Joshua 5
5
1Ratikwé꞉kon ne Amorʼró꞉nons ronhtinonhtí꞉ios né꞉ne entiè꞉ne nokwáhti iotiéton ne Jordan ó꞉ni ratikwé꞉kon ne Cannanites ronhtinonhtí꞉ios ne aktónhtie ne Mediterranean Kaniatarakeʼkó꞉wa wahatiriwarónhke né꞉tho Roiá꞉ner tsi rostatʼtháton ne Jordan kaniataratátie tsi nió꞉re nonhkweshón꞉ʼas Nisraerʼró꞉nonke iathatihiá꞉iake. Wahonateronhiénten ó꞉ni wahonnikonhrókten né꞉ne Israerʼró꞉nons rahotiríhwa.
Ne Ronhwatiwarahkwè꞉taron Ne Gilgal Nónhwe
2Ethò꞉ne ne Roiá꞉ner wahoró꞉ri ne Joshua, “Shathasaronhniánion né꞉ne onénhia nahó꞉ten tánon sewarahkwè꞉taron ne Israerʼró꞉nons.” 3Káti ne Joshua thóh ki naháiere tsi nahorihónten ne Roiá꞉ner, tánon washakowarahkweʼtarónhko Israerʼró꞉nons ne tsi ionónhthe né꞉ne konhwanaʼtónhkwa Ionhthatewarahkwetharónhtha iononhtháhere. 4-6Nó꞉nen nonhkweshón꞉ʼas sathonthahonténhti ne Egypt, ratikwé꞉kon ne rotiskenrakéhte shihonwatiwarahkwétharon. Ethosà꞉ne, tsi nikarí꞉wes ne kaiéri niwáhsen nihioserá꞉ke nonhkweshón꞉as ne rothiriwahiò꞉te ne tahonhnonhontsihià꞉ke ne iahonwenhtsathènhke, iáh ne sahiátha ne rakshà꞉a tehonwawahrakwè꞉tharon. Káti ó꞉ni, tsi iahontókten ne thó꞉ne ratikwé꞉kon ne ronhnónhkwe né꞉ne iaʼtekaiéri tsi tiʼthotíhion nahontshotaʼrón꞉ni ne sathonthahonténhti ne Egypt wahonhníheie tiorì꞉wa tsi iáh tehonwawenhnaráhkwen ne Roiá꞉ner. Kwáh ki tsi nihorahrátston, iáh tehonwatirihwá꞉wi nahonatkátonhke ne ióskats ó꞉ni iohontsí꞉io né꞉tho tsi shakorahratsténhni ne sakotisoʼthonkonhkén꞉en. 7Ne ronhwatihiohokónhas né꞉tho ronhnónhkwe iáh nonhwénhton tehonwatiwarahkwè꞉taron, tánon ne kí꞉ken nonenhrahse ratinekwenhsatátie né꞉tho Joshua washakowarahkwè꞉tharon.
8Ne shahonwatiwarahkwè꞉tharon ne sonhtésha, kwáh kanenhrahkwé꞉kon wahóntien tsi nónhwe nihonatenataiéntakwe tsi nió꞉re hionshahonatewirónhnien. 9Ne Roiá꞉ner wahawénhase ne Joshua, “Nónhwa wenhniserá꞉te kwáh étren satkháwite natehénsera tsi nihietsinaskónhniskwe ne Egypt.” Ne ki tiorì꞉wa né꞉tho watená꞉taien ne konhwanaʼthónkwah Gilgal, Ne Hebrew ne kasénhna ne nén꞉ne kéntons “Éren kahawíton.” Né꞉tho kasénhna shé꞉kon ne konhwáiats.
10Tsi nikarì꞉wes Nisraerʼró꞉nons ronahnathaiénthakwe ne Gilgal nónhwe ne tsi iohenthakwénhrare ákta ne Jericho, wahonteʼnikonhró꞉ri ne é꞉neken wathohesthákwa ne noʼkharasné꞉ha nohénton ne kaiéri iawénhre shiwenhniserá꞉te ne wenhnì꞉thare. 11Nó꞉ia sahiorénhne ne thontié꞉renhte wahónhneke ne kákhwa ne Canaan nónhwe nihiothonhníhon: né꞉ne kanatsakeríton tánon né꞉ne watenatharónhni ne iáh thaʼtekaiéston ne ionttenhkwátha. 12Thothontáshawen ne kanà꞉taro iáh thatetsiosénhen ne karonhià꞉ke, tánon Nisraerʼró꞉nons iáh ó꞉nen thé꞉nen theshotinatará꞉ien. Thothontáshawen ne wahón꞉neke ne kákhwa ne Canaan nónhwe niwathónhnis.
Ne Rateriioserakweʼní꞉io Ne Roiá꞉ner Rahonkwè꞉ta Ne Ronterí꞉ios Wahothotáshien Ne Joshua
13Tsi nikarì꞉wes ne Joshua ákta ne Jericho í꞉reskwe, thonthaiawénstsi wahóken rónhkwe rahohénton í꞉rathe, waʼsarowá꞉nen raháwe. Ne Joshua rahiatákta niaháre tánon wahoriwanóntonhse, “Í꞉se ken nénska akonhkwè꞉ta ne ronhterí꞉ios, katónken thetewatà꞉tsons?”
14“Iáh ne kakniká꞉ien akénhake,” ne rónhkwe wathariwaʼsehrá꞉ko. “Tsi kén꞉en í꞉kes í꞉i ne kenenhrakweʼní꞉io ne Roiá꞉ner rahotióhkwa ne ronhterí꞉ios.”
Ne Joshua ohontsá꞉ke wahathatiaktiénenhte tsi nahokwéniensthe tánon wahèn꞉ron, “í꞉i ne shanátsera, shénshion. Nahó꞉ten teshatonhontsóni tsi nátiere?”
15Tánon ne Roiá꞉ner rahonkwè꞉ta ne ranenrakweʼní꞉io ne ronhterí꞉ios wahoró꞉ri, “Tesharathási, ohontsatokentíke nónhwe níserate.” Tánon káti ne Joshua tonaháiere tsi ki nahonwaró꞉ri.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.