Kessa 17
17
Zaallafe Pultida Haathe
1Isra7eele asa ubbay Goday kiitidaysada issi bessafe hara bessi yuuyishe, Siin mela biittafe dendidi Rafidima geetetiya bessan uttidosona. Shin enti uyanaw haathi he bessan dhayis. 2Enti, “Nuus uyanaw haathe imma” yaagidi Musera kacetidosona.
Musey zaaridi, “Hinte taara ayis kacceteetii? Godaa ayis paacetii?” yaagis.
3Shin asay yan haatha saamotidi, “Neeni nuna, nu naytanne nu mehiya saamon wodhanaw Gibxefe kessada haysa ayis ehadii?” yaagidi Muse bolla zaari zaari zuuzumidosona.
4Yaatin Musey, “Taani ha asaa waato? Enti tana shuchan caddana hanoosona” yaagidi Godaa woossis.
5Goday Museko, “Neeni Isra7eele asaape cimata neera ekada asaape sinthe aadhada hemeta. Qassi Nayle Shaafa shocida xam7aa ne kushen oykada ba. 6Taani Koreeba zuman zaalla bolla ne sinthan eqana. He zaalla shoca; asay uyana haathay iyape keyana” yaagis. Musey Isra7eele cimata sinthan hessa oothis.
7Isra7eeleti, “Tuma Goday nuura de7ii?” yaagidi zuuzumida gishonne Godaa paacida gisho he bessa Masahanne Mariba#17:7 Masahanne Mariba: Ibraawetho doonan Masaha guussay “Paaco” guussu, qassi Mariba guussay “Zuuzunthi” guussu. gidi sunthis.
Isra7eelenne Amaaleqa Ola
8Amaaleqati yidi Rafidiman Isra7eeleta olidosona. 9Muse Iyyasuko, “Neeni wonto Amaaleqata olanaw guutha asi doora. Taani Xoossaa xam7aa oykada zuma huuphen eqana” yaagis.
10Musey kiitidaysada Iyyasuy Amaaleqata olis. Musey, Aaroninne Hoori zuma huuphe keyidosona. 11Musey ba kushiya denthidi gam7iya wode Isra7eeleti xoonosona, shin I ba kushiya wothiya wode Amaaleqati xoonosona. 12Muse kushey argaacida wode Aaronaranne Huurara shuchi ehidi Muse iya bolla utisidosona. Aaroninne Huuri ushacharanne haddirsara eqidi away wullana gakanaw iya kushiya katisi oykidosona. 13Hessada oothidi Iyyasuy Amaaleqata mashshan olidi dhaysis.
14Hessafe guye, Goday Museko, “Haysi ubba wode hassayetana mela ha xoonuwa taarikiya xaafa. Taani Amaaleqata burxora dhaysanaysanne enti dogetanaysa Iyyasus oda” yaagis. 15Musey yarsho bessi giigisidi, “Goday ta xoonuwa bandira” gidi sunthis. 16I, “Godaa xoono Bandira dhoqu oothidi oykite. Goday Amaaleqata merinaw olana” yaagis.
Currently Selected:
Kessa 17: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
