónhwe nihénteron; ne Aaron thóh nònh꞉ne enrésehke. 17Tsi sewahiatáʼtshons kwáh tèsehwakwe ne tsónhtaks waʼtsironhtákwa, tánon kanetanó꞉ron thóh sewéta, tánon ethòne ietsienharákwahke iasewá꞉ren.” 18Káti satiʼhiatáʼtshons wathónhnekwe ne rahonónhtak watʼtsironhtákwah, wísk niwaswénhtake tánon ne kanetanó꞉ron wahonnó꞉kawe, tánon tsi iehionhthawehiatákwah natohsehrákon wathatítaʼne skát꞉ke ne Mahís tánon ne Aaron. 19Ethòne ne Korah ratiʼkwékon washaʼkohiataró꞉rohke ne ienákere, tánon tsi waʼthatítane tehonwatikánere ne Mahís tánon ne Aaron ne tsi iehiontawehiatákwah natoserákon. Thontahiawénhstsi ne tehiohaseraswátʼthe watsioswátʼthete tsi nónhwe nihénteron ne Roiá꞉ner wahakothotáshien kanenrakwékon ne ienákere, 20tánon ne Roiá꞉ner washaʼkawénhase ne Mahís tánon ne Aaron, 21“Onàken ísehnet tsi rónhnes kí꞉ken onhkweshón꞉ʼas ónenk enkehiáʼtonhte.”
22Ók kíʼ ne Mahís tánon ne Aaron wathiaʼtshàkete ohontsáke teniká꞉nere tánon waní꞉ron, “Ó Sewenní꞉io, í꞉se akwékon tsatakwení꞉io ne tsi iakónhnhe. Nó꞉nen tsaʼkwahiatáʼtshons enhiakwarihwánerake, kanakerasehrakwékon kén ensehnákwahse?”
23Ne Roiá꞉ner wahawénhase ne Mahís, 24“Sehró꞉ri nonhkweshón꞉ʼas èhren rónhnet tsi ronatatóhsehrote ne Korah, Dathan, tánon ne Abiram.”
25Ethòne ne Mahís, né rónhne꞉ne ne sakotiʼhenténhse NʼIsraerʼró꞉nons, tsitʼnes ne Dathan tánon ne Abiram niaháre. 26Washaʼkawénhase nonhkweshón꞉ʼas, “Ahéren ísewet ne tsi ronatatóhsehrohte kí꞉ken roʼtirihwáneren tánon tó꞉sa othènen iáh sewaiéna ne rahonáwenk akénhake. Tó꞉ka iáh, kwáh kíʼ skát꞉ke tsi ienietshiʼiaténhaʼwe ne rahotirihwaneraháktsheras.” 27Sók kíʼ èhren wahónhnete ne rahonatohsehráktha ne Korah, Dathan, tánon ne Abiram.
Ne Dathan tánon ne Abiram thóh tanihiáke:ne tánon thóh íhnete tsi iehiontawehiatáhkwah ne rahonatóhsehras, skát꞉ke ne rotiniáʼkhons ó꞉ni ne sakotihioʼonkónha. 28Ne Mahís washaʼkawénhase nonhkweshón꞉ʼas, “Thóh kí꞉ken ní꞉ioht tsi ensewató꞉kenhse nètho Roiá꞉ner tsi thakateʼniéton nahontióten orihwakwékons kíʼ nahorihoténsons tánon tsi iáh í꞉i tewakatenikónhra tsi thóh nátiere. 29Ók tó꞉ka kí꞉ken ronhnónhkwe skenènstsi tsi ní꞉ioht tsi enhonhníheie né꞉ne kwáh iáh othènen Rawenni꞉io teshakorewáton, né káti tsi iáh kíʼ Roiá꞉ner tethakateniéton. 30Ók tó꞉ka ne Roiá꞉ner thènenh nahá꞉iere ne iáh ónhka tetiakorihwarónhken, tánon nonhóntsa enwatenonhtónko nahiaʼkotiatanékwahne skát꞉ke akwékon tsi nahoténson ahotiʼiéntake, ne káti ne tshiehónonhnhe thóh nienhónhne ne tsi tsiohóntsaien ne kenhéion, kwáh kíʼ ensewateriéntarane kí꞉ken ronhnónhkwe tsi wahonwakénron ne Roiá꞉ner.”
31Kwáh kíʼ tsi niʼiostó꞉re wahása tsi rothárakwe, nonhóntsa ná꞉kon tsi í꞉rate ne Dathan tánon ne Abiram waʼtewatóren tsi hontenonhtónko 32tánon iahakotiatanékwahne ó꞉ni ne rahotiwátsires, skát꞉ke ne Korah tánon ne ronhwanonhteráties ó꞉ni akwékon tsi nihotiʼientatsheráiens. 33Káti tshiehonónhnhe iahónsnenhte tsi tsiohóntsaien ne kenhéion, skát꞉ke ne raotiʼientátsheras. Nonhóntsa tahiakoró꞉rohke tsi shontenóton, tánon wahatihiatáton. 34Onhkwetaʼkwékon kí꞉ken NʼIsraerʼró꞉nons né thóh rónhneskwe shahontèko nó꞉nen sahonatʼthóntene tehonsénhthos. Wathotihénrete, “Sewatèko! Nonhóntsa nonhtiérenk í꞉i ó꞉ni ienhionkwahtiaʼtanékwahne!”
