Esther 2
2
Esther Waʼonontí꞉ioʼne
1Ohnaʼkènhkha tsi ó꞉nen iáh thoʼtehshonakhwén꞉ʼen ne ronontí꞉io, tió꞉konte ranonhtónnion tsi niiotié꞉ren ne Vashti tánon tsi ní꞉ioht tsi wahaianerenhserísa ne aorihwà꞉ke. 2Ótiaʼke ne ronontí꞉io ronwaʼnikonhrá꞉wis wahonní꞉ron, “Ó꞉ia séhsak né꞉ne kwáh tokén꞉ʼen tiotiiaʼtáhskats kenʼnitiotiiónhsa tánon ne iáh tekontiʼnahkwaienté꞉ri. 3Enhsherihón꞉ten ne ronateríhonte tsi kakorahseraké꞉ron tsi nisanakeráhsera, tánon aontakonwatiiaʼténhawe ne kwáh tiotiiaʼtáhskats, tánon nʼethó akonwatí꞉teron tsi nón꞉we saiaʼtasehtsheraʼó꞉kon kontí꞉teron kén꞉en tsi kanontsístaien kanataʼkweʼní꞉io Susa. Hegai né꞉ne tehonwaneniatáhkwen, né꞉ne konnón꞉kwe ne shakoʼnikón꞉rare skátne shé꞉teron nonátiaʼke tánon enhatonkweʼtahsherón꞉ni ne sénha eniotiiaʼtahskátston. 4Thó꞉ne ó꞉nen shehiaʼtará꞉ko ne kwáh entehsenón꞉weʼne ne iakonontí꞉io tentsé꞉taʼne aonaktà꞉ke ne Vashti.”
Wá꞉rehre ne ronontí꞉io ioiánere tsi ní꞉ioht tsi wahonwatenʼnikón꞉ron, eʼthó ki nahá꞉iere.
5Ne Susa thó nón꞉we nihenʼteròn꞉tahkwe Sitaeró꞉non Mordecai ronwá꞉iats roién꞉ʼa ne Jair, kenʼtá꞉rakon ne Benjamin nithoʼtwatsirí꞉non ne Kish tánon Shimei. 6Tsi ó꞉nen Ronontí꞉io Nebuchadnezzar ne Babylonró꞉non iahoiaʼténhawe ne Ronontí꞉io Jehoiachin Judahró꞉non wahonakerákwahte tsi nón꞉we tkaná꞉tien ne Jerusalem tánon é꞉so ronatiaʼké꞉shon iahonwatiiaʼténhawe eʼthó raiatarátie ne Mordecai. 7Ronarasé꞉ʼa Esther iontá꞉tiats, ne ká꞉ti ne Sitaerononké꞉ha Hadassah nakohsén꞉na; kwáh í꞉ken tsi iakoiaʼtáhskats tánon kenʼnitiaʼkoién꞉ʼa ó꞉ni ieià꞉tase. Shaʼní꞉heie ne shakotiién꞉ʼa, Mordecai wahatewirará꞉ko tánon wahshakawehià꞉ron tsi ní꞉ioht raónha shakoién꞉ʼa.
8Tsi ká꞉ti ó꞉nen ne ronontí꞉io á꞉se wahaianerenhserísa é꞉so nikón꞉ti ne kenʼnitioʼtiión꞉sa takonwatiiaʼténhawe ne Susa, Esther tho ieiaʼtarátie. Akaónha ó꞉ni eʼthó wahshakotíʼteron tsi nón꞉we ronontí꞉io rén꞉teron. Hegai ronwá꞉iats ne shakoʼnikón꞉rare ronontí꞉io raoiaʼtaseʼtsheraʼó꞉kon. 9Hegai kwáh í꞉ken tsi wahshakonón꞉weʼne Esther. Iáh ká꞉ti tehotenʼniskwáhton kwáh óksaʼk tahatáhsawen tsi wahatonkweʼtahserón꞉ni nek ne kwáh kakhwí꞉io wahshakotí꞉nonte. Thó꞉non nahshakonákton tsi nón꞉we kwáh tkanaktí꞉io tánon waʼtehshakoiaʼtaiehstáhsi tsá꞉ta nikón꞉ti kenʼnitioʼtiión꞉sa nʼethó kontí꞉teron ne Esther akonwaióʼtenhse.
10Mordecai wahshakohró꞉ri ne Esther tóhsa wé꞉ne aiakón꞉ni tsi Sitaeró꞉non naʼehwatsirò꞉ten. Waʼerihwáhsehte ki. 11Mordecai tshiatewenhniserà꞉ke tóhka niháktons tsi nón꞉we nikontí꞉teron ne kontiiá꞉taseʼ ohnaiá꞉wenʼne nahotó꞉kenhse oh ní꞉ioht tsi iakohnhétie ne Esther tánon tsi neniakoiá꞉tawen.
