Taybo 24
24
1Balaami Isra7eele anjeysi Godaa ufaysidaysa I be7ida wode kase I ootheysada bita malla koybeenna, shin ba som7uwa mela biittako zaaris. 2I dhoqu gidi xeelliya wode Isra7eele asay ba kochan kochan dunkaanidi uttidaysa be7iya wode Xoossaa Ayyaanay iya bolla wodhis. 3I haysada yaagidi tinbite odis;
“Bi7oora na7aa Balaama tinbitiya;
iya ayfey dooyetin xeelliya addiya tinbitiya;
4Xoossay giyaba si7eysa tinbitiya;
I som7ora gufannin, iya ayfey dooyetidaysi;
Ubbaa danda7iya Xoossaa qoncethaa be7ida addiya tinbitey haysa.
5Yayqooba, ne dunkaaneti,
Isra7eele, ne gutati,
ayba lo77oona.
6Enti micetida zangaarada,
shaafa gaxan de7iya atakiltiya bessada,
Goday tokida godare uuthada,
haatha gaxan de7iya ziga mithada hanoosona.
7Enta xuggay haathan kumana;
enta kochay gidiya haathi demmana.
Enta kawoy kawa Agaagape aadhana;
enta kawotethay bonchetana.
8Xoossay enta Gibxefe kessis;
I mino menthada entaw oletees.
Enta morketa mentherethees;
enta meqethaa gaaccees;
ba dongiyan caddees.
9Enti gaammoda zin7idosona;
macca gaammoda zaqullidosona;
enta boshechanaw danda7ey oonee?
Enta anjiya ubbay anjetana;
enta baaddiya ubbay baadetana” yaagis.
10Yaatin, Balaaqi Balaama bolla yilotis. Ba kushiya baqidi Balaamako, “Ta morketa baaddana mela ta nena ehas, shin neeni heedzu toho enta anjadasa. 11Ha77i ellesada ne soo ba; ta nena darobaa woytana gas, shin neeni woytuwa ekonna mela Goday nena diggis” yaagis.
12Balaami Balaaqako zaaridi, “Neeni taako kiitida asaako, 13‘Balaaqi hari attoshin ba kawotethan kumida biraanne worqaa taw immiyaba gidikoka Goday odidaysa menthada lo77o woyko iita ta shenen oothanaw danda7ike. Taani Goday giyaba xalaala odana’ gada new odabikinayee?” yaagis.
Balaama Oyddantho Haasaya
14Balaami Balaaqako, “Taani ha77i ta asaako bayis; shin ne haaya; Isra7eele asay yaana wodiyan ne asaa oothanaba ta new odana” yaagis. 15I ba tinbitiya haysada yaagidi odis;
“Iya ayfey tishshi oothidi xeelliya,
Bi7oora na7aa Balaama tinbitey haysa.
16Haysi Xoossay giyaba si7eysa tinbitiya,
Ubbaa danda7iya Xoossafe
gidida eratethi de7iya uray.
Lichi gidi som7ora gufannin,
iya ayfey dooyetidaysinne
Ubbaa Danda7iya Xoossaa
qoncethaa be7eysa tinbitey haysa.
17“Taani iya be7ayis, shin wodey ha7i gidenna;
ta iya xeellayis, shin matan deenna.
Yayqooba sheeshape xoolintoy keyana;
Isra7eelepe kawotetha xam7ay keyana.
Moo7abe asaa som7uwa I gaaccana;
Seeta asaa ubbaa huuphiya I tinchana.
18Edoomey xoonetana;
iya morkey Sayrey oyketana;
shin Isra7eeley minni minni baana.
19Yayqoobape haareysi keyana;
kataman paxa attidaysata dhaysana” yaagis.
20Hessafe guye, Balaami Amaaleqa be7idi haysada yaagidi tinbite odis;
“Amaaleqi kawotethata giddon koyro,
shin enta wursethay dhayo” yaagis.
21Qassi Balaami Qeena be7idi haysada yaagidi tinbite odis.
“Hinte de7iya bessay saro bessi;
hinte keethay zaalla bolla keexetis.
22Shin Asooreti hintena di77iya wode,
hinte Qeena asay dhayana” yaagis.
23Wursethan Balaami haysada yaagidi tinbite odis;
“Xoossay hessa oothiya wode,
ooni de7on daanaw danda7ii?
24Markabeti Qophiroosape yaana;
enti Asoorenne Ebeera xoonana;
shin entika qassi dhayana” yaagis.
25Hessafe guye, Balaami dendidi ba soo simmis; Balaaqika ba ogiya bis.
Currently Selected:
Taybo 24: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
