Esther 9
9
Sitaeró꞉non Wahshakonáhtonʼte Ne Ronwatíhswenhs
1Ahsenʼiawenréhaton shiwenhniserá꞉te ne Adar, ne shahenhnísera ne ronontí꞉io rorihowanàhton tsi enwatóhetste ne kaianerénhsera, né꞉ne shahenhnísera ne ronwatíhswenhs Sitaeró꞉non ronhská꞉nekskwe nahshakotiʼshén꞉ni, nek tsi Sitaeró꞉non wahonterihwatkwé꞉ni. 2Tsi nón꞉we Sitaeró꞉non nihatinákere tsi ní꞉kon kanataké꞉ron ne kanakerahserá꞉kon, Sitaeró꞉non wahonnitiohkwahserón꞉ni nahshakotírio nónhka nahonwatikarón꞉ni. Ó꞉nen nón꞉kwe akwé꞉kon ronwatitshá꞉nihs iáh ónhka thahonwatiʼshén꞉ni. 3Tsík nahò꞉ten ne tó꞉kenhske í꞉ken, akwé꞉kon ne kakorahserá꞉kon ronateríhonte, ratikoráhshon, ók ó꞉ni ronontí꞉io ronwaióʼtenhse ratihiá꞉tons wahshakotiiaʼtakéhnha Sitaeró꞉non ne tsi ronwatshá꞉nihs ne Mordecai. 4Akwé꞉kon tsi nikanakeráhsera ronaterién꞉tare ne Mordecai tsi ó꞉nen roʼshatstenhserá꞉ien kanontiioʼtsherá꞉kon iotehiaróntie ne raoʼshatsténhsera. 5Ó꞉nen ká꞉ti ne Sitaeró꞉non enhonnónhton tsi nenhshakotiié꞉raʼse ne ronwatíhswenhs. Aʼshareʼkó꞉wa wáhontste tsi wahshakonaʼwéntho.
6Kí꞉ken tsi nón꞉we tkanatakweʼní꞉io, Susa, kí꞉ken Sitaeró꞉non wisk tewenʼniáwe nihá꞉ti nón꞉kwe wahshakonaʼwéntho. 7-10Eʼthó ratiiaʼtarátie oié꞉ri nihá꞉ti Haman shakoioʼokón꞉ʼa (ne roʼníha ne Hammedatha), né꞉ne shakóhswenhs Sitaeró꞉non: Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai, tánon Vaizatha. Iáh kiʼ thé꞉nen tehonaterákwen ne raotikwahtshéhtshera.
11Ne ká꞉ti shahenhnísera tsi nihá꞉ti nón꞉kwe wahshakonaʼwéntho tsi kaná꞉taien ne Susa wahonwahronkà꞉ten ronontí꞉io. 12Iahshakotátiaʼse, Iakonontí꞉io Esther. Wahén꞉ron, “Ne kí꞉ken ne Susa thatinákere, Sitaeró꞉non wisk tewenʼniáwe niiá꞉kon nón꞉kwe wahshakonaʼwéntho, eʼthó ratiiaʼtarátie oié꞉ri nihá꞉ti Haman shakoioʼokón꞉ʼa. Oh ká꞉ti nekén꞉en niahóntiere ne é꞉ren nón꞉we kakorahseraké꞉ron! Nahò꞉ten ne ó꞉ia tesatonhwentsó꞉ni? Enhshié꞉na kíʼ. Takhró꞉ri nahò꞉ten shé꞉kon tesatonhwentsó꞉ni enhshié꞉na.”
