Joshua 6
6
Nisraerʼró꞉nons Wahatiiéna Ne Tsi Kanatowá꞉nen Ne Jericho
1Ne tsi iotenhenrentónhnions ne Jericho kanonthónhnion tánon ratiʼnikónhrahre Nisraerʼró꞉nons tó꞉sa iahontáwehiaʼthe. Iáh ónhka thahónton ne iahionhtáwehiaʼte iáh ó꞉ni thahónton nahiehiakén꞉ne ne tsi kanatowá꞉nen. 2Ne Roiá꞉ner wahawénhase ne Joshua, “Shatsià꞉nake éntsien ne Jericho, skátke nahonhnonhtihiótsera tánon ratikwé꞉kon ne ronhtinikonhraʼtsánis nahonkweʼtashónhas ronhterí꞉ios. 3Ní꞉se tánon ne senhtiókwa ronhterí꞉ios enshewanenrahserón꞉ni tensewanathatà꞉se ne tsi kanatowanénhke tsiokonhte énska ne sewenhnisera né꞉ne ia-iak nónhta nikaríwes. 4Tsáta niháti ró꞉thikares, satihiatatʼtions ratihawinonhtie ne kahonrawatskowah, né꞉ne ohénton nienhonhne ne ateriwaserón꞉niatshera oneró꞉kwa. Né tsathakhaton nenhwenhniserateke níse tánon ne ronhterí꞉ios tsi ensehwanenhrahseronhni tsi tensewanathatase ne kanató꞉wanenhke né꞉ne tsáta nihioriwá꞉ke tsi nikaríwes ró꞉tihonrawaton ne ró꞉thikhares. 5Ethòne énska kwáh éhthoh tsi nihions tsi enwá꞉tewenhnhoten ne kahonrawatskowa. Kwáh tsi niiostó꞉re ensatʼthontene, kwáh onhkwetaʼkwékon ónenk tsi tenhíakohenrethe, tánon ne watenhenró꞉the ne tekanathanakton tsi tenhwarehni. Ethòne ki kwáh kanenhrakwekon ne ronhterí꞉ios ienhontʼthakwarishiate ienhatiná꞉tarane ne kanató꞉wanenhne.”
6Ne Joshua hiashá꞉kononhke ne ró꞉thikhares tánon wasakoró꞉ri, “Iasewahaf ne ateriwasehronhniatshera oneró꞉kwa, tánon tsáta nítsion aohenton sewathenti, sewahawinonhtie ne kahonrawatskowa.” 7Ethòne wasakoró꞉ri nonhkweshón꞉a thonthasawen ratinenhrasehronhni tehonná꞉thatase ne kanató꞉wanenhke, tánon shó꞉thitsiokwa ohénton niehone nahontenhnikonhraren ne Roiá꞉ner raoneró꞉kwa nateriwasehronhniatshera thóh iwa.
8-9Káti, kwáh ki tsi niháwen ne Joshua, nonenhton nienhonhne tahonthásawen rahó꞉tihenton niahónhne ne ró꞉thikhares né꞉ne rothihonrawaton ne kahonrawatskowa; onahken nènhne tá꞉honhne ne ró꞉thikhares rathihawi ne Ateriwaseronhniatshera Oneró꞉kwa, tánon thikanenhrathe onahken tahonhne. Kwáh ki tó꞉nahe ne kahonrawatskowa tsi kawenhnó꞉te. 10Ók ne Joshua kwáh shá꞉kotsiawenhrati nonhkweshón꞉ʼas ne tó꞉sa tahó꞉thihenrethe, iáh ne tsowenhna tahonhthati tsik ensakoró꞉ri. 11Káti washá꞉konahne ki ken skanenhra rononhkwe niahatihawe ne Roiá꞉ner Raoneró꞉kwa Nateriwaseronhniatshera iwa ne énska iewateratst tehonhnathatase. Ethòne thontahonhne ne tsi nónhwe nihó꞉natenathaien tánon thóh nónhwe nahonsonhtihiake.
12-13Ne Joshua tsi sahiórenhne oronhketstsi wahatketsko, tánon né꞉ne tekeníhaton ionhshonteratsthe ne ró꞉thikares ó꞉ni ne ronhterí꞉ios thonsahonhnathatase ne kanató꞉wanenhke kwáh ki tsi nihó꞉thiieren ne tenhtherene: ne ohénton ró꞉natohesthakwen, né꞉ne skanenhra nohenton ronhne rathinikonhrare; noia né꞉ne ró꞉thikhares ró꞉thihonrawaton ne tsáta níkon kahonrawatskowa; ethòne, ónenh né꞉ne ró꞉thikhares ne ratihawi ne Roiá꞉ner Raonerokwa Nateriwaseronhniatshera et iwa; tánon nó꞉nakenkha, né nonahken tahó꞉thinenhrine. Kwáh ki thó꞉nahe tsi kawenhnó꞉the ne kahonrawatskowa. 14Ki ken ne tewenhniserakehaton shé꞉kon tonhsahonhnathatase ne kanató꞉wanenhke ethòne tsi thó꞉natenathaien hionsahonhne. Thóh ki nahatiiere né꞉ne ia-iak nónhta nikaríwes.
