Kessa 16

Mannanne Kuraacho

1Gibxefe keyida nam7antho ageenan, tammanne ichashantho gallas Isra7eele asa ubbay Elimape dendidi, Elimapenne Siinape giddon de7iya Siine geetetiya mela biitta yidosona. 2Isra7eele asa ubbay mela biittan Muse bollanne Aarona bolla zuuzumidosona. 3Isra7eeleti entako, “Nuuni Gibxe biittan Godaa kushen hayqida gidorkoshin. Hari atto nuuni yan wodhi uttidi ashuwanne hara kathi ubbaa nu koyida mela moos. Shin hinte nuna ubbaa kessidi ha mela biitta koshan wodhiseeta” yaagidosona.

4Goday Museko, “Taani hintew salope kathi buksana. Asay gallas gallas keyidi, hachis gidiyaba maxanaw koshshees. Asay taw kiitetiyakonne kiitetonaako taani enta hessan paacana. 5Saamintan saamintan Usupuntho gallas enti kase maxeysas nam7u kushe maxidi katho” yaagis.

6Hesaa gisho Museynne Aaroni Isra7eele asaako, “Hintena Gibxe biittafe kessiday Godaa gideysa omarsi hinte erana. 7Hinte Godaa bolla zuuzumidaysa I si7ida gisho, wonta Godaa bonchuwa hinte be7ana. Hinte nu bolla zuuzumanaw nuuni oonee?” yaagidosona. 8Hessafe guye, Musey, “Hinte Godaa bolla zuuzumidaysa I si7ida gisho, I hintew omarsi maanaw asho immeynne wonta maanaw hinte koyiya mela uythu immey Godaa gideysa hinte erana. Hinte nu bolla gidonashin Godaa bolla zuuzumeta” yaagis.

9Musey Aaronako, “Neeni Isra7eele asaa ubbaa, ‘Goday hinte zuuzuntha si7ida gisho, yidi Godaa sinthan eqite’ yaaga” yaagis. 10Aaroni Isra7eele asaa ubbaas odida wode enti mela biitta simmidi, shaara giddora qoncida Godaa bonchuwa be7idosona. 11-12Goday Museko, “Taani Isra7eeleta zuuzuntha si7as. Neeni entaw ‘Omarsi asho hinte maana; wonta hinte koyida mela uythu ekana. He wode hinte taani Godaa hinte Xoossaa gideysa erana’ yaagada oda” yaagis.

13He gallas omarsi kuraachoti yidi, Isra7eele asay de7iya bessaa ma7idosona. Wonta enta heeran aki biitta ma7is. 14Akay, xiz7ida wode lee7onne laafabay mela biitta bolla bentis. Ika shachada boothi. 15Isra7eeleti hessa be7ida wode iya eronna gisho, issoy issuwako, “Haysi aybee?” yaagidosona.

Yaatin Musey entako, “Hinte maana mela Goday immida kathay haysa. 16Goday, ‘Asay issoy issoy baw koshsheysa mela shiisho; son de7iya issi issi asi ba huuphen nam7u litiro eko’ yaaga” yaagidi kiittis.

17Isra7eeleti kiitetidaysada oothidosona; baggay darsidi, baggay guuthidi shiishidosona. 18Enti shiishidi litiron makiya wode darsi shiishidaysas palahibeenna; guuthu shiishidaysaska pacibeenna. Issoy issoy baw koshsheysa mela shiishis. 19Musey entako, “Oonika iyape wontas ashshofo” yaagidi kiittis. 20Shin entafe issoti issoti Musey odidaysa si7onna ixidi wontas minjidosona. Enti minjidaysi guxuntidi xinqis. Hessa gisho, Musey enta bolla hanqetis. 21Wonta wonta asa ubbay bantaw koshsheysa mela shiishees. Away michiya wode sa7an attidaysi til7ees.

22Usupuntho gallas enti kase shiishiya nam7u litiruwa bolla iya mela gujidi issi issi asas oyddu litiro shiisho. Yaatin Isra7eele halaqati bidi hessa Muses odidosona. 23Musey zaaridi, “Wontoy shempo gallas gididi Godaa bonchiya geeshsha Sambaata. Hessa gisho, hinte uukiyaba uukite; doysiyaba doysite. Palahidaysa wontos wothite” yaagis. 24Enti Musey kiitidaysada wontos wothin, xinqibeenna woyko guxuntibeenna. 25Musey entako, “Haysa hachi miite; hachi Godaa bonchiya shempo Sambaata gidiya gisho, hinte hachi denban demmeketa. 26Hinte kathaa usupun gallasatan shiishanaw danda7eeta, shin laapuntha gallasay shempo gallas gidiya gisho aybi kathika he wode deenna” yaagis.

27Laapuntha gallasan issi issi asay shiishanaw keyidosona, shin aykoka demmibookona. 28Yaatin, Goday Museko, “Ta kiitaanne ta higgiya hinte naagonna ixey awude gakanaasee? 29Taani hintew Sambaata immidaysa akeekite. Usupuntho gallasan I hintew nam7u gallasa kathi immey hessa gishosa. Laapuntha gallasan oonika kare keyonna ba son ba son gam7o” yaagis. 30Hesaa gisho, asay laapuntha gallasan shempis.

31Isra7eele asay he katha manna#16:31Manna: Ibraawetho doonan Manna guussay “Haysi aybe” guussu. gidi xeegidosona. Mannay deebo ayfe mela gididi boothi. I eessara uukida uythada mal7ees.

32“Taani hintena Gibxe biittafe kessida wode mela biittan muziday manna gideysa yaana yeletethay be7ana mela iyape nam7u kilo giraame wothite” yaagidi Goday kiitidaysa Musey Isra7eele asaas odis.

33Musey Aaronako, “Nam7u kilo giraame manna ekada xaaron qolada yaana yeletethaas Goday goyinnetiya bessan wotha” yaagis.

34Goday Muse kiitidaysada, Aaroni manna Godaa sinthan taabotiya giddon wothis. 35Isra7eeleti banta de7iya Kanaane biitta zawa yidi gakanaw oytamu laythi manna midosona. 36He wode asay makiya miishey laatamanne nam7u litiro oykees.

Currently Selected:

Kessa 16: GFBLVF

Highlight

Copy

Compare