Esther 1
1
Ionontí꞉io Vashti Iáh Tehonwawennaráhkwen Ne Ronontí꞉io Xerxes
1-2Tsi nón꞉we nihatientáhkhwa ne Ronontí꞉io Xerxes, eʼthó nón꞉we tkanatakweʼní꞉io ne Susa tsi nón꞉we ne Persia, énska tewenʼniáwe tánon tewáhsen tsá꞉ta kakorahseraké꞉ron tehasnonhsáhere, India tiotáhsawe tsi niió꞉re Ethiopia.
3Ahsénhaton niiohserà꞉ke shihonontí꞉io waʼhakhwá꞉ren, akwé꞉kon wahshakohón꞉karon ne ronateríhonte. Ók ó꞉ni ne ronterí꞉ios ne Persia tánon Media eʼthó rón꞉neʼskwe, ók ó꞉ni ne ratikoráhshon tánon ne é꞉neken thonátteʼs tsi kakorahseraké꞉ron. 4Iá꞉iaʼk niwenhnì꞉take tsi wahatená꞉iehste wahshakonaʼtón꞉hahse tsi niiokwáhtshe ne raonakeráhsera tánon tsi niiohskatsténion tsi nahò꞉ten ká꞉ien ne raonakerahserá꞉kon.
5Tsi ó꞉nen ontóhetste, kí꞉ken ronontí꞉io ó꞉ia sahakhwá꞉ren ne nón꞉wa sahshakohón꞉karon nʼethó ratinákere tsi kaná꞉taien ne Susa, rotikwáhtshe ók ó꞉ni ne rotí꞉ten. Tsiahiáʼksera tsi wahontonʼwéshen eʼthó raoteʼèn꞉rakon ne ronontí꞉io. 6Raoteʼèn꞉rakon kanatahserón꞉ni ne oròn꞉ia tánon karà꞉ken ioʼarenʼtónnion, kahwanerénkhon arihwawaʼkonhnéha ne kwáh kaniaʼtarí꞉io tánon kahwistarà꞉ken teiotweʼnonniánion eʼthó iotiienawá꞉kon karontó꞉ton kanenʼiarà꞉ken. Wanitskwahraʼtsheré꞉sonʼs ohwistanó꞉ron tánon kahwistarà꞉ken ionniá꞉ton eʼthó wahatiké꞉ron ateʼèn꞉rakon, tánon kwáh eʼthó kanenʼiarà꞉ken kéntsʼkaron, teiohstarátheʼs onekwènhtara kanenʼianó꞉rons, tsi naʼteiohterón꞉rote ne kaʼnistenhsherakweʼní꞉io ne onekórha tánon oròn꞉ia nikanenʼiò꞉tens. 7Tsi tahonwén꞉non nahatihnekí꞉ra akwé꞉kon ohwistanó꞉ron ne teiontnekontáhkhwa, iáh tékeni ne shá꞉ka té꞉ken tánon ne ronontí꞉io iáh tehoní꞉on tsi ní꞉kon taháhtkaʼwe ne raohné꞉ka otsí꞉tsa. 8Kwáh iáh tshiewató꞉ktha to ní꞉kon ahatihnekí꞉ra; ronontí꞉io wahshakónhnhaʼne ne ronwaióʼtenhse tsi aontahshakó꞉non akwé꞉kon nón꞉kwe tsi ní꞉kon tehonatonwentsó꞉ni.
9Tsi nikarí꞉wes ronatonʼwéshen, kanónhskon tsi kén꞉teron Ionontí꞉io Vashti, aónha ionenhrón꞉ni tiokhwáhere ne konnón꞉kwe.
10Tsatáhkhaton shiwenhniserà꞉ke tsi ronatekhwáhere ó꞉nen ronontí꞉io tsi rohnekí꞉ren tó꞉kenske tsi rotonhnháhere, iahshakó꞉nonke ne tsá꞉ta nihá꞉ti tehonwatineniatáhkwen né꞉ne kwáh ákta raónha ronwaioʼténhse, Mehuman, Biztha, Harbona, Bigtha, Abagtha, Zethar tánon ne Carkas. 11Wahshakónhnhaʼne akonwenhnónksa Ionontí꞉io Vashti, tánon aonnonhwaró꞉roke ne iotsistónion. Ne ionontí꞉io kwáh í꞉ken tsi ioiatáhskats, tánon ronontí꞉io tehotonhwentsó꞉ni ahatená꞉iehste kí꞉ken shakohonkará꞉wi tánon ne ratihsennowá꞉nenʼs. 12Tsi ó꞉nen ne ronwaióʼtenhse waʼkonwahró꞉ri Ionontí꞉io Vashti tsi wahshakónhnhaʼne ne ronontí꞉io naontá꞉we, iáh teiohthontá꞉ton nʼethó iaiawé꞉non. Kwáh í꞉ken tsi wahoná꞉khwen ne ronontí꞉io.
