2 Thessalonians 3
3
Takwahterennaiénhas
1Nonahkènkha, tewatenroʼshónʼa, takwahterennaiénhas ne Roiá꞉ner raoterihwahnothátshera iahontashónʼterahke tsi iostóre tsi tahonréni ó꞉ni kakweniensthatsherákon tsi aiehiéna, kwáh níse tsi ne sewáhiere. 2Sewahterénnaien ó꞉ni ne Rawenni꞉io nashonkwaniákenthe tsi nókwa ne kariwáhneren ó꞉ni ne ionkwetakʼsensʼokónhas; asèhken iáh onkwetaʼkwékon tetiakawetákwah nateriwahnotátshera.
3Nók kíʼ ne Roiá꞉ner rorihwahtóh꞉ken, tánon enhiashatsténseron ó꞉ni enhiaiatanónstathe tsi nòkwah ne Ranesonrónon. 4Tánon ne Roiá꞉ner sonkwahnikonrahnírats tsi nòkwa níse, tánon oriwí꞉io iontiónni tsi éhtho nensewáiere ó꞉ni iensewahtasónteren tsi nikwahróri.
5Aiáwens ne Roiá꞉ner iatsisewahsárine ne sénha kowáhnen tsi aisewahnikonraiéntane ne Rawenni꞉io raononronkwáhtshera tánon taisewahwishatsʼteke tsi niteshakówis ne Kerístos.
Tsi Nihiakoteriwahiénni Ne Kahioténsera
6Tewatenroshónʼa, wahkwahretiáron thóh raosénnakon ne Sonkwahiáner Ié꞉sos Kerístos tesewahtekháshion tsi nikáien ne tohnetákwen ronnentórah tsi ní꞉ioht tsi rononnétie tánon iáh tehatísere tsi nahóten iakhirihonniénni. 7Iatesewahiáti sewahteriéntare kwáh tehiotonwentióʼon né naisewáhiere tsi ní꞉i nihionkwaiéren. Iáh tehiakwentó꞉rahkwe ne skátʼke síteweskwe, 8Iáh tehionkwaienáʼon ónhka ahionkhiʼiénawahse ne iáh tahionkwahkariákon. Khèʼkhok, wahonkwaióten ó꞉ni wahakwaronhiáken; konʼtatiésons ó꞉ni ahsontakwékʼkons tsi wahonkwahióten né꞉ne tóhsa ónhka tsi nítsion akwahkarahiénhase. 9Thóh kíʼ nahakwáhiere, iáh tóh꞉ka kén iáh tehionkwaianerenseráien naiakwahriwanónton ne kaienawahsétshera; thóh nahakwáiere né꞉ne tahontaskwahtenienténsthe naisewáhsere. 10Tsi náhe skátʼke íteweskwe, kwahróriskwe, “Ónhka nenierahiátakwe nahiakohióten iáh tehiakohianerenseráhien ne tahiontskáhon.”
11Ne kíʼ hiakwéntons tioríwah iakwahriwaróntʼkhas ótiake skátʼke sewahnákere ronnentórah tsi ní꞉ioht tsi ronnonnétie tánon kwáh iáh thènen tehotihiótens kwáh nék khók ne shahkonaterihoriénnis nótiakes nonkwesónha raotiriwahsónhas. 12Raosénnakon ne Sonkwahiáner Ié꞉sos Kerístos wahakiretiáron kí꞉ken onhkwesónhas tánon wahakironkáten tkariwahiérik tsi ní꞉ioht tsi ronónnek tánon rotihióten tsi tahonténtsha tsi ronónnhe.
13Nók níse, tewatenroshónʼa, iáh tehiówenk ne taisewahwisénheie nahóten sewahióthe ne iohiánere. 14Tóhka nónwah ótiakes iáh tahontewénhnarahkwe ne ahteriwahnothátshera tsi nie kwahtenieténni kíʼ-kénʼen kahiatonserákon. Tóhka thóh ní꞉ioht, ietsihiatennikonráhren tánon tóhsa thènen tesewahteriwáhiest, thóh nahontáwe ahontéhen. 15Nók tóhsa ietsiʼieteweienʼnaksáten tsi síken ní꞉ioht ne taisewahtatʼtiónseke; khèkhok, ietsihiaronkáten tsi tisewetákwenh níse.
Nonakénkha Owennasónhas
16Aiáwens ne kwáh rahonhatsíwah ne Roiá꞉ner, tsi nikáien ne rahiatakweʼní꞉io ne skénnon, tiotʼkonhónwe ahontáhion ne skénnon tánon kwáh tsík nahontahiotieráton. Ne Roiá꞉ner sekwahkwékon sekwakwekónhak.
17Kwáh I꞉i kesnonsháke wáhkatsʼte tsi wahiákon kí꞉ken: Kór kí꞉ken tetsisewahnonwerátons. Kén kíʼ ní꞉ioht tsi katatʼsénnara ne kwáh iatekahiatonseráke; kén kíʼ ní꞉ioht tsi khiátons.
18Aiáwens ne raoténrat ne Sonkwaiáner Ié꞉sos Kerístos sewahkwékon aisewahkwekónhake.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.