13Esther tontaierihwaʼserá꞉ko, “Tóka, Sanontí꞉io, aieserienʼtí꞉io, sheríhon Sitaeró꞉non tsi nón꞉we ne Susa, eʼthó naonsahatí꞉iere enióhrhenʼne tsi nahò꞉ten ronwatirihwà꞉wi tsi nahón꞉tiere ón꞉wa wenhniserà꞉te. Tánon ne raotiieròn꞉ta oié꞉ri nihá꞉ti Haman shakoioʼokón꞉ʼa eʼthó ahshakotiiaʼtaniión꞉ten tsi shakotihniaʼterenktáhkhwa.” 14Ronontí꞉io waharí꞉wenhte eʼthó naiá꞉wenʼne, tánon akarihowanáhton tsi nón꞉we tkanakerahserá꞉ien ne Susa. Thó ká꞉ti nón꞉we ne raotiieròn꞉ta oié꞉ri nihá꞉ti Haman shakoioʼokón꞉ʼa wahonwatiiaʼtaniión꞉ten akwé꞉kon nón꞉kwe nahonwatí꞉ken. 15Ne kaieriʼiawenréhaton shiwenhniserá꞉te ne Adar, kí꞉ken Sitaeró꞉non ne Susa shé꞉kon á꞉re sahontiaʼtaró꞉roke tánon áhsen tewenʼniáwe niiá꞉kon shé꞉kon á꞉re sahshakonaʼwéntho, iáh kiʼ á꞉re thé꞉nen tshiehotíha.
16Kí꞉ken Sitaeró꞉non tsi kakorahseraké꞉ron wahonnitiohkwahserón꞉ni tánon wahontatiatanónhstate. Wahshakonáhtonʼte ne ronwatíhswenhs tsá꞉ta niwáhsen wisk niwenʼniaweʼehtseráhsen nihá꞉ti ne ronwatíhswenhskwe. Nók iáh kiʼ thé꞉nen tshiehotíha. 17Ó꞉nen ká꞉ti ahsenʼiawenréhaton shiwenhniserá꞉te ne Adar. Tsi waʼórhenʼne kaieriʼiawenréhaton shiwenhniseratátie iáh ónhka tehsehshakoʼnawénthon, wahontonʼwéshon tánon wahatikhwà꞉ren. 18Sók kiʼ Sitaeró꞉non ne Susa, wiskʼiawenréhaton shiwenhniseratátie shikahá꞉wi wahatirá꞉ko nahonteʼnikonhró꞉ri, áseʼken ó꞉nen tho náhe tehshakonaʼwénthon ronwatíhswenhs kí꞉ken ahsenʼiawenréhaton tánon kaieriʼiawenréhaton sók ne wiskʼiawenréhaton ó꞉nen wathatí꞉taste tsi ronaterí꞉io. 19Ne ká꞉ti tiorí꞉wa ne Sitaeró꞉non tsi nón꞉we kenʼnikanatá꞉sa ratinákere kaieriʼiawenréhaton shiwenhniseratátie tánon Adar tsi shiwenhní꞉tare rotirákwen ahonteʼnikonhró꞉ri tahontskáhon tánon tahontatawíhon natenná꞉tshera.
Tsi Nikahá꞉wi Ronteʼnikonhró꞉ris Ne Purim
20Mordecai iahahià꞉ton tsi naʼawénhseron tánon iahatʼhiatonhserániehte tsi nón꞉we Sitaeró꞉non thatinakerénion ákta ók ó꞉ni ne í꞉non thatiterón꞉ton tsi nón꞉we nikanakerahseraké꞉ron ne Persia, 21wathroʼriá꞉ne nahatíhsere ne kaieriʼiawenréhaton tánon wiskʼiawenréhaton tsi shiwenhniseratátie ne Adar, thó꞉non nikahá꞉wi niaʼteiohserà꞉ke enhontenʼnikonhró꞉ri. 22Thó꞉non ká꞉ti shiwenhniseratátie ne Sitaeró꞉non wahshakonáhtonʼte ne ronwatíhswenhs; kenʼ ká꞉ti shiwenhní꞉tare ne waʼtewatté꞉ni tahotiʼnikòn꞉renʼne, sók ne kaʼnikonhraksénhtshera tonsontté꞉ni atonhnhahráhtshera tánon atshennonniáhtshera. Wahonwatihró꞉ri tho niwenhniserà꞉te nahontenʼnikonhró꞉ri, ahontekhwá꞉ren, tahontatawíhon natenná꞉tshera tánon aontahshakó꞉non ne rotí꞉ten. 23Sók ne Sitaeró꞉non wahatíhsere tsi nahò꞉ten Mordecai rorihwíson, niaʼteiohserà꞉ke tsi enhontenʼnikonhroríhsheke.
