Hosea 11
11
Ne Rawenni꞉io Tsi Natesakoterénhthare Iawerohátien nʼIsraerʼró꞉nons Tsi Iáh Thatehontenonwerá꞉tons
1Ne shihatsáha Israel, rinorón꞉kwakwe,
tánon Egypt nón꞉we iahí꞉naton ne riiénha.
2Sénha ienkhená꞉ton,
sénha kí éhren enhónhnete nakonháke;
iehotikonhtákwen ne konwateskontáni Baals,
tánon kahiatón꞉ni ne konwatsienkwaronhniathénis.
3Eʼthó꞉sane í꞉i ririhonhnién꞉ni ne Ephraim onhní꞉ioht tsi ahaténhti,
wathiiátakwe wahihiathenháwa;
ók iáh kí tehonaterièn꞉tare tsi í꞉i seh shekhetsiénton.
4Wakhehiasá꞉rine asehrí꞉ie wá꞉katste ne nónkwe akononronhkwáhtshera í꞉ken,
né꞉ne wé꞉so kanoronhkwáhtshera.
Kwáh thakehiateweientónhase
tsi ní꞉ioht nónhkak thenhiontatsatákwe ietsáha thenhiontatenorónhkwahnion.
Iatkaktsákete rononhà꞉ke tánon wakhenónte.
5Kwáh thóh nón꞉we ienshón꞉ne tsi tiohonsá꞉ien ne Egypt,
tánon kwáh Assyria ensakonontí꞉ioke,
tiorì꞉wa tsi iáh tehonathontá꞉ton nakonhà꞉ke natahontahonénonke.
6Asareʼkó꞉wa í꞉wes raotinatá꞉kons,
watóntha ne raotiwenhnaʼshón꞉as ne ratitsihénstasis,
tánon iakotóntha tiorì꞉wa tsi nihonateʼnikonronhniháties.
7Nakonkweʼtashón꞉as tehonatsiatonháties tsi nihonatekwenháties nakonhà꞉ke.
Né꞉ne kwáh è꞉neken tókte iehonwanatónhnions,
ók kwáh ki iáh tesakowisarakwénhnis.
8Onh ní꞉ioht tsi akonhiatsakwaríhsi, Ephraim?
Onh ní꞉ioht tsi iakonhiát꞉kawe O Israel?
Onh ní꞉ioht tsi thóh nakonhión꞉ni tsi ní꞉ioht ne Admah?
Onh ní꞉ioht tsi thóh nakonhiatsérase tsi ní꞉ioht ne Zeboiim?
Nakwé꞉ri tehiowishónkwa nakonhà꞉ke;
nakenoronhkwáhtshera tsotarí꞉hens tánon ionétskas.
9Iáh ne thakateriwathéntsate ne ioʼtéron akehnhakwáhtshera;
Iáh shé꞉kon tahonshakerihwathón꞉the ne Ephraim;
asè꞉ken í꞉i ne Ní꞉io í꞉ken tánon iáh ónhkwe tè꞉ken ní꞉i,
ne Rohiatatokénhti sewanenhrí꞉hen rénhteron,
tánon iáh thahontá꞉ke nahonkenakwenhénhake.
10Kwáh Roiá꞉ner enhonwáhsere,
raónha ratonhrá꞉iens kwáh né꞉ne kénreks;
né nó꞉nen enhatonhráien,
ne sakoioʼokón꞉as kwáh enhotiiatisónkwahne tsi iaʼtewatséntos nentónhne.
11Kwáh enhotihiatisónhkwahke tsi ní꞉ioht notsiʼténhas ne Egypt nitsoné꞉non,
tánon kwáh né꞉ne orí꞉te ne tsi tiohontsá꞉ien ne Assyria nitsoné꞉non;
tánon kwáh tsi thatiʼterónhtakwe niensekhehiaʼténhawe, rá꞉ton ne Roiá꞉ner.
12Ne Ephraim kwáh ne tewakatsathá꞉ton nonó꞉wens,
tánon nonkweshón꞉as Nisraeró꞉nonke né꞉ne ratinikonráhtha;
ók ne Judah shé꞉kon ki nenhné꞉e Rawenni꞉io skátne tehiatekhahákwa,
tánon iorihwató꞉ken rahonhà꞉ke ne Rohiatatokénhti í꞉ken.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.