13Tsi nihoianerenhserò꞉ten ne ronontí꞉io enhshakoriʼwanón꞉tonhse ne shakotiʼnikonhrá꞉wis tsi nikaianerenhserò꞉tenʼs, né ká꞉ti ó꞉nen iahshakó꞉nonke ronónha ne ronaterién꞉tare tsi nakaié꞉ren. 14Ne ká꞉ti kí꞉ken iotká꞉te shakoniahé꞉sen nahonwaʼnikón꞉ron, Carshena, Shethar, Admatha, Tarshish, Meres, Marsena tánon Memucan—tsá꞉ta nihá꞉ti ne kwáh é꞉neken tsi ronateríhonte tsi kanontiiohtsherá꞉ien ne Persia ók ó꞉ni ne Media. 15Wahshakohró꞉ri kí꞉ken ronón꞉kwe, “Í꞉ʼi Wakenontí꞉io Xerxes, iakheiaténniehte ne iontióʼtenhse akonwahró꞉ri Ionontí꞉io Vashti tsi waʼkerihwá꞉ren, iáh teiotewennaráhkwen! Nahò꞉ten wá꞉ton ne kaianerénhsera tsi naietewaié꞉raʼse?”
16Sók ne Memucan iahotewennontiéhten ne ronontí꞉io tánon ronaterihón꞉ton: “Ionontí꞉io Vashti wesatéhaʼte iáh í꞉se khok té꞉ken akwé꞉kon ó꞉ni ne ronaterihón꞉ton tánon akwé꞉kon ne ronón꞉kwe tsi nikanakeráhsera! 17Akwé꞉kon ne konnón꞉kwe tsi kanakerahserá꞉ien enhonwatikén꞉ron ne iotiniákhon, tsi niiohsnó꞉re enkontirihwá꞉ronke tsi naká꞉iere ne ionontí꞉io. Enkonní꞉ron: “Ronontí꞉io Xerxes wahá꞉naʼne ne Ionontí꞉io Vashti nʼethó naontá꞉we raohén꞉ton tánon iáh teiohthontá꞉ton.” 18Nó꞉nen ne rotiniákhon ne ronaterihón꞉ton ne Persia tánon Media enkontirihwá꞉ronke tsi nóntiere ne ionontí꞉io, enhonwatihró꞉ri ne iotiniákhon ohén꞉ton tsi niió꞉re enwatenhniseró꞉kten. Akwé꞉kon ne konnón꞉kwe iáh thaʼonsahonwatikwénienhste ne iotiniákhon tánon ne ronón꞉kwe enhshakotiná꞉khwaʼse ne rotiniákhon. 19Tóka, Sanontí꞉io, enserienʼtí꞉io ahshianerenhserón꞉ni ne Vashti tóhsa nowén꞉ton aonsaioké꞉tohte raohén꞉ton ne ronontí꞉io. Enkahiá꞉tonke kaianerenhserá꞉kon ne Persia tánon Media, ne tóhsa nowén꞉ton taonsakaténion. Thó꞉ne akó꞉ren aonaktà꞉ke taonsaié꞉taʼne iakón꞉kwe ne sénha tionkweʼtaié꞉ri. 20Nó꞉nen ne enhshianerenhserísa akwé꞉kon tsi ni kowá꞉nen ne sanontiióhtshera eniotitó꞉kenhse kí꞉ken akwé꞉kon ne konnón꞉kwe enhonwatikwénienhste ne iotiniákhon tóka rokwáhtshe tóka ó꞉ni ró꞉ten.”
21Ronontí꞉io tánon ne ronaterihón꞉ton kwáh í꞉ken tsi wahatirihwanón꞉weʼne, eʼthó nahá꞉iere ronontí꞉io tsi nahò꞉ten Memucan wahoʼnikón꞉ron. 22Tsi kakorahseraké꞉ron ne ronontí꞉io raonontiióhtshera iahaterihwániehte tsi nihatiwennó꞉ten tánon tsi ní꞉ioht tsi ratihiá꞉tons ne raotikorahserá꞉kon, aieʼnikonhraién꞉tate akwé꞉kon ne ronón꞉kwe ratiiaʼtakweʼní꞉io ne raotinónhskon tánon tsi nahò꞉ten enthontá꞉ti ne enkáhawe.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.