METIYU 28
28
Jisug Turab Kunam
(Mk 16:1-10; Lk 24:1-12; Jn 20:1-10)
1Doonu dvk aalv wxo kokw so wjw aal ar komc ho Meeri Magdalin hoo Meeri akwn hv nyubungam kaatab wnum, 2Cengma lvpab nyioby ak vc alwb hwqnum, ho ao At Swg gumtw ak ao gvda toloqgv ipoqbanv nyubu hoq wlw ngurtuml apnam wlwngam ngurgin tvl hoq aoho doonum. 3Mwwg gv vpv taiyam bioqnam hvb ho gv vjv tapam hvb puulu huuda-kvlanum. 4Rvkybo tulungv bos soma vrram sonum hoo tvmdwr hwqnv nyi sikbo hvb nyinum.
5Ao gumtw akv nyem tulungam benum, “Nulv bos sodwb nyikma, ngo cengdwn, daapo aoho mengknum Jisun nulv meegaqdo. 6Mwv so dookma, mwv benum hvbkalam, mwv turab nukun. Mwwg gel karkam haagdvl kaaka to. 7Sija nulv vnwqb wgdvl mwwg buu tulungam ‘Mwv sinam hoqgv turab nukun hvl bekin ta, ho mwv nulug otuqb Galilib wco nukun; nulv alo mwam kaapa tayin!’ Ngoqg benam sam nulv mwwg gab tvka.’’
8Bos sunam hvbjaqkam hemp lvgab nyubu hoqgv nyiory alwb xarbnv mwwg buu tulungam bekinnum.
9Cengma lvpab Jisu bulam kaapa tvl benum, “Swrsomalongv nulug lvgab doonka.’’ Bulv ogum haabnv mwwg lvpiangam gvbw tvl mwam xumnum. 10Jisu bulam benum, “Bos somabv. Wgdvl ngoqg buu tulungam bulam Galilib wtwk hvl bepa ta, hoo alo ngam kaapa tayin.’’
Rvkybo Tulug Pui
11Nyem tulungv bulug lamtab wxo kokw ho nyubungam rvkybo tulu gon bopam wkur banv hognvkv nyiknum hog mwlwngam nyub buda tulungam puiyam bekinnum. 12Nyub buda tulungv nyi axa tulug lvgab dookum doopa banv ywrs minsul pagoq ak meelinum, rvkybo tulungam twngk vigo jitwl, 13benum, “Nulv yubngaql doodwkho mwwg buu tulungv haal svmangam dvcol baqg nukun hvl beto. 14Ho soq pui sam gora ab tapa baloqkam, ngulv mwam xumt dvb mvtayin hoo nulam vs-axaq pagoq hoqgv cengin tayin.’’
15Rvkybo tulungv twngkam naanum hoo bulam hoghvl bedwb jinum hvbjaq nyinum. Hoqgab Juhudi tulug pengko lo hoq hvk puiyv joodul doodwn.
Jisu Mwwg Buu Tulungam Kaakinam
(Mk 16:14-18; Lk 24:36-49; Jn 20:19-23; Bn 1:6-8)
16Buu wyw leq akinv Jisu bulam xipwl apko Galiliho doonbo puutub wnum. 17Kokw so mwam kaapa tvl mwam xumnum. Hvbmabde bulug pengko lo tuugin mwwjw maanum. 18Jisu bulug dookub ogum hvvnwq banv bulam benum, “Ngam ao gvda tolo hoo swcw-nyodo so hog mwlw atoram ngoqg alaq si jipa kun. 19Hoqgab nulv wn, nyob luuxig nyi mwlwngam ngoqg buub mvta, hoo bulam Ab, Ko Tuup hoo Dvrwqbo yalwg emin gab baptijum jita, 20hoo ngoqg nulam gaml jinam ham bulam tomswr tvl tvjwl swwm to. Ho ngo nulug lvgab looxiam swcw-nyodongv dubnam gob dooba tayin.’’
Currently Selected:
METIYU 28: NYISBSI
Highlight
Copy
Compare
Share
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
