Esther 8
8
Sitaeró꞉non Wahonwatihró꞉ri Naontahontatéhnhe
1Thó꞉non ne shaʼhenhnísera Ronontí꞉io Xerxes akwé꞉kon wahshakó꞉ion ne Iakonontí꞉io Esther tsi nahò꞉ten roièn꞉tahkwe ne Haman, ne kí꞉ken ne kwáh shakotahkwáhswenhskwe Sitaeró꞉non. Esther wahonwahró꞉ri ronontí꞉io tsi iatátenonhkwe ne Mordecai, thó꞉non tiotáhsawe wahoianerenhseraièn꞉taʼne iahatáweiaʼte raohén꞉ton ne ronontí꞉io. 2Ronontí꞉io waharíhsi raonihsnónhsawi ne raoteʼnienténhtshera wathró꞉ri (ne ká꞉ti kí꞉ken Haman sahóhkhwa) tánon Mordecai sahó꞉ion. Esther wahonwarihón꞉ten Mordecai ahaterihwatsté꞉riste tsi nahò꞉ten roièn꞉tahkwe ne Haman.
3Esther ionsahonwahtháhrhahse á꞉re ronontí꞉io, iaʼthonwatentshóthahse tánon teionhsénthohs. Wahonwaʼné꞉ken tiók nahò꞉ten nahá꞉iere tahá꞉tahste tsi nahò꞉ten wahétken Haman roteʼnikonrón꞉ni, eʼthó nón꞉we nithoʼtwahtsirí꞉non ne Agag, ne shakóhswenhs Sitaeró꞉non. 4Ronontí꞉io raóʼnhia ohwistanó꞉ron ionniá꞉ton iahshakó꞉tatshe, watié꞉taʼne tánon waʼé꞉ron, 5“Sanontí꞉io, tóka serienʼtí꞉ios tánon takkweniénhstha, tánon íhsehre tkaié꞉ri, ó꞉ia aonsahshianerenhserón꞉ni taká꞉tahste ne Haman roianerenhseríson (ne roién꞉ʼa Hammedatha thó꞉non nithoʼtwatsirí꞉non ne Agag), ne akwé꞉kon ahonwanáhtonʼte tsi nón꞉we Sitaeró꞉non ratinákere ne kanakerahserá꞉kon. 6Oh ká꞉ti nén꞉tiere iaweriahsanòn꞉wahkt tóka kí꞉ken atkaronniáhtshera enionkwá꞉raʼne tsi nihá꞉ti akonkweʼtaʼshón꞉ʼa, ó꞉ni nakhwá꞉tsire akwé꞉kon enionkhiiaʼwéntho?”
7Ronontí꞉io Xerxes wahshakoʼnikonhraientáhsten Iakonontí꞉io Esther tánon ne Sitaeró꞉non Mordecai, “Senikenʼén꞉ion wahihnià꞉terenke Haman roteʼnikonrón꞉ni tsi shakótkonte ne Sitaeró꞉non, tánon akwé꞉kon Esther takhé꞉ion nahò꞉ten roièn꞉tahkwe. 8Nók nahò꞉ten ieioiakén꞉ʼen ne ronontí꞉io raohsén꞉nakon karisténhton#8.8 Enwá꞉ton nahsì꞉ron karisténhton tókaʼ ó꞉ni katsihkwènhton raoteʼnienténhtshera iáh kíʼ thaʼtaontónhkete. Enwá꞉ton ne Sitaeró꞉non iaietshihiá꞉tonse, tsi nahò꞉ten tsahská꞉nekʼs tánon akhsén꞉nakon tsi enkaristénhton ne akwateʼnienténhtshera.”
