Esther 6
6
Ronontí꞉io Waʼthorènhsaron Mordecai
1Thó꞉non shiwahshontà꞉te ronontí꞉io iáh tewá꞉tonhs nahó꞉taʼwe, wahshakóhnhaʼne ronateríhonte naontahatíhawe tánon ahonwawennahnóthaʼse tsi kahiatónnion ne kahiatonhserakweʼní꞉io tsi nikaianerenhserò꞉tenʼs ne raonakerahserá꞉kon. 2Tsi nón꞉we nahatiwennahnó꞉ton eʼthó nón꞉we wathró꞉ri ne Mordecai tsi rorihwatshénrion ne tehniiáhse ronontí꞉io ronwaiaʼtanónha né꞉ne ronwatikwatákwen Bigthana tánon Teresh ronwatí꞉iats, tsi wahiatenʼnikonhrí꞉sa tsi enhonwaʼwéntho ne ronontí꞉io. 3Wahariʼwanón꞉ton ronontí꞉io, “Oh ní꞉ioht tsi waʼtehtshitewarènhsaron tánon oh ní꞉ioht tsi waʼtehtshitewarihwaʼserákwahse ne Mordecai?”
Waʼthatirihwaʼserá꞉ko ne ronwaióʼtenhse, “Iáh oʼthé꞉nen teionkwaié꞉ren ne raorihwà꞉ke.”
4“Ónhka kenʼ rón꞉nes ne ronaterihón꞉ton nakenónhskon”? ronontí꞉io wahariʼwanón꞉ton.
Kwáh ó꞉nen Haman tahatáweiaʼte ronontí꞉io raoteʼèn꞉rakon; ne aoríhwa tá꞉re nahoriʼwanón꞉tonhse ne ronontí꞉io nahohnià꞉terenke Mordecai ó꞉nen kaweiennentá꞉ʼon tsi iontatniaʼterénktha. 5Wahonní꞉ron ne raohnhá꞉tshera, “Kenʼ í꞉res ne Haman, rorhhá꞉re taietsatátken.”
“Tahtshiaʼtí꞉nionʼt,” wahén꞉ron ne ronontí꞉io.
6Tahatáweiaʼte Haman, ronontí꞉io iahohtháhrhahseʼ, “Ónhkaʼk kwáh í꞉ken tsi kahská꞉nekʼs tahirènhsaron. Oh ne kén꞉ʼen nahiiatié꞉raʼse kí꞉ken rón꞉kwe?”
Haman wahanonhtónnionhwe, “Ónhka ne kén꞉ʼen ne ronontí꞉io thó niió꞉re tsi tehotonhwentsó꞉ni tahorènhsaron? Í꞉ʼi, kiʼ wáhi.”
7-8Sók waʼthorihwaʼserákwahse ne ronontí꞉io, “Thaʼtíhaf#6.7-8 Tehatiwennaténies otióhkwa ne rotirákwen ne “f” ne áhontste tsi ní꞉ioht ne “wh”. The translation team chose to use the letter “f” rather than the standardised “wh”. ne kwáh wahkwenniaʼnó꞉ronʼs kí꞉ken rón꞉kwe á꞉ratste tsi niwahkwenniò꞉tens ne í꞉se sátstha tánon ateʼnienténhtshera enhatí꞉ren ne ranontsì꞉ne ne satshé꞉nen iakohsá꞉tens. 9Thó꞉ne ó꞉nen ne kwáh é꞉neken thótte ne rahsennowá꞉nen sonkwè꞉ta kí꞉ken rón꞉kwe ahoiaʼtahserón꞉ni kí꞉ken ne ronontí꞉io raohkwénia tánon enhohshá꞉rine tsi enhohsatenhátie ne Mordecai tsi nón꞉we tkanataʼkweʼní꞉io. Kí꞉ken rahsennowá꞉nen enhohthrorihátie tsi í꞉ne: ‘Sewatkáhtho ronontí꞉io tsi ní꞉ioht tsi tehshakorihwaʼserakwén꞉nis nónhka rahská꞉nekʼs tahorènhsaron!’”
10Thó꞉ne ronontí꞉io iahohtháhrhahseʼ Haman, “Tesasteríhen tánon skóha ne wahkwenní꞉ioʼs tánon iakohsá꞉tens, tánon entéhtshon Sitaeró꞉non Mordecai ne karenhsarónhtshera. Akwé꞉kon eʼthó naʼtshé꞉raʼs tsi nahò꞉ten wahskwatenʼnikón꞉ron. Eʼthó entshiaʼtatshén꞉ri tsi ieiontaweiaʼtáhkhwa tsi kí꞉teron thó théntskote.”
11Haman wahakóha atahkwénia tánon ne akohsá꞉tens, wahoiaʼtahserón꞉ni ne Mordecai. Mordecai wahohsá꞉ten tánon Haman rohsharí꞉ne tsi nón꞉we kwáh tkanataʼkweʼní꞉io tánon rorihowanahtonhátie tsi í꞉ne nonkweʼtà꞉ke: “Sewatkáhtho ne ronontí꞉io tsi ní꞉ioht tsi rahská꞉nekʼs tahorihwaʼserákwaʼse kí꞉ken rón꞉kwe tsi waʼthorènhsaron!”
12Thó ká꞉ti nionsá꞉re ne Mordecai tsi nón꞉we ieiontaweiaʼtáhkhwa ronontí꞉io tsi rén꞉teron ók ne Haman waʼthohsteríhen tsi nón꞉we thén꞉teron, roʼrhoronhátie ne rakonhsà꞉ke tsi niió꞉re tsi rotehén꞉ʼen. 13Wahshakohró꞉ri ne ró꞉ne tánon rontenroʼshón꞉ʼa akwé꞉kon tsi nahoiaʼtawénhseron. Thó꞉ne ne ró꞉ne tánon rontenroʼshón꞉ʼa ne ronttokhaʼtsherí꞉io wahonwahró꞉ri, “Ó꞉nen tontáhsawen sationhátie ne saʼshatsténhsera tsi nonkwá꞉ti ne Mordecai. Sitaeró꞉non nahaiaʼtò꞉ten tánon iáh thahskwé꞉ni ahtshehsén꞉ni. Orihwí꞉io tsi enhiaʼshén꞉ni.”
Haman Wahonwáhsehte
14Shé꞉kon sihotíhthare, kí꞉ken ronwatikwatákwen ne ronwaià꞉tanonhnhe ne ronontí꞉io iohsnó꞉re wahón꞉newe iahonwaiaʼténhawe Haman tsi nón꞉we Esther tiakokhwáhere.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.