Numbers 1
1
Ne Thontiérenhte Wahonwatisénhnaren NIsraerʼró꞉nons
1Ne tiotenhniseraʼtsherénhton ne tekeníhaton wenhnítare né tekeníhaton ioseráte nó꞉nen nonhkweshón꞉ʼas NIsraerʼronónke èhren shonhsahónnete ne Egypt, ne Roiá꞉ner wahothárase ne Mahís thóh rahothohserákon tsi nónhwe nihenténhron ne Roiá꞉ner né꞉ne iahonwentsaʼthènke ne Sinai nónhwe. Wahénron, 2“Í꞉se tánon ne Aaron ietsisenhnarónhnion nonhkweshón꞉ʼas NIsraerʼronónke né꞉ne tsi nihotiʼtaróhtens tánon tsi nihathiʼwatsiʼróhtens. Ietsisenhnarónhnion ratikwékon ne ronhnónhkwes 3né꞉ne tewáhsen natehonosehriʼiákons tó꞉ka ó꞉ni ne sénha thoʼtíh꞉ions né nahónton nahonkʼtsiotharónhni. 4Tsisehwarihwanónhtons saiáta ne renhtaraʼkweʼní꞉io ne skentharáhʼtshons naietʼtshiʼsniénon.” 5-16Né kí꞉ken ne ronhnónhkwe, shaʼkotihéntense ne roʼnónha rahothiʼtiókwahkons, né꞉ne roʼnónha ronhwatiʼhiatarákwen né tsi kanakeraseráien nahotihióten kí꞉ken kahioténhsehra:
| Ne Raotitsiokwahs | Ne shaʼkotihéntense |
|---|---|
| Reuben | Elizur ne roʼiénha né꞉ne Shedeur |
| Simeon | Shelumiel né roʼiénha né꞉ne Zurishaddai |
| Judah | Nahshon né roʼiénha né꞉ne Amminadab |
| Issachar | Nethanel ne roʼiénha né꞉ne Zuar |
| Zebulun | Eliab né roʼiénha né꞉ne Helon |
| Ephraim | Elishama né roʼiénha né꞉ne Ammihud |
| Manasseh | Gamaliel né roʼiénha né꞉ne Pedahzur |
| Benjamin | Abidan né roʼiénha né꞉ne Gideoni |
| Dan | Ahiezer ne roʼiénha né꞉ne Ammishaddai |
| Asher | Pagiel ne roʼiénha né꞉ne Ochran |
| Gad | Eliasaph ne roʼiénha né꞉ne Deuel |
| Naphtali | Ahira ne roʼiénha né꞉ne Enan |
17Tsi enhonsniénon kí꞉ken tékeniʼiawénhre niháti ronhnónhkwe ne Mahís tánon ne Aaron 18kanakeraserakwékon washaʼkotihiataróhroke né꞉ne tioʼtenhniseratierénhton ne tekeníhaton wenhnítare tánon washaʼkotisenhnarónhnion onhkwetakwékon né꞉ne tsi nihothiʼtarótens tánon tsi nihatiwatsiró꞉tens. Tsi nihothisenhnótensons rathikwékon ne ronhnónhkwe né꞉ne tewásenh natehonosehrihiákons tánon ne ronathawenhráton wahonwathisénhnaren tánon wahonwanásehte, 19kwáh kíʼ tsi nihotenhnáhon ne Roiá꞉ner. Thóh nónhwe né꞉ne iahonwenhtsaʼthènke ne Sinai, ne Mahís washaʼkosenhnarónhnion nonhkweshón꞉ʼas. 20-46Ne ronhnónhkwe né tewásenh naʼtehonosehrihiákons tánon ne ronatawenhraton tsi nikáien nahónton nahontsoʼtharónhni wahonwatiʼsenhnaʼrónhnion né tsi nihotisenhnótens tahioianénhawe tsi nihothitarótens ó꞉ni tsi nihatiwatsiró꞉tens, né tahontiérenhte tsi rathiʼtáraien ne Reuben, né꞉ne Jacob kwáh tokʼsténha roiénha. Ne tsokwéktons tsi nihotiʼtiókwahkes ken kahiatónhnion:
| Ne Raotitsióhkwas | Tsi nihotiʼtsiókwah |
|---|---|
| Reuben | 46,500 |
| Simeon | 59,300 |
| Gad | 45,650 |
| Judah | 74,600 |
| Issachar | 54,400 |
| Zebulun | 57,400 |
| Ephraim | 40,500 |
| Manasseh | 32,200 |
| Benjamin | 35,400 |
| Dan | 62,700 |
| Asher | 41,500 |
| Naphtali | 53,400 |
| Tsiokwékton: | 603,550 |
47Ne Levites iáh nènhne tehonwatiʼsénhnare skát꞉ke ne thihotiʼtiókwahtes, 48tsioríhwa ne Roiá꞉ner rohró꞉ri ne Mahís, 49“Nónen ensehsenhnarónhnion ne ronhnónhkwes nahónton ahonktsotarónhni, tó꞉sa kíʼ nènhne sehiátaren ne Levites kentiókwa. 50Khéʼkenk, ne Levites né sehrihónten nahonterihwatsʼtériste Natóhsehra tsi nónhwe niʼkíteron tánon akwékon tsi niwatsʼtasónhas. Ronhnónha enhatíhawe tánon tsi niwatsʼtasónhas, thóh enhotiʼhióten, tánon thóh aktóntie enhontená꞉taien. 51Né nónen tenhtsiʼsewanáʼthakwe, ne Levites ronhnónha enshonʼtohsheraʼríhsi tánon enshonʼtohsehró꞉ten ne á꞉se tsi nónhwe ientsiʼtewaʼtenátaien. Nónkha akó꞉ren nákta nahontáhien tsi waʼtohsehróte kwáh kíʼ enhionthaʼtenonhwariákon. 52Né꞉ne roʼnátsiakes NʼIsraerʼró꞉nons enshontohsehrakétsko, skenhtiokwá꞉tshon tsi skenhtiokwáʼtshon, saiáta ne rónhkwe skát꞉ke ne rahotiókwa tánon né rahónha rahoniaʼtará꞉ʼa. 53Ók kíʼ ne Levites thóh ákta tsi watóhsehrote enhontenátaien ne naʼhontenhʼnikonhráren, né káti ne tóhsa ónhka ákta nahontháien tánon ahierihónhni nakenakwáhtshera ahotí꞉iente ne tsi ratiʼnakerasehráien ne Israerʼró꞉nons.” 54Káti nonhkweʼshón꞉ʼas NIsraerʼronónke orihwakwékon thóh nahatí꞉iere tsi kíʼ nihoríhonte ne Roiá꞉ner ne Mahís.
Currently Selected:
Numbers 1: MHK
Highlight
Copy
Compare
Share
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
