Esther 7
7
1Sók ki ne ronontí꞉io tánon ne Haman waʼthón꞉tonte ne Esther 2ó꞉nen tekeníhaton iaʼtká꞉ienhte. Tsi rotihnekí꞉ren otsí꞉tsa, ronontí꞉io sahshakoriʼwanón꞉tonhse, “Ó꞉nen Sanontí꞉io Esther, nahò꞉ten tesatonhwentsó꞉ni? Takhró꞉ri tánon enhshié꞉na. Entkón꞉ion ó꞉ni ahsén꞉nen nakenakeráhsera.”
3Ionontí꞉io Esther waʼtkarihwaʼserá꞉ko, “Sanontí꞉io, tóka aeserienʼtí꞉io, waʼkaní꞉tenhte naontáhskon tsi nahò꞉ten keriʼwanóntha, ne kí꞉ken kahská꞉nekʼs ne akónhnheke tánon shaʼakwaià꞉ta ó꞉ni ahonnónhnheke. 4Í꞉ʼi tánon nakonkweʼtaʼshón꞉ʼa waʼonkhiiatenhní꞉non ne aionkhiiaʼwéntho. Tóka iáh tho thaiorihowanénhake nek ne shí꞉ken iakwanáhskwa akénhake, thaʼtaonkwatotá꞉ton tánon iáh thaʼtakonʼnikonhrhará꞉ʼon ne thó꞉non niiorihwà꞉ke; nók ó꞉nen thó꞉ha aionkhí꞉rio tánon aionkhiiàhtonʼte!”
5Thó꞉ne ó꞉nen Ronontí꞉io Xerxes wahariʼwanón꞉tonhse ne Ionontí꞉io Esther, “Ónhka kí꞉ken thó niiorihwatshá꞉niht í꞉rehre eʼthó nahá꞉iere? Kaʼ nón꞉we kí꞉ken rón꞉kwe ní꞉res?”
6Esther tontaierihwaʼserá꞉ko, “Kí꞉ken shonkwáshwenhs tánon shonkwátkonte, ne kí꞉ken ronkweʼtaksénhskwa Haman!”
Haman iahshakotkáhtho ne rotinontí꞉io tsi niió꞉re tsi wahoteronhiénhten. 7Ronontí꞉io tahanitskotákwahte tsi niió꞉re tsi ronaʼkhwén꞉en, iahaiá꞉kenʼne átste raoteʼèn꞉rakon. Haman waháttoke ne ronontí꞉io tsi wahatenʼnikonhrí꞉sa nahorí꞉wenhte tsi nahò꞉ten wahateʼnonión꞉ni, iaʼtonsahotiiá꞉tihste ne Iakonontí꞉io Esther tánon wahshakoʼniténhten tsi rónhnhe. 8Iahatatiaʼtón꞉ti tsi iétskote ne Esther shakoʼnekén꞉ni tsi rónhnhe, ó꞉nen tontahatáweiaʼte ne ronontí꞉io wahonehrá꞉ko tsi nahò꞉ten wahatkáhtho, kanaʼkwenhserá꞉kon waʼthohén꞉rehte, “Kí꞉ken rón꞉kwe í꞉rehre kenʼ iakonontí꞉io thaʼontahshakonónhtonse akhén꞉ton tánon akenónhskon?”
Á꞉re khok tshiehóhson tsi róhthare ne ronontí꞉io sók ne ronwatikwatakwén꞉ni raohnhá꞉tshera tahatihrhó꞉roke ne Haman ranontsì꞉ne. 9Shaiá꞉ta Harbona ronwá꞉iats wahén꞉ron, “Haman sók ná꞉ʼa róhson iontatniaʼterenkstáhkhwa tsi thonónhsote tsi nón꞉we rawé꞉ron enhohnià꞉terenke Mordecai raónha kí꞉ken, Sanontí꞉io, ne shiaʼniakénhton naesenhé꞉ion. Tánon tsá꞉ta niwáhsen wisk niwahsì꞉take nitiótte!”
“Haman eʼthó ehtshisewahnià꞉terenek!” ronontí꞉io waharí꞉wenhte.
10Sók ki Haman wahonwahnià꞉terenke tsi nón꞉we nihóhson Mordecai raorihwà꞉ke. Ó꞉nen kiʼ ne ronontí꞉io iaʼtonsahanaʼkwaieʼwèn꞉taʼne.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.