Numbers 15
15
Tsi Niʼkaianerenhseró꞉tens Ne Karihwiʼiosehʼokónhas
1Ne Roiá꞉ner taʼháwenh ne Mahís 2Ne naioriwatokénhake ne kaianerénhseras raotiriwake nonhkweshón꞉as NIsraerʼronónke nahatirihwanorónhkwahke ne tsi nónhwe nihiohontsáien ne thesakahontsawíre. 3Né꞉ne teró, teiotinakaronhtónʼa rátsinn, teiotinakaronhtónʼa, khès ne kaiatákeras enwá꞉ton nahónhion ne Roiá꞉ner nahonwanateskónhten khès né꞉ne karihwiʼiosehokónhas ahorihwáke tsi akanánonhke ne wararáts꞉ton khès né꞉ne tsi kwáh ehʼnihiakonikonhró꞉ten tsi iahóntkaʼwe khès né꞉ne ahontakaiéstonhke ne iorihwató꞉ken karihwiʼiostónhtshera tsi nisehwakhwahéra; ne ahonséhra kí꞉ken káhkhwas né rawenhrenhtiʼióstha ne Roiá꞉ner. 4-5Ónhka ne teiotinakaronhtónh꞉ʼa khès ne kaiatákeras iahonwanát꞉kaʼwe nahonwanaʼteskónhten né꞉ne Roiá꞉ner rahorihwáke né saiáta katshénen né enkenikwehonhátie ne tekakhontsheráke othésehra né꞉ne tekhatshétake iakeniewátha kènhie tenhkaiésthonke né꞉ne onátsia aorihwáke tsi ienwatʼkáwenhke, skát꞉ke ne tekatshétake ne onenharatasehontserákeri. 6Nó꞉nen né teiotinakaronhtónha rátsinn ienhonwátʼkaʼwe, kaiéri-nikakonhtsheráke othéhsera né꞉ne áhsen niʼkatshétake iakeniewátha kènhie tenkaiésthonke né ienwatʼkáwenhke né nonátsia aorihwáke, 7skát꞉ke ne áhsen nikatshétake ne onenharatasehontsherákeri. Né tewenhserateníhons né rawerientiʼióstha ne Roiá꞉ner. 8Nó꞉nen ne teró ienhonwát꞉kaʼwe nahonwateskónhten ne Roiá꞉ner rahorihwáke khès ne karihwiʼiosehokónhas né nakananónhke ne wararátston khès ne skaʼríhwa ahorihwáke tsi iewatkáwen, 9Ne onátsia iahiontkaʼwénhke ia-iak nikakonhtsheráke othéhsera né꞉ne kaiéri nikatshétake tenkaiésthonke ne iakeniewátha kènhie, 10skát꞉ke ne kaiéri nikatshétake onenharatasehontsherákeri. Né tewenhserateníhons kí꞉ken né rawenhrientiʼióstha ne Roiá꞉ner.
11Thóh kíʼ ní꞉ioht tsi ienwatkáwenhke né satiʼhiatáʼtshons ne teró, teiotinakaronhtónhʼa rátsinn, teiotinakaronhtónʼa, khès ne kaiatákeras. 12Nó꞉nen nishí꞉non ne saiáta katshénen ienwatkáwenhke, nenhkenikweʼkonhátie ienʼhióreke kíʼ ne sathakónhake. 13Ratiʼkwékon ne ratinakerehʼónwe NʼIsraerʼró꞉nons tsi thóh kí꞉ken nenhatí꞉iere nónen ne ká꞉khwa ienhóntkaʼwe, ne tenhwenhserateníhon ne rawerientiʼióstha ne Roiá꞉ner. 14Tánon tó꞉ka né kwáh tsitʼnikaháwi ne tehononhontsátes ne skátke sewaná꞉kere, né꞉ne kènk nikaríhwes khès ne iehiotkonhtá꞉kwen íken tsi thóh ratinákere, ká꞉khwa iasehwát꞉kaf, né nahónsehra né rawerienhtiʼióstha ne Roiá꞉ner, roʼnónha ó꞉ni thóh ní꞉ioht tsi enhatirihwakwéhnienste ne kaianerénhseras. 15Asèken tsi nénhwe, ehʼnenhiotónhake tsi sewatwehnónhni níse tánon ne tehononhontsátes. Níse tánon ne ronhnónha kwáh ne sáka ne Roiá꞉ner tsi tetshiʼsewakánere; 16ne sakaianerénhseras tánon tsi nikaianerenhseró꞉tens sewaró꞉ron níse tánon ne roʼnónha.
