Kessa 14

Zo7o Abba Pinethi

1Hessafe guye, Goday Museko, 2“Enti guye simmidi Migdoolapenne Zo7o Abbaafe giddon, Pihahiroota sinthan, Ba7aal-Zafoona matan uttana mela oda. 3Kawoy, ‘Isra7eeleti mela biitta keyanaw oge dhayidi coo toylatoosona’ yaagidi qopana. 4Taani kawa wozanaa muumisana; I enta gooddana. Taani kawanne iya olanchota ubbaa xoonada bonchetana. He wode Gibxet taani Godaa gideysa erana” yaagis. Hessa gisho, Isra7eeleti I odidaysada oothidosona.

5Asay kessi ekidaysa Gibxe kawoy si7idi, iyaranne iya moorinnatara banta qofa laammidi, “Nuuni ayis hessa oothido? Nuuni Isra7eeleta yeddidi, nuna haggaaziya asi ayis dhayane” yaagidosona. 6Hessa gisho, I ba para gaariya kooridi, ba olanchota ekidi dendis. 7I usupun xeetu dooretida para gaaretanne Gibxe biittan de7iya hara gaareta ubbaa enta halaqatara ekidi bis. 8Goday Gibxe biitta kawa wozana muumisida gisho yashshi bayna kessa bolla de7iya Isra7eele asaa yedethis. 9Gibxe kawa parati, para gaaretinne olanchoti Isra7eeleta kaallidi bidi, Abba doonan Ba7aal-Zafoonanne Pihahiroota matan enti uttidashin demmidosona.

10Kawoy ba olanchotara yishin Isra7eeleti demmidi yayyidosona; bantana maaddana mela Godaako waassidosona. 11Enti Museko, “Gibxe biittan nuus duufoy dhayidee? Nuuni mela biitta hayqana mela nuna kessiday hessasee? Nuna Gibxefe ayis ehadii? 12Gibxen de7ishe haysi hananaysa eridi, ‘Nuna agga nuuni Gibxetas haaretana’ yaagidi new odibooko? Mela biittan hayqanaape entaw haareteysi nuus lo77oshin” yaagidosona.

13Shin Musey zaaridi, “Yayyofite; minnidi eqite. Goday hachi hintena ashshiya ashuwa hinte be7ana. Hachi hinte be7iya Gibxeta zaari be7eketa. 14Hinte si77i giite; Goday hinte gisho oletana” yaagis.

15Goday Museko, “Neeni ayis taako waassay? Isra7eeleti sinthe hemetana mela oda. 16Ne xam7a Abbaa bolla dentha; haathay shaaketana. Isra7eeleti mela biittara Abbaa pinnidi baana. 17Taani Gibxeta wozanaa muumisana; enti hinte geedo kaallidi Abban gelana. Taani kawa, iya olanchota, iya para gaariyanne iya para gaariya laageyisata xoonada bonchetana. 18Ta enta xoonida wode, taani Godaa gideysa Gibxeti erana” yaagis.

19Xoossaa kiitanchoy, Isra7eele olanchotape sinthara hemeteysi entafe guye aadhidi hemetis. Shaara tuussay enta sinthafe guye bagga aadhidi, 20Gibxetasinne Isra7eeletas giddon eqis. He shaaray Gibxetas dhumisidi, Isra7eeletas poo7isis. Yaatin qamma kumethi Gibxeti Isra7eeletako shiiqibookona.

21Musey Abba bolla ba kushiya miccis. Goday he qamma wolqaama doloha carko yeddidi mela biitti bentana gaso Abbaa shocis. Haathay shaaketis. 22Haathay shaaketidi nam7u baggan godada eqin, Isra7eeleti mela biittara hemetidi pinnidosona. 23Gibxe kawa parati, iya para gaaretinne iya para gaariya laaggeysati entana kaallidi, Abban gelidosona. 24Sa7i wontana hanishin Goday tamanne shaara tuussan gididi Gibxe olanchota duge xeellidi, entaw hananaba dhaysis. 25Para gaareta gertoy genderetonna mela Goday enta para gaareta gertuwa sa7ara oythis. Gibxeti, “Goday Isra7eeleta maaddidi nuna oliya gisho, nuuni enta aggidi baqatoos” yaagidosona.

26Goday Museko, “Haathay Gibxeta bolla, enta para gaareta bollanne enta para gaariya laageyisata bolla guye simmana mela ne kushiya Abbaa bolla micca” yaagis. 27Musey ba kushiya Abbaa bolla miccin, sa7i wontiya wode Abbay ba kase bessaa guye simmis. Gibxeti baqatanaw koydosona, shin Goday enta Abban yeggis. 28Haathay guye simmidi, Isra7eeleta kaallidi Abban gelida para gaareta, para gaareta laaggeysatanne Gibxe olanchota mittis. Entafe issoyka attibeenna. 29Shin Isra7eeleti Abbaa giddora mela biittara hemetidi, haathay shaaketidi godada eqidashin pinnidosona. 30Goday he gallas Isra7eele asaa Gibxeta kushepe ashshis. Isra7eeleti hayqidi zin7ida Gibxeta Abbaa doonan be7idosona. 31Isra7eeleti Goday Gibxeta bolla bessida gita wolqaa be7ida wode Godaa yayyidosona. Godaanne iya aylliya Muse ammanidosona.

Currently Selected:

Kessa 14: GFBLVF

Highlight

Copy

Compare