2 Thessalonians 1
1
1Kór kíʼ nón nitsawéhnon, Silas, tánon Timothy—
Ne nonkwesónhas ne thonetákwen ne Thessalonica nónwe, né꞉ne Rawenni꞉io rahonkwetaʼsónhas Sonkwahníha ó꞉ni ne Roiá꞉ner Ié꞉sos Kerístos:
2Aiá꞉wens ne Rawenni꞉io sonkwaníha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skénnen.
Tsi Nenʼiontateríwente Nónen Tentre Ne Kerístos
3Tewatenroʼshón꞉a, kwá tiókonte ioteriwíshon tsi tasakwanonweráton ne Rawenni꞉io ne sewahriwáhke. Kwá ioiánere neh naiakwáiere, tioríwah ne sewehtakwátshera tsi nióre tsi ioteiárontse ó꞉ni tsi natesewahtatenorónkwa sénha iotehiaróntie. 4Ne aoríwah watʼkwarénsaron nakʼteshón꞉non ne thonwetákwen ne Rawenni꞉io. Watʼkwarénsaron tsi ní꞉ioht iesewahkontákwen tesewahwisátste ó꞉ni tisewetákwen tsewahkwékon tsi niʼietʼtsikenrónni tànon sewahroniakenʼenhátie tsi nisewahriwaienterihátie.
5Kwáh akwékon kí꞉ken kariwahnírats ne Rawenni꞉io raohiatoretátshera tsi tkaiéri ó꞉ni ne enkarihónni tesewahténtion ne Raonakeráh꞉sera, tsi kwáh sewahtateweienʼnentáʼon ne akarihónni tsi aisewahronhiáken. 6Rawenni꞉io ehnenháiere nahóten ne ioiánere: ensakoronhiákente ne iesaroniakéntha, 7tánon ént꞉hion naisatʼrákwase tsi nítion ne sewahronhiáken ó꞉ni nonkwahtiakhéson. Thó꞉ne kíʼ thóh nenháiere nónen ne Roiá꞉ner Ié꞉sos éntʼtho kéh꞉thote tsi karonhiáte skát꞉ke ne rotisatsʼtenserowáhnen raoroniakerononʼókons, 8enhiotonʼiotátse, ne nasakoréwahte tsi niháti ne ronwahkenronní꞉on ne Rawenni꞉io ó꞉ni tsi niháti ne iáh tehonatewennarákwen ne kariwí꞉ios tsi nòkwa ne Sonkwahiáner Ié꞉sos. 9Né꞉e enhatironhiákente ne karihwahieshátshera tsi nénweh enkariwahiesáton, tenhiakhokʼkháshion raiaták꞉ta ne Roiá꞉ner ó꞉ni tsi nòkwa ne ioriwahnerákwak raosatsʼténsera. 10Nónen téntre ne thóh tewenniserónte nahontahónʼion ne kaiatanerakwáktshera ne rahonkwetaʼsónha ó꞉ni tenhonwahrénsaron kwáh tsi nihiákon ne tiakawetákwen. Íseh ó꞉ni thóh ensewahiataráh꞉ke, tiorì꞉wah tsi tishewetákwen tsi nikwahró꞉ri.
11Ne aoríwah tiotkonʼónwe kwahterennaiénni. Shakwahriwahnontónnis nónkwah Ní꞉io nahtshiʼtsiónnien naisewahrihóntahke tsi tiónnhe tsi nitsisewáhwi naitiónnhe꞉ke. Neh iakaiérithe ne raosatsʼténsera akwékon tsi nahoténsons saskáneks ne tkariwaiéri ó꞉ni iahontésa ne sahioténsera ne tewehtákwen. 12Ne káti nahónton ne raosénna ne Sonkwahiáner Ié꞉sos sonháke nón nakaiatanerakwáton, tánon níse rahonháke, entioianénhawe ne raoténrat ne Sónkwah Ní꞉io ó꞉ni ne Roiá꞉ner Ié꞉sos Kerístos.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.