- पैलो इतिहास 11
11
पूरे इस्राएल पै दाऊद कौ राजा होबौ
1तब सबरे इस्राएली दाऊद के लिगां हेब्रोन में जुड़कें कैन लगे, “सुन, हमोंरें और तें एकई हड्डी और मांस आंय। 2बीते दिनन में जब शाऊल राजा हतो, तब भी तेंई युद्ध में इस्राएलियन की अगुवाई करत हतो, और तोरे यहोवा परमेसुर ने तोए सें कई, ‘मोरी परजा इस्राएल कौ चरवाहा और मोरी परजा इस्राएल कौ परधान तेईं हुईयै’।” 3ई लाने सबरे इस्राएली पुरनिये हेब्रोन में राजा के लिगां आए, और दाऊद ने उनके संगै हेब्रोन में यहोवा परमेसुर के सामूं बाचा बांधी; और उनोंरन ने यहोवा परमेसुर के बचन के अनसार, जौन ऊने शमूएल सें कओ हतो, इस्राएल कौ राजा होबे के लाने दाऊद कौ अभिसेक करो।
4तब सबरे इस्राएलियो समेंत दाऊद यरूशलेम गओ, जौन यबूस भी कहात आए, और उतै यबूसी नाओं ऊ देस के निवासी रैत हते। 5तब यबूस के रहबेवारन ने दाऊद सें कओ, “तें इतै आबे नें पाहै।” तब भी दाऊद ने सिय्योन नाओं गढ़ हों लै लओ, ओई दाऊदपुर भी कहात आय। 6दाऊद ने कई, “जौन कौनऊं यबूसियों पे सबसे पैलां हमला करहै, ऊ परधान सेनापति हुईयै,” तब सरूयाह कौ मोंड़ा योआब सबसे पैलां चढ़ गओ, और सेनापति बन गओ। 7तब दाऊद ऊ गढ़ में रैन लगो, ई लाने ऊकौ नाओं दाऊदपुर पड़ो। 8ऊने नगर के चारऊं कोद, मतलब मिल्लो सें लैकें चारऊं कोद सहरपनाह बनवाई, और योआब के बाकी नगर के खण्डहरों हों फिन बसाओ। 9दाऊद की प्रतिस्ठा बिलात बढ़त गई और सेनाओं कौ यहोवा परमेसुर ऊके संगै हतो।
दाऊद के सूरवीर
10यहोवा परमेसुर ने इस्राएल के बारे में जौन बचन कओ हतो, ऊके अनसार दाऊद के जिन सूरवीरों ने सबरे इस्राएलियन समेंत ऊके राज में ऊके पक्ष में होकें, ऊहों राजा बनाबे हों जोर दओ, उनमें सें खास मान्स जे आंय। 11दाऊद के सूरवीरों के नाओं की सूची जा आय, मतलब एक हक्मोनी कौ मोंड़ा याशोबाम जौन तीसों में खास हतो, ऊने तीन सौ मान्सन पेै भाला चलाकें, उनहों एकई बेरां में मार डालो।
12ऊके बाद अहोही दीदो कौ मोंड़ा एलीआज़र जौन तीनईं महान् सूरवीरों में सें एक हतो। 13ऊ पसदम्मीम में जितै जवा कौ खेत हतो, दाऊद के संगै रओ जब पलिश्ती उतै युद्ध करबे हों जुड़े हते, और मान्स पलिश्तियों के सामूं सें भग गए हते। 14तब उनोंरन ने ऊ खेत के मजारें में ठांड़े होकें ऊकी रक्षा करी, और पलिश्तियों हों मारो, और यहोवा परमेसुर ने उनहों बड़ी विजय दैकें बचाओ।
15तीसों खास मान्सन में सें तीन दाऊद के लिगां चट्टान हों, मतलब अदुल्लाम नाओं गुफा में गए, और पलिश्तियों की छावनी रपाईम नाओं तराई में पड़ी भई हती। 16ऊ बेरा दाऊद गढ़ में हतो, और ऊ बेरा पलिश्तियों की एक चौकी बैतलहम में हती। 17तब दाऊद ने बड़ी अभलासा सें कओ, “को मोहों बैतलहम के फाटक के लिगां के कुआं कौ पानू पिलाहै।” 18तब बे तीनईं जनें पलिश्तियों की छावनी पै टूट पड़े और बैतलहम के फाटक के कुआं सें पानू भरकें दाऊद के लिगां लै आए; परन्त दाऊद ने पीबे सें मना करो और यहोवा परमेसुर के सामूं अर्घ करके उण्डेलो; 19और ऊने कई, “मोरो यहोवा परमेसुर मोए सें एैसो करबो दूर रखै। का मैं इन मान्सन कौ खून पीओं जिनोंरन ने अपने प्राणों पै खेलो आय? जे तौ अपने प्रानों पै खेलकें ऊहों ल्याए आंय।” ई लाने ऊने ऊ पानू पीबें सें मना करो। इन तीनईं बीरों ने जेई काम करे।
