Hosea 6
6
Nonkweshón꞉a Iáh Tetsiakawetákwen Nahonsahiontatré꞉wate
1“Káts, ánion Roiá꞉ner nokwáh nietsí꞉tewe;
asè꞉ken rahónha seh ne shonkwahiataratiónkwen, tánon rahónha kí nensehshonkwahtsénte;
rahónha shonkwakarewá꞉ton, tánon rahónha kí ensheshonkwahkentó꞉ren.
2Tsi nió꞉re ne tewenhniserakéhaton rahónha enshesonhtiónnhete,
nasénhaton nenhwenhniserakéhaton rahónha thenshesonhkwáhtaste,
ne nahónton rahonhénton ahitiónhnheke.
3Ánion ionkwahterientáran, tewá꞉rek natsitewaienterahʼne ne Roiá꞉ner;
tsi nontahawenonhátie etʼniiorihwí꞉io tsi ní꞉ioht tsi tahiorenhehátie;
kwáh thóh ní꞉ioht tsi enshonkwahiatórenhne tsi ní꞉ioht ne iotsatará꞉tses nokenhnoré꞉seras,
tsi ní꞉ioht ne kokwitè꞉ne iokenhnó꞉res ionekanóntens nonhóntsa.”
Tsi Nihonerhiá꞉saniron Ne Israerʼró꞉nons Tánon Ne Judahró꞉nons
4Onʼnakoniérase ní꞉se, O Ephraim?
Onʼnakoniérase ní꞉se Judah?
Ne senineronhkwáhtsera thóh ní꞉ioht kwáh né꞉ne iotsatarónhnion,
kwáh tsi ní꞉ioht ne iohawé꞉ien iostó꞉re teskahaweiáhkwa.
5Ne káti aorì꞉wa kherontsá꞉kon rotitokénse nón꞉we nitsawé꞉non,
Khenonwarhiá꞉khon tsi nitsawé꞉non owén꞉na ne tsitsaká꞉ronte,
tánon nakerihwenhthátsera ohén꞉ton niewé꞉tha tsi ní꞉ioht ne teioswát꞉te.
6Asè꞉ken ne wakaskanékon ne iorihwató꞉ken kanoronkwáhtshera iáh ne kariwiioseokónhas,
né꞉ne raothokhá꞉tshera ne Rawenni꞉io tsi ní꞉ioht ne wateskónte ahiontʼtatʼtse.
7Ók Á꞉tonion꞉ke nón꞉we nathatí꞉iake naterihwaseronhniá꞉tshera;
thóh nón꞉we nahonterihwathéntiate nahionkeʼnikonhráthen.
8Gilead né꞉ne kanatowanénhke titkáhere ne karihwahét꞉ken tsi nihontié꞉ra,
ne ronateristará꞉kwen nonekwénhsa.
9Tsi ní꞉ioht ne ratitnénskwas ratihiatakerón꞉ton rotiráhre nónhkak iatasakonanitiónhkwakwe,
káti ne ratitsihénstatsis wahonhnitsiokón꞉ni;
wasakonashetánion tsi niehiothahí꞉non ne Shechem,
thahotirihóse tehiotenonhianí꞉ton tsi nonsahonterihwatewathánion.
10Nonkweshón꞉as Nisraeró꞉nonke wakatká꞉ton ne iatetsoketó꞉te ioterihwatéha;
ne Ephraim ahonkwè꞉ta ne wathokóktha thóh nón꞉we nikentéron, ne Israel tekonwaiathatiónston.
11Asè꞉ken kwáh í꞉se ó꞉ni, O Judah, nenhsehshientwá꞉ko wenhniserará꞉kwen.
Nó꞉nen ensetkwahtá꞉ko ne raonateraswí꞉iotseras nakonkweʼtashón꞉a,
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.