17Ne Roiá꞉ner tahá꞉wen ne Mahís 18ne naioriwatokénhake ne kaianerénhseras né nonhkweshón꞉ʼas NÍsraerʼró꞉nonhke nahatirihwanó꞉ronhkwe tsi ionhóntsaien né teshakówireh. 19Nónen ne thènen ká꞉khwa né nónhwe niwatónhnis nenhónhneke, ostónha ákte nenhat꞉ien né꞉ne katokénston tsi entʼthónhion ne Roiá꞉ner. 20Nó꞉nen ensewanatarónhni, nenhtewatiérenhte waʼtenataronhtákwen né nonátiaʼse ionhniáton tsi enkatokénstonhke tsi entʼthónhion ne Roiá꞉ner. Tsi entkaiéston kwáh kíʼ ne sáka tsi ní꞉ioht tsi katokenstónʼne tisewaieston tsi nitsiónhni níse sewathéton. 21Asèken tsi nénhwe, kí꞉ken katokénston athatawítshera tsi entʼthónhion ne Roiá꞉ner né꞉ne í꞉se sewanatarónhni.
22Ók tó꞉ka shí꞉ken ónhkak iáh tehiakonikonhrónhni wahakorihwanó꞉ron nahiakotewehiénhtonke kí꞉ken kaianerenhserasónhas tsi nikáien ne Roiá꞉ner thó꞉wi ne Mahís. 23Tánon tó꞉ka shí꞉ken tsi niahaweʼnonhátie ne ienákere wahakorihwanóron orihwakwékon thóh naiéiehre tsi nahó꞉ten ne Roiá꞉ner roríhonhte ne Mahís. 24Ók tó꞉ka tewaterientawenhriéhon tsioríhwa ne iená꞉kere tsi iáh teierihwaientérihkwe, ónenk kíʼ tsi teró ienhonwát꞉kawe nahonwateskónhten, né ahónsehra né rawehrientiʼióstha ne Roiá꞉ner, né꞉ne tkarihwaiéri nonátsia iewatkáwen ó꞉ni nonenharatasehontsherákeri iewatʼkáwen. Né꞉ne iehiowénhte íken, ónenk tsi kaiatákeras rátsinn ienhonwát꞉kawe né꞉ne karihwáneren aorihwáke. 25Né ratsihénstatsi ónenk tsi né enhaterihwaténtiate norihwakáhion tsionhthonnakanonhnitáhkwa ne ienákere akorihwáke, tsioríhwa ne tewaterientawenhréhon tsi iáh tewanikonhrónhni tánon tahatihásehron ne ká꞉khwas ne rahothirihwaneraháktsheras aorihwáke né tsi ká꞉khwa iahóntkawe tsi wahonwátaʼtshe ne Roiá꞉ner. 26Kwáh kíʼ kanakerasehrakwékon ne ienákere NÍsraerʼró꞉nonke tánon ne tehononhontsátes ne skát꞉ke ratinákere tsi enshonwatinikónhrenhse, tsioríhwa tsi ratikwékon ronatiátare tsi tewaterienhtawenriéhon.