9Kí꞉ken tsi naʼá꞉wenʼne tewáhsen áhsen shiwenhniserá꞉tehkwe ahsénhaton shiwenhní꞉tarahkwe, awenhní꞉ta ne Sivan. Mordecai iahshakó꞉nonke ronontí꞉io ronwahiatón꞉ni wahshakotenʼnikón꞉ron nahò꞉ten iahshakotihiá꞉tonse ne Sitaeró꞉non tánon ne kakoráhsera, shakotirihwawá꞉se, ronaterihón꞉ton, ne énska tewenʼniáwe tánon tewáhsen tsá꞉ta nikanakerahserà꞉ke tiotáhsawe India tsi niió꞉re Ethiopia. Iahshakohiá꞉tonse akwé꞉kon tsi kakorahseraké꞉ron tsi nihatiwennó꞉tens tánon tsi ní꞉ioht tsi ratihiá꞉tons, ók ó꞉ni ne Sitaeró꞉non tsi nihatiwennó꞉ten tánon tsi ní꞉ioht tsi ratihiá꞉tons. 10Mordecai iahshakohiá꞉tonse raohsén꞉nakon ne Ronontí꞉io Xerxes, tánon waharíhstenhte#8.10 Enwá꞉ton nahsì꞉ron waharíhstenhte tókaʼ ó꞉ni wahatsíhkwenhte ne ronontí꞉io raoteʼnienténhtshera. Ne ká꞉ti wahatiiénhna ne rotirenʼnhá꞉ʼon nahotihsá꞉ten ne teiotí꞉ka, ronontí꞉io raotshenenʼó꞉kon.
11Ne ká꞉ti wahotiʼhiatonhseró꞉taʼse waʼkaʼnikonhraièn꞉tahste ne ronontí꞉io tsi enhshakoríhon ne Sitaeró꞉non akwé꞉kon tsi kanataké꞉ron nahonnitionhkwahserón꞉ni naontahontatéhnhe. Tóka ne ronterí꞉ios thikawenní꞉io nikahwatsirò꞉ten ronatateʼweiennentá꞉ʼon nahonterí꞉io, tóka enthonwanatiaʼtón꞉ti ne Sitaeró꞉non, shakotiioʼokón꞉ʼa tánon ne konnón꞉kwe, kí꞉ken Sitaeró꞉non enwá꞉ton nenthontátehnhe enhonterí꞉io tánon enhshakonaʼwéntho; tsi niió꞉re iaʼtenhshakotíhsa tánon enthatiró꞉roke nahò꞉ten rotiièn꞉tahkwe. 12Kí꞉ken kaianerénhsera, thó ká꞉ti nikahá꞉wi entewatáhsawen tsi kanakerahserá꞉ien ne Persia kwáh thó꞉non nikahá꞉wi ronenhniserarákwen nahonwanáhtonʼte ne Sitaeró꞉non, áhsen iawén꞉re shískare ne Adar, tékeni iawén꞉re shiwenhní꞉tarahkwe. 13Kí꞉ken entkarihowanáhton ne kaianerénhsera akwé꞉kon nón꞉kwe naiakotó꞉kenhse tsi kanakerahseraké꞉ron ó꞉nen kíʼ nen né꞉ʼe ne Sitaeró꞉non enhonatateʼweiennentá꞉ʼon naonsahshakotikáriaʼkse ne ronwatíhswenhs nó꞉nen ienwatenhniseríhewe. 14Ronontí꞉io waharí꞉wenhte ne rotihsá꞉tens raotshenenʼó꞉kon nakontiaʼkarón꞉ti. Tsi ne kaianerénhsera entkarihowanáhton ó꞉ni tsi tkanatakweʼní꞉io ne Susa.
15Mordecai tahaiá꞉kenʼne tsi rén꞉teron ronontí꞉io, ne rotstonhátie ronontí꞉io tsi nihohkweniò꞉ten, oròn꞉ia, karà꞉ken, tánon raoteweiá꞉ra né꞉ne kwáh tkaniaʼtarí꞉io arihwawaʼkonhnéha niwahsohkò꞉ten, tánon é꞉so tsi iohskáhts anòn꞉warore ohwistanó꞉ron. Tsi ká꞉ti iohaténion ne Susa, nón꞉kwe ronatshennón꞉ni tánon tehotihenrehtá꞉ne. 16Ronatonhnháhere ne Sitaeró꞉non tsi ó꞉nen wahonatrákwaʼse nahò꞉ten tsi tehonaʼnikónhrhare nek ronnonhtónnions atonhnhahráhtshera tsi ronatkwénion. 17Tsi ní꞉kon kanataké꞉ron tánon kakorahseraké꞉ron tsi nón꞉we ronontí꞉io raoianerénhsera iotewennà꞉note, ne Sitaeró꞉non wahonnentanó꞉ronhste ronatshennón꞉ni tánon ronatonhnháhere wahatikhwà꞉ren. Tsi naʼá꞉wen é꞉so niiá꞉kon nón꞉kwe, Sitaeró꞉non wahontatón꞉ni tsi ó꞉nen wahonwatitshà꞉niʼke.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.