35Ethòne ne Roiá꞉ner ótsire tahaténiete wakatsiróten tánon wahakotiatáʼtsahate ne 250 niháti ne iehonatkáwen ne kanetanó꞉ron.
Ne Watʼtsironhtákwah Ónhtaks
36Ethòne ne Roiá꞉ner wahawénhase ne Mahís, 37“Tsró꞉ri ne Eleazar né roʼní꞉ha né Aaron né ratsihénstatsi íken né꞉ren ahonsahahá꞉wite ne teiotwístaron notsínekwar watʼtsironhtákwah ónhtaks né iatehiotaténron tsi niháti ne ronhwanatiataʼtsaháton, tánon kakʼnónhwe iatesehwaréniat noswénhthas né iwa ne watʼtsironhtákwas ne onhtákʼne, tsioríhwa ne waʼtsironhtákwas onhtáks tsi iotokénti íken. 38Thó꞉ne wahotokenhtíne né nó꞉nen shiaʼhatíren ne Roiá꞉ner rahówenk ietsienharakwáhke. Káti iasehwáhaf kí꞉kens waʼtsironhtákwas ónhtaks né꞉ne tsi nikáiens né ronhwatinonhwariakónhnion ne rahotiʼrihwaneraháktseras iorihonhníhon, kènk nikatensonhhak tsi sehwatwasónhniat, tánon ne tsiónhniat nahonterohróks꞉te ne ietsienharákwah. Né enhiakotokatenhníheke nonhkweshón꞉ʼas NÍsraerʼró꞉nonhke.” 39Káti ne Eleazar ne ratsihénstatsi íken iaháhawe ne watsironhtákwas onhtakʼsónhas tánon wahaténhnane nahontʼwasónhniate ne ahonhnónhniate ne tsienharákwah ahonteróhroksʼte. 40Né káti kí꞉ken nahonwanaronhkáten NʼIsraerʼró꞉nons né꞉ne tsi niháti ne iáh Aaron nónhwe thitonatwatsiríhnon ónenk tsi ientsienharákwahke ní꞉tsien nahonwatsahátaʼse ne kanetanóron ne Roiá꞉ner. Ók tó꞉ka iáh, nonhtiérenk kíʼ enhonwanátonte tsi kíʼ ní꞉ioht ne Korah tánon ne rahonkwetashón꞉ʼas. Akwékon kí꞉ken thóh naháwenhne tsi kíʼ nihoríhonhte ne Roiá꞉ner ne Eleazar rahonháke ne Mahís.
Ne Aaron Washaʼkonónsthate Nonhkweshón꞉as
41Nóia shahiórenhne kanenhrakwékon wahonwarihwakatáʼtshe ne Mahís tánon ne Aaron tánon wahonhníron, “Óhtsiakes wasehnonhwariakhónhnion ne Roiá꞉ner rahonkweʼtashónhas.” 42Né nó꞉nen kanenhrakwékon sahonteróroke wahonwarihwaiatʼse ne Mahís tánon ne Aaron, wathohtkaraténi tsi tewatóhsehrote niahontiérate tánon wahontkátho notsíkera iohrorókston tánon nètho tehiohaseraswáhthe tsi nónhwe nihénteron ne Roiá꞉ner onhthotáshion. 43Ne Mahís tánon ne Aaron thóh niaháne tánon ohénton ne tsi watóhsehrote waʼníthane, 44tánon ne Roiá꞉ner wahawénhase ne Mahís, 45“Èhren íset tsi rónhnes kí꞉ken onhkweshón꞉ʼas, tánon kwáh tsi nónhwe nihónhnete tsi enkhehiáthonʼte!”
Ne tenihiáse waʼkhiatshákete ohontsáke tenikánere, 46tánon ne Mahís wahawénhase ne Aaron, “Iahásaf ne sónhtak waʼtsironhtákwa, wísk niwaswénhtake séhtha né꞉ne ietsienharakwáhke sráko, tánon kanetanó꞉ron sèh roséhron noswénhtas. Ethòne iatesasteríhen tsi thónʼnes nonhkweshón꞉ʼas niaháse tánon ne saterihwaténhtsiat ne orihwakahionhnéha tsionhʼthonhnakanonhnitákwah ne rahotirihwáke. Tesasteríhen! Ne Roiá꞉ner rahonakwáhtshera ónenk tsiotásawe tánon ne kannratarihnétsheras ónenk thontásawen.” 47Ne Aaron wahatewénhnarakwe, iahá꞉hawe ne rahóntak waʼtsirarákwa tánon hiatharáthate shaʼtekanenhríhen tsi nónhwe nihonatiataró꞉ron nonhkweshón꞉ʼas. Nónen sahatkátho ne kannratarihnétshera ónenk tsiothásawen, ne kanetanó꞉ron waharóhsehron noswenhthakéson tánon wahaterihwaténhtiaʼte norihwakahionhnéha tsionhntonhnakanonhnitákwa nonhkweshón꞉ʼas akorihwáke. 48Né kíʼ watʼkátatste ne kannratarihné꞉tsheras, tánon thóh í꞉rate tsi natehónteres ne ronhnónhnhe tánon ne ronenhéions. 49Tsi niháti ne wahonhníheie 14,700, niháti iáh tehonwanaséhton tsi niháti ronenhéion ne Korah ronenhraketskwénhne. 50Nónen ne kannratarihné꞉tshera watʼkátane, ne Aaron tsítres ne Mahís hionhsáre ne tsi iehiontawehiatákwah natohsehrákon.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.