27Tó꞉ka ónhka tsi nítsion iáh tesehwanikonhrónhni tsi wesewarihwánerake, ónenk kíʼ tsi né nénska teiahosehrihiákon kaiatákeras ienhsewát꞉kaʼwe né꞉ne kariwáneren aorihwáke. 28Tsi ietsienharakwáhke ne ratsihénstatsi enhaterihwaténhtiate norihwakáhion tionhthonnakanonhnitákwa né nahonsehsewatenikonhrasehrónhni tsi nókwah ne sewarihwaneraháktshera, tánon kíʼ entsitsinikónhrenhse. 29Kwáh né sakaianerénhsera tiakoró꞉ron ratikwékon ne iáh tehonanikonhrónhni tsi wahatirihwánerake, né꞉ne tó꞉ka kén ehsihatinakerehónwe ne Israerʼró꞉nons khès ne tihononhontsátes ne skát꞉ke ratinákere.
30Ók nónhka ne kwáh iakonikonhrónhni tsi aierihwánerake, né꞉ne tó꞉ka kén ienakerehónhwe khès ne tihiakahontsátes, rotiníkon tsi nihonwaiérase ne Roiá꞉ner tsi ronhwakenrónhni, tánon kíʼ ónenk kíʼ tsi enhonwatinonhwariákon, 31tsioríhwa tsi wahatirihwáson tsi nahó꞉ten ráwen ne Roiá꞉ner tánon kwáh thahónhnete tsi wathatíhiake ne rahotsaʼwenhrátseras. Kwáh kíʼ roʼnónha iahontátkwahse tsi enhonhníheie.
Ne Rónhkwe Ne Wathá꞉hiake Nawenhthatokentíke
32Iahónteratsthe, tsi nikaríhwes NʼIsraerʼró꞉nons shé꞉kon karakhonkówa shihatíteron, rónhkwe wahonwahiatatʼtsénhri raienhtonrónhkwaʼskwe ne iawenhthatokentíke. 33Mahís, tánon Aaron, tsítʼnes niahonwahiaténhawe tánon ó꞉ni ne kanakerasehrakwékon, 34tánon né꞉ne ratinónhne wahonwatenhnikónhraren, tsioríhwa tsi iáh tehiorihwíhiokwe onhnenhonwaiérase. 35Ethòne ne Roiá꞉ner wahoró꞉ri ne Mahís, “Ne rónhkwe ónenk tsi enhonwanonhwariákon; kanakerasehrakwékon tsi enhonwanenhióhiaʼke tsi enrénheie náhtste tsi nónhwe nihonatenátaien.” 36Sók káti kanakerasehrakwékon iahonwahiaténhawe náhtste tsi nónhwe nihonatená꞉taien nahonwanenhióhiake tsi enrénheie, tsi kíʼ nihotenhnáhon ne Roiá꞉ner.
Tsi Nihiorihó꞉tens Ne Tehiosehrihietónhtons
37Ne Roiá꞉ner wahorihónten ne Mahís 38nashakawénhase nonkweshón꞉ʼas NÍsraerʼró꞉nonhke: “Tsionhniánion ne tahiosehriʼietóntonke ne tsi iehiotʼtónhnions ne sewaʼtiátawis tánon orónhia niwasehriʼietó꞉tens tehiosehriʼietóntak ne sewasehriʼiétas. Thóh kí꞉ken nenhsehwaiérake né꞉ne tsi nénhwe. 39Nasehrí꞉ies né nahonsehsewehiaʼrakwenhníheke, tánon kwáh tsi níkonh né ensewatʼkátho né ensewehiarákwen akwékon nakatiawenhrátsheras tánon sewatewénhnarak; ethòne káti iáh thahonsaskwatʼkaraténi tánon né ahisehwásehre ne iatesewahiátis tsi nisewaskáneks ó꞉ni tsi nahontesewanónhweʼheke. 40Ne tehiosehriʼietóntons né entsiʼsewehiarakwenhní꞉heke nakerihwatáʼtsheras, tánon kíʼ kwáh Í꞉i akonkwétas enkénhake. 41Í꞉i, ne Watiá꞉ner Sewaní꞉io íken; Í꞉i tetkwahiatinekénhen ne Egypt né꞉ne Sewaní꞉io akénhake. Í꞉i ne Watiá꞉ner.”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.