Taybo 22
22
Balaaqi Balaama Xeegisis
1Isra7eele asay dendidi, Iyaarko ginan, Yordaanosepe hefinthan de7iya Moo7abe denban dunkaanidosona.
2Isra7eele asay Amooreta bolla oothidaysa ubbaa Sifoora na7ay Balaaqi si7is. 3Isra7eele asay daro gidida gisho, Moo7abeti daro dagammidi yayidosona. 4Moo7abeti Midiyaame cimatako, “Boori maata pitidi midi dhayseysada ha wude asay nu yuushuwan de7iya ubbaa midi dhaysana” yaagidosona.
He wode Moo7abe kawoy, Sifoora na7ay Balaaqi, 5Amawa biittan, Efraxiisa shaafa matan, Patoora kataman de7iya Bi7oora na7aa Balaamako haysada yaagidi kiittis. “Gibxefe keyida daro asay biitta ubbaa ma7idi, ta matan dunkaanidosona. 6Enti taape daro wolqaama gidiya gisho, hayyana yada enta baaddarki. Ooni eri, ta enta xoonanawunne biittafe kessanaw danda7ana. Hiza, neeni anjeysi anjeteysa qassi neeni baaddeysi baadetidaba gideysa taani erayis” yaagis.
7Moo7abe cimatinne Midiyaame cimati baadetha miishiya ekidi Balaamako bidi Balaaqi gidaysa iyaw odidosona. 8Balaami entako, “Hachi qamma haysan aqite; Goday taw odeysa ta hintew odana” yaagis. Yaanin, Moo7abe halaqati Balaamara gam7idosona.
9Xoossay Balaama, “Haysati neera de7iya asati oonee?” yaagidi oychis.
10Balaami Xoossaako, “Moo7abe kawoy, Sifoora na7ay Balaaqi, 11‘Gibxefe keyida daro asay, enti biitta ubbaa kumidosona. Neeni yada, enta baaddarki. Ooni eri, ta enta xoonanawunne biittafe kessanaw danda7onna aggike’ yaagidi enta taako Kiittis” yaagis.
12Yaatin Xoossay Balaamako, “Neeni entara boopa; Isra7eele asay anjetida dere gidiya gisho, neeni enta baaddofa” yaagis.
13Wontetha gallas wonta Balaami dendidi, Balaaqa halaqatako, “Taani hintera boonnada Goday diggida gisho, hinte biitta simmite” yaagis.
14Moo7abe halaqati Balaaqako guye simmidi, “Balaami nuura yoonna ixis” yaagidosona.
15Zaaridi Balaaqi kaseysatape aadho bonchetidanne taybon daro halaqata iyako kiittis. 16Enti Balaamako bidi, “Sifoora na7ay Balaaqi, ‘Neeni taako yaanaysa nena aybika teqofo. 17Ta new daro woyto immana; ne oychiyaba ubbaa ta new oothana. Hayyana yada ha asaa baaddarki’ yaagis” yaagidi odidosona.
18Shin Balaami entako, “Balaaqi hari attoshin ba kawotethan kumida biraanne worqaa taw immiyaba gidikoka Godaa, ta Xoossaa kiitaa menthada aykoka pacisanaw woyko gujanaw danda7ike. 19Goday taw bessiya harabay de7iko ta erana mela hinteka hachi qamma haysan aqite” yaagis.
20He qamma Xoossay Balaamako, “Ha asay nena xeeganaw yida gisho, neeni entara ba; shin ta new odeysa xalaala ootha” yaagis.
Balaamanne Iya Haariw
21Yaatin wontetha gallas Balaami ba hariw kooridi Moo7abe halaqatara bis. 22Shin I biya gisho Xoossay hanqetis. He wode Balaami ba hariw toggidi, ba nam7u aylletara bishin Godaa kiitanchoy iya teqanaw ogen eqis. 23Godaa kiitanchoy mashsha shoddidi ogen eqidaysa hariya be7ada, ogiya aggada goshsha giddo gelasu. Balaami hariw ogen zaaranaw shocis.
24Yaatin, Godaa kiitanchoy nam7u woyne gadetape giddon ya baggaranne ha baggara gimben diretida xuntha ogen eqis. 25Hariya Godaa kiitanchuwa be7ida wode gimbe dirsaako shiiqida, Balaama tohuwa gimbe dirsara oythasu; yaatin I hariw nam7antho shocis.
26Hessafe guye, Godaa kiitanchoy sintha aadhidi, haddirsi woyko ushachi simmanaw ogey bayna xuntha bessan eqis. 27Hariya Godaa kiitanchuwa be7ada, Balaami toggidi de7ishin zin7asu; Balaami daro yilotidi, ba xam7an hariw shocis. 28Hessafe guye, Goday harey doona dooyin, hariya Balaama, “Ta new ay iissin tana heedzu toho shocadii?” yaagasu.
29Balaami zaaridi, “Neeni tana yiloyida gishosa; ta kushen mashshi de7iyaba gidiyako ta nena ha77i wodhanashin” yaagis.
30Hariya Balaamako, “Neeni hachi gakanaw toggiya ne hariw gidikina? Taani new haysada hana eriyana?” yaagasu.
Balaami zaaridi, “Hana eraka” yaagis.
31He wode Goday Balaama ayfiya dooyin, Godaa kiitanchoy shodetida mashsha oykidi ogen eqidaysa be7is. I lichi gidi som7ora sa7an gufannis. 32Godaa kiitanchoy, “Ne hariw heedzu toho ayis shocadii? Ne ogey ta sinthan geella gidiya gisho ta nena teqanaw yas. 33Hariya tana be7ada ta sinthafe heedzu toho hara soo simmasu. Hariya hara soo simmaboonnaba gidiyako, hannoode ta nena wodhada hariw ashshanashin” yaagis.
34Balaami zaaridi, “Taani nagara oothas; neeni tana teqanaw oge bolla eqidaysa ta erabike. Ne dosonnaba gidiko ta ha77i guye simmana” yaagis.
35Shin kiitanchoy Balaamako, “Neeni ha asatara ba; shin ta new odeysa xalaala oda” yaagis. Yaatin, Balaami Balaaqa biitta halaqatara bis.
36Balaami yeysa Balaaqi si7ida wode Arnoona shaafa gaxan ba biitta zawan de7iya Moo7abeta kataman iya mokanaw bis. 37Balaaqi Balaamako, “Neeni ellesada yaana mela ta kiittabikina? Neeni ayis taako ellesada yabikii? Taani new kushe zaaranaw danda7ikina?” yaagis.
38Balaami Balaaqako, “Heko, ha77i ta neeko yas; shin ta aykoka taape gaanaw danda7ike. Xoossay tana oda gidaba xalaala odana” yaagis. 39Yaatin, Balaami Balaaqara Qiriyat-Haxoota katamaa bis. 40Yan Balaaqi mehenne dorse yarshidi, ashuwape guuthara Balaamasinne iyara de7iya halaqatas immis.
41Wontetha gallas Balaaqi Balaama Baamot-Ba7aali geetetiya bessa kessis; Balaami yan eqidi Isra7eele asape baggaa be7is.
Currently Selected:
Taybo 22: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
