Esther 4
4
Mordecai Wahshakoriʼwanón꞉tonhse Esther Nahonwaiaʼtakénhna
1Tsi ó꞉nen Mordecai waharihwá꞉ronke tsi naʼá꞉wenʼne waharatsón꞉ko ne raotsherónnia tsi niió꞉re tsi wahoʼnikonhranón꞉wake. Sók ká꞉iare ionniá꞉ton wáhratste, ranontsì꞉ne waʼkenrontá꞉kwen tahàweron, tánon wahanató꞉kten tsi nikaná꞉tes, iorakaré꞉ni tsi tehahsénthos tánon roʼnikonhráksenʼs, 2tsi niió꞉re iahá꞉rawe tsi nón꞉we ieiontaweiaʼtáhkhwa ne ronontí꞉io tsi rén꞉teron. Iáh tshiehotaweiá꞉ton ne tsi iáh thaʼón꞉ton nónhka ká꞉iare iakotsheronnià꞉ton iaiontáweiaʼte. 3Tsi ká꞉ti ní꞉kon kakorahseraké꞉ron tsi nihonakeráhsera ne ronontí꞉io tsi ó꞉nen wahotitó꞉kenhse nahò꞉ten karihwenhá꞉wi ne kaianerénhsera, iorakaré꞉ni tsi wahontshón꞉nionhkwe ne Sitaeró꞉non. Wahonentón꞉tieʼthe, wathonséntho tánon waʼthotihén꞉rehte thó꞉ha akwé꞉kon ká꞉iare wahontsherónniaʼte tánon tsi wakenhrontàkwen eʼthó wahón꞉rate.
4Tsi ká꞉ti ó꞉nen ne Esther akohnhaʼtsheraʼshón꞉ʼa tánon ne ronwatikwatákwen wahshakotihró꞉ri tsi nihatiéhrha ne Mordecai, kwáh í꞉ken tsi waʼtionʼnikonhrhá꞉ren. Iahonwatenniéhten Mordecai atsherónnia nahatahkweniaté꞉ni tsi ká꞉iare rotsheronnià꞉ton, iáh ká꞉ti tehoié꞉nen. 5Sók iahonwén꞉nonke Hathach ne ronwakwatákwen, ne kí꞉ken rón꞉kwe ronontí꞉io roiaʼtará꞉kwen ne akaonhá꞉ʼa tahshakohsnié꞉ne, wahonwahró꞉ri tho iá꞉re tsi nón꞉we ítreʼs Mordecai ahariʼwíhsake oh niiawenhátie tánon oh niiontié꞉ren. 6Hathach, tho niahá꞉re tsi nón꞉we Mordecai ítreʼs, kanà꞉takon ákta tsi nón꞉we ieiontaweiaʼtáhkhwa ronontí꞉io tsi rén꞉teron. 7Mordecai akwé꞉kon wahohró꞉ri tsi nahoiaʼtawénhseron tánon ne Haman tsi ní꞉ioht tsi wahahrhá꞉ratste tsi ní꞉kon enthá꞉iehste ohwísta ne ronontí꞉io raokwahtshéhsera tóka ne Sitaeró꞉non akwé꞉kon enhonwanaʼwéntho. 8Tahó꞉ion Hathach tekahnaʼnetáhkwen ne kaianerenhseríson, Susa nitiawé꞉non iakónhnhas akwé꞉kon ne Sitaeró꞉non ahonwanaʼwéntho. Mordecai wahoriʼwanón꞉tonhse ne Esther aontahshakó꞉ion tánon ahshakoʼnikonhraientáhsten tánon tho nià꞉ien ronontí꞉io raohén꞉ton ahonwaʼnitén꞉tahse ne ahshakoniá꞉kenhte nakaonkweʼtaʼshón꞉ʼa. 9Thó Hathach nahá꞉iere, 10tánon Esther ionsahonwateriʼwaniéhten ne Mordecai: 11“Tóka ónhka rón꞉kwe tóka ó꞉ni iakón꞉kwe ronontí꞉io raoteʼèn꞉rakon ieiontá꞉weiaʼte tóka iáh tshiehshakohnón꞉kon, ó꞉nenʼk tsi eniaié꞉heie. Akwé꞉kon iakoterién꞉tare tho nikaianerenhserò꞉ten; tho tiotáhsawe ronontí꞉io ronwaʼnikonhrá꞉wis tánon akwé꞉kon nón꞉kwe ienakerénion. Tiorí꞉waʼk enhshahkwatà꞉se tsi nikaianerenhserò꞉ten: tóka ne ronontí꞉io enhshakonaʼtón꞉hahse raóʼnhia ohwistanó꞉ron ionniá꞉ton enhsehshakoʼniá꞉kenhte. Ó꞉nen sewenhní꞉ta tsi náhe thakihnón꞉kon ne ronontí꞉io.”
12Tsi ó꞉nen Mordecai wahaié꞉na ne Esther tiakoterihwaniéhton, 13wahshakohronká꞉ten: “Tóhsa séhrheʼk enhseʼnià꞉kenʼne kenʼ ne tsi tho ní꞉se tsí꞉teron tsi rén꞉teron ronontí꞉io. Shaʼtenseniià꞉tawen tsík ónhkaʼk ne Sitaeró꞉non. 14Tóka iáh thé꞉nen thahsì꞉ron ón꞉wa nikahá꞉wi karonhià꞉ke ki néntewe ne kaiaʼtakehnháhtshera raotirihwà꞉ke ne Sitaeró꞉non, tánon enhatiʼniá꞉kenʼne, ók ní꞉se enshí꞉heie tánon iaʼníha raohwá꞉tsire enhonwanáhtonʼte. Ónhka ó꞉ni iakoterién꞉tare—tóka nón꞉wa ne waʼkarihón꞉ni tsi wesanontí꞉ioʼne!”
15Esther tonsahonwarihwaʼserákwaʼse ne Mordecai: 16“Sheiaʼtaró꞉rok akwé꞉kon ne Sitaeró꞉non Susa ratinákere; ensewentóntiehte tánon enskwaterennaién꞉hahse. Tóhsa oʼthé꞉nen í꞉sewak tóhsa ó꞉ni sewahnekí꞉ra áhsen nenwà꞉ta tánon áhsen niwahsón꞉take. Konnón꞉kwe akehnhaʼtsheraʼó꞉kon tánon í꞉ʼi tho neniakwá꞉iere. Thó꞉ne ó꞉nen éʼthó ién꞉ke raohén꞉ton ne ronontí꞉io, iaweronhátien tsi nikaianerenhserò꞉ten. Tóka enkí꞉heie tsi tho nén꞉tiere, enkí꞉heie kiʼ.”
17Mordecai é꞉ren wá꞉rehte akwé꞉kon eʼthó nahá꞉iere nahò꞉ten Esther waʼhonwahró꞉ri.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.