Esther 5
5
Esther Waʼakohón꞉karon Ronontí꞉io Tánon Haman Waʼakokhwahéhrhahse
1Ahsénhaton shiwenhniserà꞉te tsi iakaontontiéhton Esther ne wá꞉ʼontste tsi niwahkwenió꞉ten ne iakonontiioʼnéha tánon eʼthó iaʼtié꞉taʼne raoteʼèn꞉rakon ohén꞉ton ne tsi ieiontaweiaʼtáhkhwa tsi nón꞉we naʼtehontatkénʼs nonkwehshón꞉ʼa ne ronontí꞉io. Ronontí꞉io thentskwáhere raonitskwahráhne ohén꞉ton tsi ieiontaweiaʼtáhkhwa. 2Tsi ó꞉nen wahshakó꞉ken Iakonontí꞉io Esther átste ítiete, wahawerienʼtí꞉io akohén꞉ton tahá꞉tate raóʼnhia ohwistanó꞉ron ionniá꞉ton. Thó nontà꞉ien tánon iaʼeié꞉na otsiweiontà꞉ke ne raóʼnhia. 3“Nahò꞉ten íhsehre Sanontí꞉io Esther”? wahshakoriʼwanón꞉tonhse ne ronontí꞉io. “Takhró꞉ri nahò꞉ten tesatonhwentsó꞉ni, enhshié꞉na ók ó꞉ni nahserihwanón꞉ton ahsén꞉nen nakenakeráhsera.”
4Tontaierihwaʼserá꞉ko Esther, “Tóka enserienʼtí꞉io, Sanontí꞉io, kahská꞉nekʼs í꞉se tánon Haman akenihón꞉karon ón꞉wa wahsontà꞉te akenikhwahéhrhaʼse.”
5Ronontí꞉io iahoterihwaniéhten Haman kwáh óksaʼk, aʼontà꞉re, ne Esther skátne tahón꞉tonte. Thó ne ronontí꞉io tánon Haman niahá꞉ne Esther tsi tiakokhwáhere. 6Tsi rotihnekí꞉ren otsí꞉tsa, ronontí꞉io wahshakorihwanón꞉tonhse, “Takhró꞉ri nahò꞉ten tesatonhwentsó꞉ni, tánon enhshié꞉na entkón꞉ion. Tsi ní꞉ioht íhsehre ók ó꞉ni ne ahsén꞉nen nakenakeráhsera.”
7Esther tontaierihwaʼserá꞉ko, 8“Tóka, Sanontí꞉io, é꞉so tisarihwaié꞉ri nahskeʼnikonhraié꞉rite tsi nahò꞉ten keriʼwanóntha, kahská꞉nekʼs shé꞉kon aonsakenihón꞉karon, í꞉se tánon Haman taonsetewà꞉tonte enióhrhenʼne. Kwáh í꞉ʼi enkerihwahsherón꞉ni tsi nahò꞉ten éntewake. Eʼthó ne ó꞉nen enkenihró꞉ri nahò꞉ten tewakatonhwentsó꞉ni.”
Haman Enhateʼnikonhrón꞉ni Ahowéntho Ne Mordecai
9Haman tsi ó꞉nen wahóhtaʼne sahohtentionhátie kwáh í꞉ken tsi rotonhnháhere tánon ionʼwé꞉sen tsi ranonhtónnions. Sók wahó꞉ken Mordecai tsi ieiontaweiaʼtáhkhwa ronontí꞉io tsi rén꞉teron, tánon iáh thaʼtehotà꞉ʼon iáh tehonaʼtón꞉ni kakwenienhstáhtshera tsi wahatóhetste, Haman kwáh í꞉ken tsi wahonà꞉khwaʼse. 10Nek tsi wahatatié꞉na tánon sahahtén꞉ti. Thó꞉ne wahshakohón꞉karon rontenroʼshón꞉ʼa raonónhskon naontahón꞉ne tánon wahshakoriʼwanón꞉tonhse ró꞉ne Zeresh skátne ahón꞉tien. 11Raotihén꞉ton tsi waʼthataterènhsaron tsi nihokwáhtshe, tánon tsi nihá꞉ti rotiskenʼrakéhta rowí꞉raien tánon ne ronontí꞉io tsi sénha é꞉neken tsi sahorihón꞉ten tánon tsi niió꞉re tsi raónha sénha é꞉neken roteríhonte tsi ní꞉ioht ne ronátiaʼke ronaterihón꞉ton. 12“Shé꞉kon ó꞉ni,” Haman wahshakohró꞉ri, “Ionontí꞉io Esther waʼkakhwá꞉ren onkeʼnonhá꞉ʼa ronontí꞉io tánon í꞉ʼi waʼonkenihón꞉karon shé꞉kon enióhrhenʼne eʼthó saiáke꞉ne. 13Kwáh iáh oʼthé꞉nen shaʼtékena té꞉ken nakerihwà꞉ke tsi nikarí꞉wes rí꞉kens kí꞉ken Sitaeró꞉non Mordecai eʼthó réntskote tsi ieiontaweiaʼtáhkhwa ronontí꞉io tsi rén꞉teron.”
14Ró꞉ne tánon rontenroʼshón꞉ʼa wahonwatenʼnikón꞉ron, “Iáh kenʼ téhsehre iontatniaʼterénktha ahsón꞉ni tsá꞉ta niwáhsen wisk niwahsì꞉take nitiótte? Enióhrhenʼne ohrhonʼké꞉ne enhtsheriʼwanón꞉tonhse ronontí꞉io ne Mordecai eʼthó ahonwahnià꞉terenke, thó꞉ne ó꞉nen enhsatonhnhá꞉ren tsi enhsatekhwahrá꞉na.”
Haman waharihwanón꞉weʼne nahò꞉ten wahonwatenʼnikón꞉ron, sók ki wahaténhnhaʼne wahonnón꞉ni iontatniaʼterénktha.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.