Hosea 5
5
Tsi Nikará꞉re Naotirihwenhtátsheras Ne Israel Tánon Judah
1Sewathóntet kí꞉ken, O sewatsihénstatsis!
Sewathenʼnikónhraren, O tiónkwes Israerró꞉nonhke!
Sewatahónsatat, O rahonkweʼtashón꞉as ne Ronnontí꞉io!
Asè꞉ken ne karihwenhtátsheras í꞉se sewarihwá꞉kes;
asè꞉ken í꞉se teietsinikará꞉rahkwe ne Mizpah nón꞉we,
tánon ahá꞉re watkonwatakwaríten ne Tabor,
2tánon iosónhwes kashionhiónhni ne Shittim nón꞉we;
ók kwáh kí ratikwé꞉kon tsi enkheréwate.
3Tsienté꞉ri ne Ephraim,
tánon ne Israel iáh ne tewakatasehthénhni;
asè꞉ken nón꞉wa, O Ephraim, ne wasatswatákwe ne kanakwaiesátshera;
ne Israel kwáh tekonwaiathatiónston.
4Tsi nihatiweienó꞉tens iáh tehotihianerenhserá꞉ien
niahonsahónhne raohénton ne raotiní꞉io.
Asè꞉ken naonikónhra ne kanakwaieshátshera rononhà꞉ke ká꞉ien,
tánon iáh tehonwaienté꞉ri ne Roiá꞉ner.
5Tsi nihatináhie ne Israerʼró꞉nons ne iakokaronhniátha ne rahonhà꞉ke;
Ephraim thóh raotinhitsherá꞉kon tonashítsiats;
Judah ó꞉ni skátne tsi tonashitsiats.
6Skátne ne raotitshenenhó꞉kons teiotinakarontónhas tánon ne raotitsenhó꞉kons tionhnónskwarons kwáh é꞉ren enhonhné꞉te
ne nahonwaiatísake ne Roiá꞉ner,
ók iáh kí tahonwaiataʼtshén꞉ri;
é꞉ren rawé꞉ton tsi nón꞉we nihón꞉nes.
7Tsi nihonatié꞉ren iáh tehotirihwathó꞉kenʼne rahonhà꞉ke ne Roiá꞉ner;
asè꞉ken tsi sakonanahkerátston ne ratitsaokónhas iáh kaianerenhseratè꞉ken
ó꞉nen kí norákwahse kwáh enhiakotónhte skátne ne kahentà꞉kes.
8Sewatátist nonákare ne Gibeah nón꞉we,
ne iohonrawátsta Ramah ne nón꞉we nasewatátist.
Sewatátsist ne watewenhnót꞉tha ne Beth-aven nón꞉we;
ionsasewatkáto ne sewashón꞉ne, Benjamin!
9Ne Ephraim kwáh ahonhontsóskon enwá꞉ton
ne entewenhniserón꞉te ne karewatháhtshera;
ne tsi ratinákeres ne Israerʼró꞉nons
wakatró꞉ri nahò꞉ten ne orihwí꞉io í꞉ken.
10Ne rakó꞉ra ne Judah nón꞉we, thóh nihoiatawénhen
kwáh né꞉ne tsi niká꞉ien ne é꞉ren rotihawí꞉ton tsi karistiséron;
rononhà꞉ke kwáh entkawéron
nakenakwáhtshera thóh nenhiotónhake kwáh né꞉ne oné꞉kanos.
11Ne Ephraim ionikonrót꞉tahon, tsekonwatsóron tsi nikonwarihwénton,
tiorì꞉wa tsi iehionikonhrakontákwen ne akásehre ne iáh othé꞉nen tekariwástha.
12Ne káti aorì꞉wa thóh nitiató꞉then kwáh né꞉ne otsinón꞉wa ne Ephraim raorihwá꞉ke,
tánon kwáh né꞉ne iotkénhens ne tsi ronónshote ne Judah.
13Nó꞉nen ne Ephraim sahatʼkáto ne raononwakténtshera,
tánon ne Judah tsi nihotkarewá꞉ton,
ethò꞉ne ne Ephraim Assyria nón꞉we niahá꞉re,
tánon ronontí꞉ioke iahonwató꞉ri
Ók iáh ne tehokwénion nahiatsénhton
khés nahiaiewenhthónke.
14Asè꞉ken thóh nentiatoténhake tsi ní꞉ioht ne kénreks tsi nokwáh ne Ephraim,
tánon kwáh né꞉ne kenhnitohiónha kénreks tsi nokwáh nonkweshón꞉as ne Judah.
Iathenwatsátiste tsi enkhehiaʼtaratiónko tánon ethò꞉ne é꞉ren enskéte;
kwáh ienkhehiaʼthénhawe, tánon iáh tahonsaieniá꞉kenhne.
15Kwáh shé꞉kon thóh iénske tsi nón꞉we tewakatená꞉taien
tsi nió꞉re ienhatiriwaní꞉rate tsi rotiní꞉kon tánon enhonhnésake ne kontsá꞉ke.
Ne tsi nihotironhiá꞉ken kwáh enhionkanithénthen nahatiié꞉na nakithénrat:
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.