20अबीशै जौन योआब कौ भईया हतो, ऊ तीसों में परधान हतो। ऊने अपनो भाला चलाकें तीन सौ हों मार डालो और तीनईं के जैसो नामी हो गओ। 21दूसरी श्रेणी के तीनईं में ऊ बिलात नामी हतो, और उनकौ परधान हो गओ, परन्त खास तीनईं के पद हों नें पोंचो।
22यहोयादा कौ मोंड़ा बनायाह हतो, जौन कबजेल के एक बीर कौ मोंड़ा हतो, जीने बड़े बड़े काम करे हते, ऊने दो मोआबियों हों मार डालो, और जाड़े के दिना में एक गड़हे में उतरकें एक नाहर हों मार डालो। 23फिन ऊने एक बड़ी डील डौलवारे मतलब पांच हाथ लम्बे मिस्री मान्स हों मार डालो, ऊ मिस्री हाथ में जुलाहों की धरनी जैसो एक भाला लएं भए हतो, परन्त बनायाह एक लठिया लएं भए ऊके लिगां गओ, और मिस्री के हाथ सें भाला छुड़ाकें ओई के भाले सें ऊहों मार डालो। 24ऐसे ऐसे काम करके यहोयादा कौ मोंड़ा बनायाह उन तीनईं सूरवीरों में नामी हो गओ। 25ऊ तौ तीसों सें बिलात नामी हतो, परन्त खास तीनईं के पद हों नें पोंचो। ऊहों दाऊद ने अपने अंगरक्षकों कौ परधान ठैरा दओ।
26फिन दलों के सूरमा जे हते, मतलब योआब कौ भईया असाहेल, बैतलहमी दोदो कौ मोंड़ा एल्हानान, 27हरोरी शम्मोत, पलोनी हेलेस, 28तकोई इक्केश कौ मोंड़ा ईरा, अनातोती अबीएजेर, 29हूशाई सिब्बकै, अहोही ईलै, 30महरै, नतोपाई, एक और नतोपाई बाना कौ मोंड़ा हेलेद, 31बिन्यामीनियों के गिबा नगरवासी रीबै कौ मोंड़ा इतै, पिरातोनी बनायाह, 32गाशके नालों के लिगां रहबेवारो हूरै, अराबावासी अबीगल, 33बहूरीम अजमावेत, शल्बोनी एल्यहबा, 34गीजोई हाशेम के मोंड़ा, फिन हरारी शागे कौ मोंड़ा योनातान, 35हरारी सकार कौ मोंड़ा अहीआम, ऊर कौ मोंड़ा एलीपाल, 36मकेराई हेपेर, पलोनी अहिय्याह, 37कर्मेली हेस्रो, एज्बै कौ मोंड़ा नारै, 38नातान कौ भईया योएल, हग्री कौ मोंड़ा मिभार, 39अम्मोनी सेलेक, बरोती नहरै जौन सरूयाह के मोंड़ा योआब कौ हथयार ढोबेवारो हतो, 40येतेरी ईरा और गारेब, 41हित्ती ऊरिय्याह, अहलै कौ मोंड़ा जाबाद, 42तीस मान्सन समेंत रूबेनी शीजा कौ मोंड़ा अदीना जौन रूबेनियों कौ मुखिया हतो, 43माका कौ मोंड़ा हानान, मेतेनी योशापात, 44अशतारोती उज्जियाह, अरोएरी होताम के मोंड़ा शामा और यीएल, 45शिम्री कौ मोंड़ा यदीएल और ऊकौ भईया तीसी, योहा, 46महवीमी एलीएल, एलनाम कौ मोंड़ा यरीबै और योशव्याह, मोआबी यित्मा, 47एलीएल, ओबेद और मसोबाई यासीएल।
Currently Selected:
- पैलो इतिहास 11: BHB
Highlight
Copy
Compare
Share
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