24Haman, roién꞉ʼa Hammedatha ne kahwatsiratátie ne Agag, shakóhswenhs Sitaeró꞉non, wahatihiatonhkwará꞉ko tsi shiwenhniserá꞉teke (“purim” wahatiná꞉tonhkwe) nahonwanáhtonʼte ne Sitaeró꞉non; thó nihorihwíson akwé꞉kon iaʼtahonwatíhsa. 25Sók ne Esther eʼthó niahá꞉ʼen tsi thén꞉teron ronontí꞉io, tánon ne ronontí꞉io iahaténniehte tsi nahò꞉ten rohià꞉ton waharí꞉wenhte tsi ní꞉ioht tsi enrènheie ne Haman, tsi ní꞉ioht tsi rorihwíson ne Sitaeró꞉non tsi enhshakóhtonʼte. Haman tánon shakoioʼokón꞉ʼa wahonwatihnià꞉terenke tsi nón꞉we shakotihniaʼterenkstáhkhwa. 26Ne ká꞉ti tiorí꞉wa Purim waʼkonwahshén꞉non, nó꞉nen enhontenʼnikonhró꞉ri. Ne waʼkarihón꞉ni tsi nahò꞉ten rohià꞉ton ne Mordecai tánon akwé꞉kon tsi nahotiiaʼtawénhseron. 27Sitaeró꞉non wahontatianerenhserónnien tánon ó꞉ni tsi nithonathwatsirí꞉non tánon ne ónhka í꞉ienhre Sitaeró꞉non aiontatená꞉tonhkwe, tánon tsi niioterihwíhson niaʼteiohserà꞉ke kí꞉ken tewenhniserà꞉ke tiótkon ahatíhsere tsi nihotiianerenhserò꞉ten tsi nihohià꞉ton ne Mordecai. 28Ó꞉nen onterihwísa akwé꞉kon tsi nikahwatsí꞉rake ne Sitaeró꞉non ók ó꞉ni ne wahatihwatsirátie tsi kakorahseraké꞉ron tánon tsi ní꞉kon kanataién꞉ton ahonnehià꞉rake ahatíhsere tsi nén꞉we tsi eniotenhniserentènnionke ne Purim.
29Ó꞉nen ká꞉ti ne Ionontí꞉io Esther, ne shakoién꞉ʼa ne Abihail, skátne Mordecai, iahnihià꞉ton wathró꞉ri tsi é꞉so ioianerenhserá꞉ien tsi nikarihò꞉tenʼs ne Purim, ók ó꞉ni Mordecai ohén꞉ton iehohià꞉ton. 30Kí꞉ken kahiatónhsera akwé꞉kon ne Sitaeró꞉non iakò꞉ton tánon ó꞉ni tekahnaʼnetáhkwen iewatenniéhton akwé꞉kon ne énska tenwenʼniáwe tánon tewáhsen tsá꞉ta nikanakerahserà꞉ke ne Persia. Waʼakoteráhshon Sitaeró꞉non ne tiótkon skén꞉nen ahonnonhtonniónhake 31tánon wahshakotihró꞉ri ó꞉ni tsi wahatihwatsiratátie ahatikweniénhsthake awenhnísera ne Purim, thó꞉non nikahá꞉wi tsi ní꞉ioht tsi tehonéhkwen kaianerénhsera tsi enhonentóntiehte ók ó꞉ni nó꞉nen tsi ronatshonʼniónhkwen. Ne ká꞉ti tetsá꞉ron Mordecai tánon Ionontí꞉io Esther rontiianerenhseríson. 32Esther waʼkariwahní꞉rate ne kaianerénhshera tsi nonkwá꞉ti ne Purim. Thó ká꞉ti iotʼhià꞉ton tsi kahweʼnón꞉ni kahiatonhserá꞉kon.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.