Taybo 23
23
Balaama Koyro Haasaya
1Balaami Balaaqako, “Haysan taw laapun yarsho bessata gimba; qassi laapun kormatanne laapun marazeta taw giigisa” yaagis. 2Balaami gidaysada Balaaqi oothis; enti nam7ay issi issi yarsho bessan issi kormanne issi maraze yarshidosona.
3Yaatidi, Balaami Balaaqako, “Neeni ne yarshuwa matan de7aasha; taani gede baana. Ooni eri Goday taara gahetanaw yoonna aggenna; I taw qoncisiyaba ubbaa ta new odana” yaagidi issi dere bolla keyis. 4Yan Xoossay Balaamara gahetin, Balaami, “Taani laapun yarsho bessata giigisas; issi issi yarsho bessan issi kormanne issi maraze yarshas” yaagis.
5Balaami gaanaba Goday iyaw odidi, “Neeni Balaaqako simmada iyaw ha kiita oda” yaagis. 6Balaami simmiya wode Balaaqi Moo7abe halaqata ubbaara ba yarshuwa matan eqis.
7Balaami haysada yaagidi tinbite odis;
“Moo7abe kawoy, Balaaqi, doloha bagga deretape,
Soore biittafe tana ehis;
‘Haa ya; Yayqooba taw bada;
Isra7eele asaa baadda’ yaagis.
8Xoossi baaddiboonaysa ta waatada baaddo?
Goday, baaddiboonaysa ta waatada baaddo?
9Ta dhoqa zaalla huuphen eqada enta xeellayis;
zumaa bolla eqada enta be7ayis.
Enti bantarka de7iya dere;
enti hara kawotethatape dumma gideysa eroosona.
10Yayqooba baana ooni taybi onganee?
Isra7eele saysuwa ooni taybi kanthanee?
Xillota hayquwa ta hayqarkina;
ta wursethay entaysada hano” yaagis.
11Balaaqi Balaamako, “Neeni ta bolla oothiyabay aybee? Taani nena ta morketa baaddana mela ehas, shin neeni enta anjadasa; haraba aykoka oothabaaka” yaagis.
12Balaami zaaridi, “Goday taw odeysafe haraa odoyee?” yaagis.
Balaama Nam7antho Haasaya
13Balaaqi Balaamako, “Enta neeni be7anaw danda7iya hara bessi taara yedha; yanka ne entafe guuthara be7aasape attishin, ubbaa be7aka. Neeni yan eqada enta baaddarki” yaagis. 14Pisga deriya huuphen de7iya Xofima demba efis. Yan laapun yarsho bessata gimbidi, issi issi yarsho bessan issi kormanne issi maraze yarshis.
15Balaami Balaaqako, “Neeni haysan ne yarshuwa matan de7aasha; taani Godaara gahetanaw gede baana” yaagis.
16Goday Balaamara gahetidi, “Neeni Balaaqako simmada iyaw ha kiita oda” yaagis.
17Balaami simmidi yaa wode Balaaqi Moo7abe biitta halaqatara yarshuwa matan eqidaysa demmis. Balaaqi iyako, “Goday new ay odidee?” yaagis.
18Balaami haysada yaagidi tinbite odis;
“Sifoora na7aw, Balaaqa, denda;
ta odeysa loythada si7a.
19Wordotanaw Xoossay ase gidenna;
ba qofaa laammanaw asa na7a gidenna.
Odidi, ba odidaysa oothennee?
Woyko ba gidaysa polennee?
20Taani anjanaw kiita ekas;
I anjis; ta laammanaw danda7ike.
21Yayqooba kochaa bolla iitabay yeenna;
Isra7eele asaa metoy gakenna.
Goday, enta Xoossay entara de7ees;
I entaw kawo gideysa awaajosona.
22Xoossay enta Gibxefe kessis;
I mino menthada entaw oletees.
23Yayqooba kochaa bolla biti oothenna;
Isra7eele asaa qohana murunnoy baawa.
Heko, Yayqoobasinne Isra7eeles
‘Xoossay oothidaba be7ite’ yaagana.
24Ha asay macca gaammoda dendees;
ba oykidaba maana gakanaw,
ba wodhidaysa suuthaa uyana gakanaw,
shemponna gaammoda dendoosona” yaagis.
25Yaatin, Balaaqi Balaamako, “Ne enta ubbaka baaddofa; ubbaka anjofa” yaagis.
26Balaami zaaridi, “Taani Goday giyaba xalaala oothana gada new odabikina?” yaagis.
Balaama Heedzantho Haasaya
27Balaaqi Balaamako, “Haaya; ta nena hara bessi efana. Ooni eri, hessan Xoossay ufaytidi, neeni yan eqada enta baaddana mela oothanaw danda7ees” yaagis. 28Balaaqi Balaama bazzuwa duge xeelliya Paa7ora zuma bolla efis.
29Balaami, “Neeni haysan taw laapun yarsho bessata gimba; qassi laapun kormatanne laapun marazeta taw giigisa” yaagis. 30Balaami gidaysada Balaaqi oothis; issi issi yarsho bessan issi kormanne issi maraze yarshis.
Currently Selected:
Taybo 23: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
