Esther 3
3
Haman Wahateweiennón꞉ni Nahshakóhtonʼte Sitaeró꞉non
1Ohnaʼkénhkha ne Ronontí꞉io Xerxes wahorihón꞉ten né꞉ne kwáh é꞉neken kí꞉ken rón꞉kwe Haman ronwá꞉iats. Haman ne roién꞉ʼa ne Hammedatha, kahwatsirá꞉kon ne Agag. 2Ronontí꞉io waharí꞉wenhte akwé꞉kon ne ronateríhonte tsi nihá꞉ti ronwaióʼtenhse nahonwakwénienhste ne Haman tahontshà꞉kete tánon tahontentshó꞉ten raohén꞉ton. Akwé꞉kon thó nahatí꞉iere, raonhá꞉ʼaʼk Mordecai, iáh tehothontá꞉ton. 3Ronatiaʼké꞉shon ne ronaterihón꞉ton wahonwarihwanón꞉tonhse oh niiontié꞉ren tsi iáh tehotewennaráhkwen ronontí꞉io tsi nahò꞉ten rorihwénhton; 4tshiatewenhniserà꞉ke ronwaʼnekén꞉ni naharihwaié꞉rite iáh tehshakotahonsatá꞉ti. “Sitaeró꞉non nitiatò꞉ten,” wahshakoʼnikonraientáhten, “tánon iáh thatakaʼtshà꞉kete raohén꞉ton ne Haman.” Wahonwahró꞉ri ká꞉ti ne Haman tsi nihorihò꞉ten ne Mordecai wahonnontonnión꞉ko tóka kenʼ Haman enharihwaié꞉na. 5Haman kwáh í꞉ken tsi wahoná꞉khwen tsi ó꞉nen waháttoke ne Mordecai tsi iáh thaʼtahotentshóthahse, tánon iáh thaʼtahatstshà꞉kete 6tsi ó꞉nen wahotó꞉kenhse ne Haman tsi Sitaeró꞉non ne Mordecai, wahateʼnikonhrí꞉sa tsi nenhohré꞉wahte ne ó꞉ni waharihwísa akwé꞉kon enshakóhtonʼte tsi nihá꞉ti Sitaeró꞉non ratinákere tsi nón꞉we nikanakerahserá꞉ien ne Persia.
7Ó꞉nen tékeni iawén꞉re shiiohserà꞉ke shihonontí꞉io kí꞉ken Xerxes, shontenhniʼtatié꞉renhte ne Nisan konwá꞉iats, Haman waharí꞉wenhte nahatihiatonhkwará꞉ko (“purim” konwá꞉iats) ahonterihwahserón꞉ni tsi nikahá꞉wi nenhníhsera tánon niwenhniʼtò꞉ten naróhetste tsi nahò꞉ten roteweiennón꞉ni. Áhsen iawén꞉re shenská꞉rake ne tékeni iawén꞉re shiwenhní꞉tarahkwe ne Adar konwá꞉iats eʼthó nón꞉we, wahatirá꞉ko.
8Haman wahohró꞉ri ronontí꞉io: “Tsi kwató꞉ken nihatihwatsirò꞉ten kén꞉en tehonarení꞉on tsi nisanakeráhsera tánon tsi kanataké꞉ron. Ó꞉ia nihotiianerenhserò꞉ten ne iáh ónhka nakó꞉ren nón꞉kwe thó teiakoianerenhserò꞉ten. Iáh ó꞉ni tehontewennaráhkhwa tsi nikaianerenhserò꞉ten ne sanakerahserá꞉kon, iáh ká꞉ti í꞉se thahshatshennonniáhthahkwe nahsherí꞉wawaʼse. 9Tóka ká꞉ti, Sanontí꞉io, enhserienʼtí꞉io ahshianerenhserón꞉ni ahonníheie. Tóka thó nénhsiere, kwáh orihwí꞉io kón꞉nis tsi enkkwé꞉ni tánon tsá꞉ta tewenʼniáwe wisk niwáhsen niwenʼniaweʼetsheráhsen nikakontsherá꞉ke#3.9 750,000 pounds = 375 tons kahwistarà꞉ken éntionte ne sakwatshéhsera énshatste tsi nisanakeráhsera.”
10Ronontí꞉io waharíhsi raonihsnónhsawi, ne ioteríhonte ne enhatirístenhte karihwahní꞉rats tsi nahò꞉ten enhatiianerenhserísa, tánon tahó꞉ion ne kwáh shakóhswenhs, Sitaeró꞉non, Haman, Hammedatha roién꞉ʼa eʼthó nithotwatsirí꞉non ne Agag. 11Ronontí꞉io wahohró꞉ri, “Kí꞉ken nonkwehshón꞉ʼa tánon raotihwístha í꞉se sá꞉wen; enhsanónhton tsi nenhsheié꞉raʼse.”
12Tsi ká꞉ti iaʼkáhewe ne áhsen iawén꞉re shískare ne tiontenʼnitatierénhton, Haman wahshakoiaʼtaró꞉roke ne Ronontí꞉io ronwahiatón꞉ni tánon wahaianerenhserísa ne takawennaténionke akwé꞉kon tsi nihatiwennó꞉tens tánon tsi ní꞉ioht tsi ratihiá꞉tons tsi nihonakeráhsera ne ronontí꞉io, tánon akwé꞉kon iahshakonatenniéhten ne ratikoráhshon tánon ne ronaterihón꞉ton. Raohsén꞉nakon ne Ronontí꞉io Xerxes tánon karisténhton ne raonihsnónhsawi. 13Ne tehonráhtats ká꞉ti kí꞉ken kaianerénhsera akwé꞉kon kakorahseraké꞉ron niahatíhawe tsi nikanakeráhsera. Ne ká꞉ti karihwenhá꞉wi tsi nenkaié꞉ren sewenhnísera áhsen iawén꞉re shískare ne Adar, akwé꞉kon ne Sitaeró꞉non—kenʼnithotiión꞉sa ók ó꞉ni ne thotí꞉ions, konnón꞉kwe tánon ratiksaʼokón꞉ʼa—enhshakonáhsehte. Iáh thé꞉nen tekentén꞉ron, tánon tsi nahò꞉ten rotí꞉ien ienhatíhawe. 14Tsi nahò꞉ten wathró꞉ris kí꞉ken kaianerénhsera ne ionniá꞉ton nakwé꞉kon aiakotó꞉kenhse tsi ní꞉kon kanakerahseraké꞉ron, akwé꞉kon aiakotateweiennentá꞉ʼon nó꞉nen ienwatenhniseríhewe.
15Ronontí꞉io tsi ní꞉ioht tsi thotá꞉ti akwé꞉kon aiakotó꞉kenhse tsi nón꞉we tkanataʼkweʼní꞉io ne Susa, tánon ne tehonráhtats iahatíhawe kaianerénhsera akwé꞉kon tsi nikanakeráhsera. Ronontí꞉io tánon Haman wahiátien tánon wathiatnekákha, ók ne tsi tkaná꞉taien ne Susa kwáh í꞉ken tsi teioʼnikónhrhare.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.