Hosea 12
12
1Ne Ephraim thóh enontsiatá꞉ren tsi teioweratá꞉se,
tánon ne ratiweráhsera kontaseʼkó꞉wa ne tsitkarahkwí꞉nekens nentkawerénhawe;
ne tehatinanetárions nonhó꞉wens tánon ne iaothé꞉nen kaianerénhsera tè꞉ken;
wahontsanerenhserón꞉ni skátne ne Assyria,
tánon ne kénʼie Egypt niahatíhawe.
Ne Kaká꞉res Ateriotarók꞉tshera
2Ne Roiá꞉ner ró꞉ien nasakorihwáro ne Judahró꞉nons;
tánon ó꞉ni enhoré꞉wate ne Jacob ne entsoianénhawe tsi nihaweienó꞉tens,
tánon ne enshokariákten tsi nihahiothenseró꞉ten.
3Ethò꞉ne tsi watewiraráhkwa wahateʼnién꞉ten ne tahonatákwen ne iatateʼkénha Esau,
tánon ó꞉nen rónhkwe sihotónhon Rawenni꞉io wahiaterí꞉io.
4Raʼronhiakeró꞉non wahiaterí꞉io tánon wahatʼkwé꞉ni,
wahthaséntho tánon wahoriwanón꞉tonhse ne kaiatateríhtshera;
Bethel nón꞉we naʼthiatátken,
tánon thóh nón꞉we natnithá꞉ren.
5Ne Sakoiá꞉ner ne ratironhiakeró꞉nons,
Ne raoshén꞉na né꞉ne Roiá꞉ner í꞉ken!
6Ók kí ní꞉se, Saní꞉io nón꞉we nionsáse,
ne satienawastónhak ne raʼonoronhkwáhtshera tánon ne kaianéren,
tánon tasakontakwénhak tsi tsiaterá꞉rat ne Saní꞉io.
7Ne rothenhninón꞉serote, né raháwe ne kaʼnikonrá꞉tha iekontseriharáhkwa,
rahonwéskwani ne tasakoʼnikonkáriate.
8Ne Ephraim iá꞉wenh, “Ah, wakwáhtse,
Iatetsá꞉ti wakeró꞉ron natsiokowáhtsera;
akwé꞉kon í꞉i wakeró꞉ron
iáh ne kanikonrá꞉ton tekatsénron nakonhà꞉ke
né꞉tho karihwané꞉renh ne í꞉ken.”
9Í꞉i ne Watiá꞉ner Saní꞉io í꞉ken
tsi tionhontsá꞉ien ne Egypt natetkonhiathénha;
kwáh kí enkonhiónhnien atoserá꞉kon enseshiterónhtake,
ne tsi niwenhniseraráhkwen nakatkhwáhrake.
10Wakhewenhnárane ne rotitokénhse;
í꞉i seh ne watsiasehránion tsi nahonkʼkathóseron,
tánon rononhà꞉ke ne rotitokénhse entékhawe ne kakaronhniá꞉tshera.
11Ne Gilead thóh nón꞉we tká꞉ien ne karihwanéren,
kwáh kí orihwiiohón꞉we tsi iáh othé꞉nen takariwasthátonke.
Ne Gilgal nón꞉we ronwanateskóntha ne tionhnónskwarons ratí꞉tsi,
káti ne tsi ratitienharáhkwas thóh nenhiá꞉wenhne tsi ní꞉ioht nonénhia iotonhió꞉tons
ne tsi kentarakarát꞉tons ne kahentá꞉kes.
12Ne Jacob tsi tiohontsá꞉ien ne Aram nón꞉we niahá꞉re,
thóh nón꞉we ne nahónton ahanakwahtsénhri
ó꞉ia rónkwe wahohiò꞉thenhse wasakothenhnikónhraren ne rahotshenenhó꞉kons teiotinaʼkarontón꞉as.
13Ne Roiá꞉ner rotokénhse iahotó꞉ri né꞉ne tahontasakohiaʼthénhawe nʼIsraerʼró꞉nons ne Egypt iehón꞉nes,
tánon tashakorihwasniése.
14Ephraim wahét꞉ken tsi ní꞉ioht tsi tahotiná꞉kwen,
káti ne Roiá꞉ner thenhotasénhte né꞉ne raoterihwatewathóntsera entkarihón꞉ni
tánon ne enshokariákthen ne tsi nihonikonrakarewáhtha.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.