Hosea 7
7
1né nó꞉nen ensketsiénte Nisrael,
nahoriwahetkénhsera ne Ephraim enkarihotáshionke,
tánon ne ahoweienhnatʼkénsera ne Samaria;
asè꞉ken ne tewareniá꞉tha nonhó꞉wen,
ne ratinénskwas tehatinoharíhtha tsi iehontawehiá꞉tha,
tánon ne ratinénskwas atstésons ó꞉ni nón꞉we nisakotinenhrakárias.
2Ók iáh kí tsatehonhnontónhnions
né꞉tho kwáh akwé꞉kon ké꞉iare ne rahotiriwaneraháktseras.
Ó꞉nen kí nón꞉wa tsi nihatiweienó꞉tens ne tehonatsatháton,
kwáh akʼkénton rónhnes.
3Ne tsi nihatinikonrahét꞉kens ronwatsenhnonhniaténhnis ne ronhnontí꞉io,
tánon ne ronaterihóntons né tsi akonwára ronatatónhni.
4Kwáh ratikwé꞉kon rontenakwahiesá꞉tha;
thóh nihatiiatóten tsi ní꞉ioht ne tsi iontenatarontáhkwah ne watarihá꞉ton,
né sakonataronhniénhni iáh tatehiotonhontsó꞉hon tahatsirawénrie,
tsi enthontáhsawen enhontesehrónhni kwáh tsi nió꞉re ienwathénko.
5Ne tewenhniserá꞉tekwe nonkwahnontí꞉io rawenhní꞉sera kenʼne ne ronaterihóntons
wahotinonwát꞉ten né tsi nihionekatarí꞉hen nonenharákeri;
iathanentséste tsi rónhnes ne rotinonwaró꞉ri.
6Asè꞉ken ó꞉nen ronwatitsiró꞉tani kwáh tsi ní꞉ioht ne iontenatarontáhkwah, kwáh thoneriasatétas;
asonhtakwé꞉kon ne raotinakwáhtshera tehiorihénʼen;
noronhkè꞉ne wathonateranekará꞉se watewanitonkó꞉ko.
7Ratikwé꞉kon thóh nihotiiatatarí꞉hen tsi ní꞉ioht ne iontenatarontáhkwah,
tánon wasakonarónhtate ne rahononkweʼtashónhas ratikorá꞉shons.
Ratikwé꞉kon ne raotinontí꞉ios ronwatinonwariá꞉khon;
iáh ne saiá꞉ta tethakená꞉tons.
8Né Ephraim iesakotsatará꞉ni nonkweshón꞉has;
ne Ephraim nahónha kwáh ne nénhne asénhnonk khók niionatará꞉ri ne watenatarónhte.
9Thiononhontsá꞉tes ronwashatstenhserakénhnion,
ók iáh ki teoterièn꞉tare;
taʼkenhróhkwa onónhkwis watonreniá꞉te rahonhà꞉ke,
ók iáh kí teoterièn꞉tare.
10Né Israel tsi niwathatónhni ne wahoiatanó꞉ten;
nek kík sá꞉ka iáh Roiá꞉ner Raotiní꞉io nokwáh tseshón꞉netha,
khés nahonwahiatísake, né kí akarihónhni.
Iáh Othé꞉nen Tekarihwástha Ieniahésen Nonkwè꞉ne
11Né Ephraim ne teshón꞉tieres norí꞉te,
tsatehotirihwaráhon tánon iáh othé꞉nen tiatehonnonhthónnions;
Egypt iehonwathí꞉nonks, Assyria niehonʼnhétha.
12Tsi nienhónhne, kwáh enwakaharónhti rononhà꞉ke;
kwáh entekhehiathénten kwáh tsi ní꞉ioht notsithenokónhas ne tsi iowé꞉rare kontítses;
kwáh enkheréwate ne tsi niwateriwatró꞉ri ne tsi ronatkenhní꞉son.
13Rotithentáhsere, asè꞉ken é꞉ren ró꞉neton nakonhà꞉ke!
Atkaronhniátshera enhotirá꞉ne, asè꞉ken iáh tehionkewenhnaráhkwah!
Ahónton nakheniá꞉kente,
ók ionkanowenhténhnis.
14Tsi tehonséntʼtos iáh raoneriáne nón꞉we tetewétha,
tsaʼtehotihenrétha ne rahotináktake;
rontatrenánions né꞉ne onátsas tánon onenharákeri tkarihónhnis;
ionkewenhnón꞉tses.
15Í꞉i seh kherihonnién꞉ni ó꞉ni keshatstenhserá꞉wi ne ronterihiosthákwas,
ne kík sahka wahétken tsi wahontenikonrónni tsi nokwáh ní꞉i.
16Iehotikontákwen ahè꞉ren rohʼnhéton nakonhà꞉ke;
thóh nihotiiatawénhon tsi ní꞉ioht ne iohennát꞉senhen;
ne rahonnonkweʼtashónhas ronaterihóntons asareʼkó꞉wa enhotirió꞉te
tiorì꞉wa tsi nihonnenhnasáktsen.
Thóh nihió꞉son ne tsi nihatirihwakátats ne tsi ionhontsá꞉ien ne Egypt.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.