12Ne ká꞉ti tsi niiorenʼnhá꞉ʼon tiótkon tsóhsera nikarí꞉wes tenkonwatíhsnieʼne niaʼté꞉kon iakonkweʼtiiohstáhkhwa énhontste. Iá꞉iaʼk niwenhnì꞉take kén꞉ie myrrh wenhserakonʼón꞉shon enkhonwatiiatóhkaʼwe, tánon shé꞉kon iá꞉iaʼk niwenhnì꞉take thiwenié꞉nate balsam nón꞉wa énhontste. Thó꞉ne ó꞉nen skontiiaʼtátshon tsi ienkonwatiiaʼténhawe raohén꞉ton ne Ronontí꞉io Xerxes. 13Nó꞉nen ká꞉ti ne kaià꞉tase raohén꞉ton ne ronontí꞉io ién꞉we, aónha enwanónhton nahò꞉ten enwatsherónniaʼte. 14Oʼkarahsnéha nikahá꞉wi eʼthó nienhén꞉we, sók ohrhonʼké꞉ne é꞉ren nón꞉we ienkonwaiaʼténhawe tsi nón꞉we thiʼkontí꞉te tkontí꞉teron, tsi nón꞉we tehshakoʼnikón꞉rare ronontí꞉io raoiaʼtaseʼtsheraʼó꞉kon kí꞉ken rón꞉kwe né꞉ne ronwakwatákwen, Shaashgaz ronwá꞉iats. Iáh ká꞉ti raohén꞉ton ne ronontí꞉io tshiaʼonsá꞉ien tsík tóka kwáh í꞉ken tsi wahshakonón꞉weʼne, akohsén꞉na én꞉ratste tsi ienshakó꞉nonke.
15Ó꞉nen ká꞉ti iakáhewe ne Esther raohén꞉ton ronontí꞉io nià꞉ien. Shakoién꞉ʼa ne Abihail tánon ronarasé꞉ʼa ne Mordecai, ne kí꞉ken rotewirarákwen ne Esther. Akwé꞉kon nón꞉kwe enhshakotí꞉ken rotinehrákwas tsi niiakoiaʼtáhskats. Tsi ó꞉nen iaʼkoiá꞉thewe Hegai né꞉ne shakoʼnikón꞉rare konnón꞉kwe wahshakohró꞉ri kaʼniká꞉ien aiontiá꞉tawihte. 16Ne ká꞉ti kí꞉ken Ronontí꞉io Xerxes ó꞉nen tsá꞉ta niiohserà꞉ke shihonontí꞉io oieríhaton shiwenhní꞉tare tsi nikahá꞉wi ne Tebeth, Esther tahshakotiiaʼténhawe raohén꞉ton Ronontí꞉io Xerxes tsi nón꞉we thén꞉teron. 17Kí꞉ken ronontí꞉io akaónha tiaʼonhá꞉ʼa tahshakonón꞉weʼne tsi nikón꞉ti ne konnón꞉kwe, ne aonhá꞉ʼa tahonwaʼnikonhraié꞉rite tánon wahshakonó꞉ronhkwe. Ienonhtsí꞉ne tahá꞉ren ionontí꞉io iotsistónnion aonòn꞉warore, tánon ne iakonontí꞉io wahshakaón꞉ni akaónha thonsahshakó꞉tahste aonaktà꞉ke Vashti. 18Sók ne ronontí꞉io waʼhakhwá꞉ren wahshakotonhnhahéhrhahse ne Esther akwé꞉kon wahshakohón꞉karon ne ronaterihón꞉ton tánon ne ronwahiaʼtón꞉ni. Waharí꞉wenhte tsi iáh ónhka thaiakoióʼten tsi nihonakeráhsera enhonteʼnikonhró꞉ri, tánon niaʼté꞉kon kanonrón꞉shon wahshakowíhon.
Mordecai Wahoʼniá꞉kenʼte Ronontí꞉io
19Tsi nikarí꞉wes ká꞉ti ronontí꞉io wahorihón꞉ten Mordecai nahaterihwatsté꞉rihste ne ronontí꞉io raorihwaʼshón꞉ʼa. 20Ók ne Esther, shé꞉kon iakorihwahséhton tsi Sitaeró꞉non naʼehwatsirò꞉ten, Mordecai shakohró꞉ri naierihwáhsehte, tánon wahonwawén꞉narahkwe kiʼ tsi ní꞉ioht tsi ronwaʼwennaráhkhwakwe shiʼieksá꞉ʼa tsi ní꞉ioht tsi shakawehiá꞉ron.
21Tsi ká꞉ti nikarí꞉wes shihoteríhonte Mordecai ronontí꞉io tsi rén꞉teron, Bigthana tánon Teresh, tehniiáhse ronwatikwatákwen ne kí꞉ken niʼnikón꞉rare tsi nón꞉we ieiontaweiaʼtáhkhwa tsi thanonhwétstha ne ronontí꞉io ne ká꞉ti kí꞉ken é꞉so tsi wahonwaná꞉khwaʼse ne Ronontí꞉io Xerxes tánon wahiatenonhión꞉ni nahonwáhsehte. 22Mordecai waharihwatshén꞉ri, wahshakohró꞉ri Iakonontí꞉io Esther, sók nen né꞉ʼe ronontí꞉io ionsahonwahró꞉ri tsi nahò꞉ten waharihwatshén꞉ri ne Mordecai. 23Wahatiriʼwíhsake, tánon wahatirihwatshén꞉ri tsi tó꞉kenhske, sók tetsá꞉ron wahonwatihnià꞉terenke. Ronontí꞉io wahaténhnhaʼne nahatihiá꞉ton kahiatonhseraʼkweʼní꞉io tsi nihonakeráhsera tsi naʼawénhseron.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.