15Né tsathakhaton siwenhniserakehaton wahontketsko ne satonhthontharenho tánon wahatinenhraseronhni ne tsáta nihioriwake wathonhnathatase ne kanató꞉wanenhne kwáh né saken tsi nihotiieren ne tsiotserénhton—nekʼkok kiken wenhniserátekwe ne ne wahatinenhrasehronhni wathonkwatase ne tsáta nihioriwake. 16Ne tsathakhaton satehó꞉nakwathasehatie, nónen ne ró꞉thikhares thó꞉wa ahonaterenhnhothake ne kahorawatsthakowa, ne Joshua washá꞉konhane nonhkweshón꞉ʼas tahothihenrete, tánon wahénron, “Ne Roiá꞉ner tsi sehwawi ne kanató꞉wanen! 17Ne kanató꞉wanen tánon akwékon tsi nihioteriwatseren né nónhwe ónenk tsi kwáh tó꞉kenʼen tsi enkariwathonhtonke né꞉ne iahonwatatʼtse ne Roiá꞉ner. Né khók ne ioriwahiathatonhon Rahab ó꞉ni ne ahoienthatsera tsi enkanonsthathonke, tsioríhwa tsi wahá꞉kohiatasehte nonhtsionhkwetashonhas iateriwató꞉rats. 18Ók iáh ki tsiasawe ne thenen akénhake ne akariwathonhtonke; ók tó꞉ka thóh nenhsehre, entesawe ne takanikonraʼráhtsera ó꞉ni ne kariwaiesatsera tsi ronanatenataien Israerʼró꞉nons. 19Akwékon tsi nahó꞉tensons né꞉ne ionhniatons ne kawistarákens, owistanoronhs, tehiotʼtsinokwaronhte notsinekwar karisthatsi, tó꞉ka ó꞉ni karisthatsis né꞉ne Roiá꞉ner ronhwarahkwenhni. Roiá꞉ner tsi rahwisthaienthakwa ienkaienthake.”
20Káti ne ró꞉thikhares wahonterennhoten ne kahonrawatskowa. Kwáh tsi nihiostó꞉re nonhkweshón꞉ʼa wahá꞉kokthonhtene, iorahkareni tsi watsiakohenrethe, tánon ne watenhenró꞉the wakharenienhne. Ethòne ratikwékon ne ronhterí꞉ios iahontʼthakwarishiathe iahatinonhtharane tánon wahontsiathakweniiosthe. 21Né꞉ne rahonashá꞉rekowah wahonsthe tsi akwékon washá꞉kotinonhwariakon ne kanató꞉wahnenke, ronhnónhkwe ó꞉ni ne konhnónhkwe, kenhtithó꞉thihionsas ó꞉ni nakotstenhó꞉konhas. Kwáh ó꞉ni wahonwatinonhwarhiakonhnion ne tsiononhskwahrons, teiotinakaronhtonʼa, tánon ne tewahóntes.
22Ne Joshua washá꞉koró꞉ri ne tenihiáse né iateriwathó꞉rats ronhnathatonhnine, “Wáhs tsi tsononhshó꞉the ne ioriwahiathathonʼon niahasene, tánon tasehnihiatenhaf ó꞉ni ne ahó꞉watsires, kwáh ki tsi nitsarahratstenhni.” 23Káti thó꞉niahane tánon takonhwahiatenhawe ne Rahab, skátke ne roʼníha ó꞉ni nonistenha, ne ronhthatekenhó꞉konhas, tánon ne ronatsiakes nahó꞉watsire. Kwáh rathikwekon iahonwatihiatenhawe, kawátsires ó꞉ni ne rathinaskwas, ne nahatiniakenhne ákta tsi nónhwe ne Israerʼró꞉nons tsi ronatenathaien. 24Ethòne ónenh wahontenatenhthawe ne kanató꞉wanenhke ó꞉ni wahó꞉teke kwáh okenhrake wahón꞉hni, kwáh tsi nahó꞉ten ne thóh nónhwe nikaienthakwe, nek khók tsi nahó꞉tensons ne kawistarahke, owistanorons, ne tehiotʼtsinokwahronhte notsinekwar karisthatsis, ó꞉ni ne karisthatsi íken, tsi né iehó꞉thiha tánon Roiá꞉ner tsi rawisthaienthakwah nónhwe iehó꞉nathakweniaien. 25Ók ne Joshua sahanonhsthate ne tsi hionnhe ne iohrihwahiathatonhon Rahab ó꞉ni ne konhthatekonhkwes, tioríhwa tsi iakohiathasehtonhne ne tenihiáse iaterihwató꞉rats ne ieshá꞉kotheniethonʼne ne Jericho. (Ne tsi thakawatsirathatie shé꞉kon nihó꞉nonhnhe ne Israerá꞉ke nón꞉wa wenhniseráte.)
26Etʼnikahawi ne Joshua wahahianerenseronhni kwáh iorihwaniron tsi washá꞉kothokaten: “Nonhka naienhre nahonshá꞉kahnatohnike ne tsi kanató꞉wanenhke ne Jericho né ienhiakohiató꞉renhne ne Roiá꞉ner rahó꞉rewathatsera.
Ónhka akénhake ne ahonsahatenonhkonhni kwáh enhó꞉tonhse ne takowanenh ró꞉ienha.
Ónhka akénhake nahonsahiakonhni ne hiotenhenrenton enhó꞉tonhse ne rahó꞉tenisóh꞉kwa.”
27Káti ne Roiá꞉ner nikwekonhaties ne Joshua, tánon tsi nironhkwetó꞉wahnen kwáh watewaterihwareni tsi nikanakerahsera.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.