Kessa 18
18
Yotori Muse Xomoosuwa
1Midiyaame biitta kahiney, Muse bolloy Yotori, Goday Musesinne ba asaa Isra7eeletas oothidabaanne entana Gibxefe kessidaba si7is.
2He wode Muse bolloy Yotori, iya matan Musey aggidi bida iya machiw Sipooronne, 3I nam7u nayta ekidi yis. Musey, “Taani allaga biittan bete asi gidas” gidi bayra na7aa Gersaama gidi sunthis. 4Kaaluwa qassi, “Ta aawa Xoossay, tana Gibxe kawa mashshafe ashshis” gidi Alaazara gidi sunthis.
5Muse bolloy Yotori, iya machiwunne I adde nayta baara ekidi, mela biittan, Xoossaa zumaa matan de7iya Museko yis. 6I banta yuussaa erisanaw Museko kiittis.
7Hessa gisho, Musey ba bolluwa mokanaw keyidi, iya ziggi sarothidi iya yeeris. Enti issoy issuwa sarothi simmidi Muse dunkaaniya giddo gelidosona. 8Goday Isra7eeleta ashshanaw Gibxe asaa bollanne enta kawa bolla oothidaba ubbaanne ogen enta gakida metuwa ubban Goday waati maaddidaako Musey ba bolluwas odis.
9Yotori Goday Isra7eele asaa Gibxeta kushepe ashshanaw oothida lo77o oosotaba si7idi ufaytis. 10I, “Hintena Gibxetape enta kawa kushiyape ashshidi, Gibxe aylletethaafe kessida Goday, I galatetto. 11Otoron enta bolla iitaba oothida Gibxetape Isra7eeleta ashshanaw hessa oothida gisho, Goday xoossata ubbaafe gita gideysa taani ha77i eras” yaagis. 12Hessafe guye, Yotori, Muse bolloy, xuussa yarshonne hara yarsho Xoossaas yarshis. Aaroninne Isra7eele cimati ubbay Xoossaa sinthan iyara geeshsha katha maanaw yidosona.
13Wontetha gallas Musey asaas pirdanaw uttis. Asay Muse yuushuwan wontafe omarsi gakanaw eqidi de7ees. 14Muse bolloy Musey asaas ootheysa ubbaa be7idi, “Neeni ne xalaala haysa ayis oothay? Asay wontafe omarsi gakanaw ne yuushuwan essada ayis nerka oothay?” yaagis.
15Musey ba bolluwako, “Asay Xoossaa sheniya oychanaw koyidi taako yaa gishosa. 16Enta giddon odi de7iko taako yoosona. Ta enta giddon balinne tumi ooneko shaakayis; Xoossa kiitaanne higgiya entaw odayis” yaagis.
17Muse bolloy, “Haysi ne ootheysi lo77o gidenna. 18Neka neeko yaa asa ubbay daabureta. Ha oosoy issi asape daro gidiya gisho, neeni nerka oothanaw danda7aka. 19Ha77i taani nena zoreysa si7a; Xoossay neera gidana. Neeni ha asaa bessan gidada entaba Xoossas oda. 20Xoossa kiitaanne higgiya enta tamaarsa. Enti waani daanekonne ay oothaneko enta bessa. 21Qassi asaa giddon oda shaakidi eriya asata, Xoossaa yayyeyisata, ammantheysatanne wodhaafe ekonnaysati doora. Entana asaa bolla shaalaqata, mato halaqata, hamsalaqatanne asiralaqata oothada shuuma. 22Enti ubba wode kawushsha odata bantaw pirdo, shin deexo odata neeko eho. Hessada ne oothiko toohoy new kawuyana. 23Ne oothana mela Xoossi koyey hessa. Qassi ne daaburaka ha asa ubbay ba allalley poletin ba soo ba soo simmana” yaagis.
24Musey Yotora zoriya si7is; I gidaba ubbaa oothis. 25Musey Isra7eeleta giddofe oda shaaki eriya asata dooris. Entana asaa bolla shaalaqata, mato halaqata, hamsalaqatanne asiralaqata oothidi shuumis. 26Shuumati kawusha odata bantaw pirdidosona, shin deexo odata Museko ehoosona.
27Hessafe guye, Musey ba bolluwa moyzin, I ba biitta simmis.
Currently Selected:
Kessa 18: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
