Kessa 15

Musenne Mayraami Mazmure

1He wode Museynne Isra7eele asay ha mazmuriya Godaas yexidosona.

I ba gita xoonuwan bonchetida gisho,

taani ta Godaas galata mazmuriya yexana.

Paranne para toggeysa Abban yeggis.

2Goday ta minotethaanne ta mazmuriya gasuwa,

I tana ashsheysa.

I ta Xoossaa; taani iya sabbana.

I ta aawata Xoossaa; taani iya bonchana; galatana.

3Goday olancho;

iya sunthayka Godaa.

4Gibxe kawa para gaaretanne iya olanchota Abban yeggis.

Gibxe kawa, ubbaafe aadho gidida toora moconata, Zo7o Abban mitisis.

5Entana ciimmo haathay mittis;

enti shuchada ciimmon mitetidosona.

6“Abeeti Godaw, ne ushacha kushey wolqan gooba;

ne kushey morkiya mentherethis.

7Ne gita xoonuwan,

neera eqeteyisata oladasa.

Ne sheney tamada eexidi,

enta kafleda mis.

8Ne hanquwan ne Abbaa punnin,

haathay godada eqis.

Abbaa ciimmoti garsan shuchada minnidosona.

9“Morkey, ‘Taani enta yedethada oykana;

taani enta shaluwa shaakada,

ta koydaba ubbaa ekana.

Taani ta mashsha shoddada enta dhaysana’ yaagidi ceeqetis.

10Shin neeni enta punnin, Abbay enta mittis.

Enti Abbaa ciimmuwan biratada mitetidosona.

11Abeeti Godaw, Xoossata giddon ne mali oonee?

Geeshshatethan yashshey ne mali oonee?

Bonchoy daggantheynne malaalsiyaba oothey ne mali oonee?

12Neeni ne ushacha kushiya miccida wode,

biittay enta mittis.

13“Neeni wozida asaa ne merina siiquwan kaalethadasa.

Neeni ne wolqan enta ne geeshsha biitta gelsadasa.

14Kawotethati hessa si7idi yashshan kokoridosona.

Filisxeeme biitta asatika un7etidosona.

15He wode Edoome biitta halaqati dagammidosona;

Moo7abe biitta haareysati yashshan kokoridosona;

Kanaane asati dagaman daaburidosona.

16Dagaminne yashshi enta oykis.

Abeeti Godaw, enti ne wolqaa gitatetha be7idi,

ne asay aadhana gakanaw,

neeni wozida asay aadhana gakanaw,

shuchada toletidi eqidosona.

17Neeni enta ehada, ne zumaa huuphen tokana.

Abeeti Godaw, he bessay neeni new daanaw doorida bessi,

neeni ne kushiyan minthada keexida ne keethe.

18Goday merina gakanaw kawotana”

yaagidi yexidosona.

19Isra7eeleti Abbaa giddora mela biittara pinnin, Gibxe kawa parati, iya para gaaretinne iya para toggeysati Abban gelida wode Goday enta bolla Abbaa haatha zaarin haathay enta mittis. 20Aarona michiya, nabiya Mayraama karaabo ekasu. Hara maccasati ubbay banta karaabo ekidi baqishenne yexishe iyo kaallidosona. 21Mayraama,

“I ba gita xoonuwan bonchetida gisho,

Paranne para toggeyisata I Abban yeggida gisho,

Iyaw mazmuriya yexite” yaagada entaw yexasu.

Camo Haathi

22Hessafe guye, Musey Zo7o Abbaa matape Isra7eeleta denthidi Shuura mela biitta gakanaw kaalethis. He mela biittan enti heedzu gallas hemetidosona shin haathe demmibookona. 23Enti Maara geetetiya bessi gakidi haathe demmidosona, shin haathay camo gidiya gisho uyanaw danda7ibookona. Hessa gisho, he bessay Maara#15:23 Maara: Maara guussay “Camo” guussu. geetetis. 24Asay, “Nuuni ay uyanee?” gidi Muse bolla zuuzumidosona.

25Yaanin, Musey Godaako waassis; Goday iya issi mithi bessis. Musey he mitha haathan yeggin haathay mal7is.

Yan Goday entaw higge immis; yan Goday enta paacis. 26Musey entako, “Hinte hinte Godaa Xoossaas kiitetite; I koyaba oothite. Hinte taw polo kiitetikonne ta giyaba si7iko Gibxeta bolla ta yeddida hargiyan hintena pirdike. Taani hintena pathiya Godaa” yaagis.

27Hessafe guye, enti Elima bidosona. Yan tammanne nam7u haatha pultotinne laapun tammu zamba mithati de7oosona. Enti yan haatha doonan uttidosona.

Currently Selected:

Kessa 15: GFBLVF

Highlight

Copy

Compare