2 Thessalonians 2
2
Ne Ranikonrák꞉sen
1Ne aoriwáhke tsi tontáre ne Sonkwahiáner Ié꞉sos Kerístos tánon enhionkihiatarórohke ne skátʼke aitewahkwekónhake ne rahónha; Kwáh nekénʼnis, tewatenroʼshónʼa, 2Né꞉ne tóh꞉sa thóh nahontsesénhake ne taisewahnitónnien tsi nisewahnontónnions tóhka ó꞉ni ahontesewahnikónrenne tsi ne sewáhronke ne Roiá꞉ner rawenhnísera tsi ónhwe. Tóhka nónwah tsi iakonontonniónʼon né aiònkwenh tsi nikaríwes iehiakwahriwákens tóhka ó꞉ni tsi ionkwahteriwahnóthe, tóhka ó꞉ni kahiatonseráke ahionkwahiátonke. 3Kwáh tóh꞉sa ónka ietʼtsiríʼon naietʼtsinikonráhten kwák tsík nahontahiotierahtónhake. Asèhken iáh tahontenniseríhewe tsi nió꞉re nonakènkha aterihiósera iekáhewe tánon ne ranikonrákʼsen enhatohtáshion, tsi nikáien ne kwáh onéson niahotʼtakwahrishonhátie. 4Kwáh enshakohiotátʼtse tsi nahiotónhake tsi ronwahʼsénnnaiens ne ní꞉io ronwahtinathónkwah tánon rahónha éneken enhatatónni. Kwáh ó꞉ni ienhatáwehiate tánon thóh ienhátien ne Rawenni꞉io raononsatokentíke tánon enhatʼróri rahónha ne Ní꞉io.
5Iáh kén teshéhiare? Akwékon kí꞉ken konróri ne skátʼke sítewes. 6Nók kíʼ nek sáka iáh tewáhtons kí꞉ken né nahiáwenhne nónwah, tánon shahteriéntare nahóten íken. Ne kwáh ienkáhewe, káti, ne ranikonrákʼsen enhatohtáshion. 7Ne tehiotierónnion ne karihwahneraháktshera ónenk iohiotáties, nók tsi nieniáwenhne iáh ónenk thóh tahiáwenhne tsi nió꞉re tsi nikáien ne thóh ienawáhkon ahʼhéren enhonwahiatenháwithe. 8Ethò꞉ne ne ranikonrákʼsen enhonwahiatotáshion, nók nónen énrahwe ne Roiá꞉ner Ié꞉sos, ne enhonnonwahriákon tsi nen hotonniseráhiente tánon né enhoríhiothe tsi nihohiataneráhkwat. 9Ne ranikonrákʼsen né enhaháwine ne ranesonrónon raoshatsténsera tánon iatékon tsi nenhaieránion ne ioriwahnerahkwahténions ó꞉ni ne ioneráhkwahs, 10tánon né enshahkósten niatékon tsi ní꞉ioht ne kariwahétʼkens ne kanikonráhton tsi nihiákon nenshahkótonthe. Enhatihiatáton tioríwah tsi iáh tahtehonaróton iáh ó꞉ni tehotinoronkwáhʼon ne oriwiʼiohónwe né꞉ne ahiakoniakénton. 11Tánon ne Rawenni꞉io ne tahaténiethe ne aterientawenhréhtsherah ne ronónhake nónwe nahioʼióten né nahónton ne ahontahonnétakwe tsi nahóten ne iáh tókenske tèken. 12Tsi neniáwenhne tsi nihiákon ne iáh tetiakawetákwen noriwiʼioʼónwe, nók iakotenikonroríhon ne kariwahʼnerahaktsherákon, tsi enhiontatʼréwahthe.
Kentenratʼtsherákon Nónwe Niieshahiatarákwen
13Teiontonwenhtióhon ne tiókonthe tahsakwanonweratónseke ne Rawenni꞉io níse sewahriwáhke, tewatenroʼshónʼa, í꞉se ne Roiá꞉ner tsi sewahnorónkwah. Asèhken í꞉se tisewahtierénton ne Rawenni꞉io tsi sewahiataráhkwen ne kwáh sontontáshahwen naisewahniákenthe ne Rawenni꞉io raoshatsʼténsera ne í꞉se rahonkwetatokénti aisewáton ó꞉ni tsi tisewetákwen ne oriwiʼioʼónwe. 14Ne Rawenni꞉io iehianáton ne tsi thóh nón nikwahteriwahnótani ne kariwí꞉ios; iehianáton ne nashahtiénawasthe ashahtiátaren ne raohiatanerahkwahtsherákon ne Sonkwahiáner Ié꞉sos Kerístos. 15Káti, tewatenroʼshónʼa, sewahriwahnirónhak ó꞉ni sewahienawahkónhak tíken oriwiʼioʼónwe tsi nikwahrihonniénni, tetsáron tsi nihionkwahteriwahnóthe ó꞉ni tsi nihionkwahiáton. 16Aiáwens ne Sonkwahiáner Ié꞉sos Kerístos ó꞉ni ne Ní꞉io Sonkwahníha, tsi nikaíren ne sonkwahnorónkwahon tánon ó꞉ni ne raotenretserákon teshonkwáwi ne iáh tehionéronse kanikonrahnirátʼtshera tánon ne ioriwahníron arahrátʼtshera, 17atsisewahnikonrahnírathe ó꞉ni atsisewahshatsʼténseron ne tiókonthe ne sewahióten ó꞉ni aisewénron nahóten ne iohiánere.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.