Hosea 13
13
Iáh Tathakatástonhke Nahorihwenhthátsera Nisrael
1Nó꞉nen ne Ephraim enhatháti, watsiahontsíshonkwe;
rasenhnowanénkwe ne Israerró꞉nonhke;
ók wahatatsatotares꞉te ne kanhí꞉tsera rahonhà꞉ke ne Baal tánon warenhéie.
2Tánon nón꞉wa iehotikontákwen rotirihwanerenháties
tánon ronónha ronhthatsatonhniseronhnién꞉nis,
né꞉ne kahiatonhnishón꞉as ne kawistará꞉kens ne tsioianénhas tsinihotinikonraiéntas,
akwé꞉kon né꞉ne rawistón꞉ni rasahánions.
“Ronónha ietsiiateskóntʼtas,” enhonhní꞉ron.
Nonkweshón꞉as tionhnónskwahron owí꞉ra kahiatonhnishón꞉as tekonwatinoronhkwahnióntons!
3Eʼthó káti kwáh thóh nenhatihiató꞉theken tsi ní꞉ioht noronhnekéha iahonhawí꞉non
khés kwáh né꞉ne iohawéien ne iostó꞉re teskahawehiákwah,
tsi ní꞉ioht ne kawá꞉he kwáh skenénha kátses noskwenhkarà꞉ke ne tsi iethetáhkwa
khés ne tsioienkwahró꞉te tsi tekatsiserá꞉ton.
4Eʼthó꞉sane rí꞉ken ne Roiá꞉ner Saní꞉io í꞉ken
kwáh tsi náhe sitionhontsá꞉ien ne Egypt;
iáh ónhka tetsienhtéri ne Rawenni꞉io akénhake kwáh nek khók ní꞉i,
tánon tsi nokwá꞉ti ní꞉i iáh teká꞉ien nakó꞉ren ahonshasakohiatakwáhseke.
5Kwáh seh I꞉I konhnón꞉ten ne iahonwentsiathénhake sitesitéron,
né꞉ne iahontsawenthénhen iotónhon.
6Nó꞉nen sakhenón꞉te, kwáh kí wahonáthane;
wahonerientí꞉io, tánon wahoneriasí꞉ione;
ne káti aorì꞉wa wahontsatanikónhren.
7Káti thóh nentsiatothénhne ne ronhnonhà꞉ke tsi ní꞉ioht ne kénreks,
tsi ní꞉ioht ne tahkoskó꞉wa iorahkwarónnion owahát꞉tha enkataséhte tsi nón꞉we niohatátie.
8Thekhehiatasénhte kwáh né꞉ne okwá꞉ri iotewirakénhnen,
tánon enkherá꞉tion ne ioterorókston raoneriá꞉ne;
thóh nón꞉we nenkhehiatónhte tsi ní꞉ioht ne kénreks,
kwáh tsi ní꞉ioht ne karióh tsi sakohiataratiónkwas.
9Kwáh enkonhiatónhte, O Israel;
ónhka aiekwé꞉ni naiesaiatakéna? Asè꞉ken í꞉i ne saienawaséhtshera í꞉ken.
10Kaʼnón꞉we ó꞉nen ní꞉res ne sanontí꞉io, né꞉tho nahónton ahiaiatanónsthate?
Kaʼnón꞉we ne tsi sanatowá꞉nens nihón꞉nes ne iesakó꞉ras,
rononhà꞉ke tsi í꞉sen,
“Táskon ne rontinontí꞉ios ó꞉ni ne ratikoráhshons”?
11Takónhion ne rontinontí꞉ios thóh nakenakwahtsherá꞉kon,
tánon é꞉ren sahihiatenhá꞉wite nakenakwahtsherá꞉kon.
12Ne Ephraim ahorihwaneraháktsheras karehniónhni;
ne rahorihwaneraháktshera wateweiénton tsi ieientháhkwa.
13Ne tehowehesthánion ne sarenhnakerá꞉te sahohiató꞉renhne,
ók iáh kí tehatenikonraʼthókha ranekénteron;
asè꞉ken ne tkarihwaié꞉ri tsi nikahá꞉wi iáh tehathatenéstha
ne tsi kasakáronte ne watewiraráhkwa.
14Ahonsakhehiatotaríhsi ken tsi nokwáh nahoshatsténhsera ne Sheol?
Ahonsakheniá꞉kente ken tsi nokwáh ne kenheiát꞉ne?
O Kenhé꞉ion ká꞉ne sanratarihnétsheras?
O Sheol, ká꞉ne sáwenk atkaronhiátsheras?
Ne kenthénrat iotasehthénhni ne kát꞉rake.
15Eʼthó꞉sane ahónton ahohianerásthen tsi natehostériens,
ne tsitkarahkwí꞉nekens nenkʼkawerénhawe, thenkawerákwe Roiá꞉ner nón꞉we nénhtewe,
iahonwentsiathénhake nón꞉we thetʼkawerákwe;
tánon ne tsi rotnaweró꞉tons enwastatʼthen,
tánon ne raonawerashón꞉as enwastatʼthen.
Kwáh iehosahá꞉then ne tsi rawistaientáhkwa
kwáh tsi nahothénsons ne kanorónsons í꞉ken.
16Ne Samaria ó꞉nenk tsi enwatháwa nahonhí꞉tshera,
tiorì꞉wa tsi nihowenhnón꞉tion nahoní꞉io í꞉ken;
asareʼkó꞉wa ki enhiakowéntʼtho,
nakohiohokónhas ken nihonhnásas kwáh kí kenk ní꞉was tsi enhonwatihiaʼtaratiónhko,
tánon ne kontíhawe nahiotiwiraiéntane kwáh kí enkonwatihiatarátion tsi thenkonwatihiatatʼkháshion.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.